John 19:4-19

⁴Ikwer-penh Pilate warl-they tyerrelhek arrpemarl Ran angkek ikwer-rnemek, “Atyeng awelhenherr-arey! Ayeng yangkelhem atyenh-rnemek, rernem Jesus renh atnwenhey-alhetyek nhenh-warl, arrantherr renh aytaretyek. Ilek-they arrantherr renh ipmek atweman? Ilenherr-arey atyeng, nthakenh ra apmwel-areth mpwarek. Artwa alyelk arla atha areyel.”

⁵Jesus warl-they tyerrelhek, akapwert mwekart arreylp-angketyarr, arnkwa rnter-rnter-akert. Pilate Jew-rnem-kenh atyetyart-rnem-warl angkek, “Arenherr-arey! Ilenhey artwa ra!”

⁶Tyaty ilkwa atyetyart-rnemel iltyemwerney-rnemel-then Jesus arek-penh, rernem arlkek, “Artwa renh atwetyek! Arwerl iylpeyl-atherr-warl renh tywenetyek!” Pilate angkek ikwer-rnem, “Menty! Arrantherrant renh arwerl iylpeyl-atherr-warl aylpar-arrernenherr-arey! Atha renh arrwekel-antey arrkernemel ayernek, ilek-ilek-angkwarr. Ran apmwangkwarr mpwarey-angenh, arlarl ra.”

⁷Rernem Pilate renh ilek, “Artwa nhenhan ilelhek Akngey-kenh alerikw-arrpantey. Alakenh-they renh atwetyek, angka arrwekeleny anwekantherrenh aynteyel-angkwarr!”

⁸Pilate ra aterirrek, rarl awek-penh.

⁹Pilate-el Jesus warl kwen-warl atnwenheynek. Pilate-el renh ayernek, “Nthenh-areny ngan?” Jesus-el tyerney-angenh arrangkw, akater anenh.

¹⁰Pilate-el renh ilek arrpemarl, “Atyeng-warl ilelha, ayengan atyetyart ilkwarl. Atha ingwer-rnem ilanthetyek ngenh tyarlewetyek. Arrangkw, nga atyeng-warl ilelhey-angenh, ngenh arwerl ilpeyl-atherr-warl atanthem.”

¹¹Jesus angkek ikwer-warl, “Akngeyelant ngenh arrernek atyetyart ilkwa ahern-areny-kenh. Alakenh-angkwarr ntwa ayenh atwetyek alhewer. Artwa ingwerel ayenh ahayiwek ngkweng-warl, ra apmwangkwarr innga apenteyel.”

¹²Pilate ilkelhek, Jesus renh tyarlewetyek, atwey-angenharl. Ra Jew atyetyart-rnem ayernek tyarlewetyek. Rernem arlkenh, “Artwa ra atyetyart ilkwarrpantey ilelhenh. Rome-areny atyetyart ilkwa Caesar anyent-antey anwekantherrenh, ingkerrenh-kenh! Ntwa artwa yanh tyarlewenty, atyetyart ilkwa Rome-areny ngkweng ahelirrem!”

¹³Pilate-el awek-penh, ra Jesus atnwenhek aketh-warl. Pilate chair ilkwewarl arrernelhek. Hebrew angkel apmer alakenh aynteyel Gabbatha.

¹⁴Arlta anyent ayntenh Anperarl Alhek “Passover” tyenkerr arlkwey-alenty. Arlta ampepel-antey Jew-rnem akarrirrenh. Pilate angkek ikwer-rnem, “Nhenh arenherr-arey, atyetyart ilkwa arrekantherrenh.”

¹⁵Rernem ikwer arlkalhelirrek, “Aknga renh! Aknga renh! Arwerl iylpeyl-atherr-warl atantha!” Pilate-el renh-rnem ayernek arrpemarl, “Atha atyetyart arrekantherrenh atwem, arwerl iylpeyl-atherr-warl atanthemel?” Jew-rnem-kenh atyetyart-rnemel renh tyernek, “Rome-areny atyetyart ilkwa anwekantherrenh anyentant. Ingwerenty arrangkw.”

¹⁶Ikwer-penhan Pilate-el Jesus-an ahayiwek irlkenty-rnem-warl, rernem arwerl iylpeyl-atherr-warl renh atanthetyek.

¹⁷Irlkentyel rernem Jesus renh Pilate-kenh warl-they akngek. Arwerl iylpeyl-atherr rernem Jesus anpeth-warl tywenek, ra akngeynerl-ayntetyek. Rernem Jesus renh atnwenhek apwert-warl, itnan “Akapwert Ngkwern Akarnng”. Jew-rnemel apmer itnewek Golgotha.

¹⁸Irlkenty rernem Jesus renh arwerl iylpeyl-atherr-itwek atanthek naylel, ra ilwetyek. Artwa ingwer atherr arwerl iylpeyl-atherr-warl atanthek arrpemarl naylel. Irrkerant-atherr-itwek Jesus ampep-itwekarl.

¹⁹Pilate-el irlkenty ilanthek, pip arwerl iylpeyl-atherr irrwerl-ampeny-warl tywenetyek. Rernem angka irrpety-angkwarr ingkwernek, Jew-rnem-kenh-angkwarr, Rome-areny-rnem-kenh-angkwarr, Greece-areny-rnem-kenh-angkwarr. Angka nhanyem aynteyel pipel, “Nhanyem Jesus Nazareth-areny, Jew-rnem-kenh atyetyart ilkwa.” Jesus ra arwerl iylpeyl-atherr-itwek aylpar-anenh, Jerusalem-arrangarr aketh-ampeny. Ingwer-rnem angkepelarreng arwerl iylpeyl-atherr-angkwarr alhenh, rernem pip renh irrwerl-ampeny-itwek reytemilerl-apenh.