John 19:2-11

²Etero dadabetiri, isoro kakato asi titifaghae ava bu kefu edo, kini (king) da kekesa avavaga useri. Amingedo, bu Iesu da jiroda asugedo, embo unju tamo ghousago ava budo nunda tamonda asuguseri.

³Asugedo, ne totorugedo numoá dere jise eminge sedo ghuseri, “Orokaiva! Jusi embo da kini buviro! Orokaiva!” aminge sedo ghuseri. Aminge sise, nunda sovoda megha edo ghuseri.

⁴Amingero, Pilate sekago jovereghedo ira, natofokena buvudo sisira, “Givu! Nunda dara eni jo tambae eteni. Ava kasama aovo dae sedo, saono sekago foa buvarira.”

⁵Aindae Iesu sekago ira buvurutusira. Kekesa, asi titifaghaeimi kefu usera a, embo unju tamo ava asugedo, ainghae fira nemokena buviri, Pilate sisira, “Givu! Genembo evirere!”

⁶Setiri, fristi+ da kokotofu a God da Kambo+ kaifa kakato ne Iesu gido, dabade koko sise siseri, “Arafa dege! Arafa dege!” setero, Pilate mino sisira, “Avori, nene budo arafa devu ambare! O namo, nunda dara eni jo tambaeri.”

⁷Aminge setiri, Jusi embo da babojegari, ne minonda siseri, “Namanenda Agho Dari resira amo, nu ambarira. Ainda beká mo: nu tofo mandi, ‘Na God da Mandiri,’ sedo ghusira.”

⁸Ne aminge sero ningido, Pilate nu oju beká ava usira. Nu giti itako oju usira. O amboda, ava ningido, nu oju beká ava usira.

⁹Edo, nu sekago jovereghedo Iesu budo ira, nunda kamboda teredo Iesu kena ategi usira, “Se ningone! Ni reda ghe fusesi?” setiri, Iesu mino eni jo sae usira.

¹⁰Etiri, Pilate numokena sisira, “Namokena geka eni jo sae aresa? Kote gi! Nimo arafa dari da fakina namokena irira. Kotugo, nimo doyono ya buvari da fakina barago, namokena irira,” aminge sisira.

¹¹Setiri, Iesu mino numokena sisira, “Setesa ainda fakina ava, God nimokena futusira. Jo mutae aetira amo, ni jo bu jighirae aetesi. Ava sedo, genembo mave na ninda ungoda fitira, ainda ari eko mo, mindafugori. Nine saso ambarena ainda dara ava, jo nunda amingo iraeri.”