John 19:26-39

²⁶Ungunuk itye Jesuse nakkin al yan narkowalle tangulun tapangk ityan, Jesusald ngaitye tangulun, tapangk, henggengk, tangulun, yarnin itye Jesuse narkowanangk luku. Mimininda nak our ian umauwe porl.

²⁷Wunyitye yarnin al yan naitye ngaitye, Nak our Ninkowe. Wunyitye hikkai ngaitye Jesusald ityan waiyin narkowan Jesusald kinanyirangk taldumandangk.

²⁸Nglemin itye Jesuse hikkai ngruwar ellir pekir, yarnin itye luku klallin ap ellin.

²⁹Naiye itye yummun bottleowe vinegarald. Wunyar kornar yalkin ityan sponge vinegarungai yuppun ityan prangungai pempin ityan inangk Jesuse.

³⁰Jesusil yan muttun vinegar; yarnin itye luku, Paek ellin, wunyitye pornun.

³¹Wunyar Jewsar, hil amb uk nowaiy an nemmin pernelin kornar crossungai Sabbathungai: hil ambe yun passover; hikkai Sabbath nunkeri nungge; kar Jewsar al yan Pilate reytyuwun hil ambe, lulun an kanauwurle tahrukar pintamin an.

³²Wunyar soldierar lulun tarukengk kinanyirangk korn, yare ar ellir ityan crucified al yan Jesuse. Wunyar lulun tarukengk kinanyirangk yamminye korn.

³³Wunyar ityan nakkin Jesuse kar kungullun itye pornelin, nowaiy ar lulun kinanyirangk tarukengk.

³⁴Wunyile yan soldierowe lakkin prewirre Jesusald; kinanyerinend prewirrenend yaralin krewe bahrekar.

³⁵Kitye nakkir haranekar, wunyitye an rnungaiulur, nglemin itye yar itye tingowun katyil, hil amb ai ngune our wurruwarrin.

³⁶Kar ellir luku, hil amb ukke Tungare Jehovald rauwul itye yarnin luku; nowaiy ar lulani kinauwe partpatar.

³⁷Yamminye Tungare Jehovald itye yarnir, “kar nakkani ityan yaral ar ityan lakkir.”

³⁸Wunyil ngaitye Jesusald, naitye mitye Joseph Arimathea, reytyuwun ile yan Pilate pempin Jesuse, morok ile yan Pilate ile yan inangk pempin morokkun ile yan Jesuse.

³⁹Yamminye ngaitye Jesusald, naitye mitye Nicodemus; (Kitye puntir kaldow inangk Jesuseyaral an yonguldye); morokkun ile an myrrh, aloes, spices, hundred pound, talin an ellin.