John 19:15-37

¹⁵Setiri, ne minonda koko sise siseri, “Dege ambare! Dege ambare! Arafa dege ambare!” setero, Pilate ategi usira, “Nenda kini ava arafa daono ambare dae reseva, ai?” Aminge setiri, fristi+ da kokotofu siseri, “Eminda namanenda kini eni tefori. Dabako irira amo, Rome embo da kotofuko ava, nu namanenda kiniri. Eni tefori.”

¹⁶Aminge setero, Pilate nu Iesu arafa daoro ambare dae sedo, nenda ungoda fifitusira.

¹⁷Etiri, ne setero Iesu nunda korosi tofo fumbiri, budo iseri. Era, vasa eninda buvurutuseri. Vasa amo Jusi embo da gekaimi javo ‘Golgota’ seraera. O namondeda geka mo, ‘Ambari Embo da Jiro Aghati’ seraera.

¹⁸Aminda buvudo, Iesu arafa dedo, gegenembo etoto naká ábarago sovenisoveni arafa detero, nemonde dabade fefetuseri.

¹⁹Amingusera ainda amboda, Pilate geka eminge gembudo setiri, budo era Iesu da korosida doruseri: “Emo Nasareth embo genembo Iesu, Jusi embo da kiniri,” aminge gefusira.

²⁰Ainda geka ava, Jusi embo digari aimi ne tegutuseri. Ainda beká mo: vasa aminda ghe ya Jerusalem buvari jo soka iraeri. Geka amo, Jusi embo da gekaimi, Rome embo da gekaimi a, Greek embo da gekaimi gefuseri.

²¹Jusi embo digarii geka ava tegutero gido, Jusi embo da fristi+ da kokotofu era Pilate kena siseri, “‘Nu Jusi embo da kiniri,’ ava erá seose! ‘Nu tofo Jusi embo da kiniri, sisira,’ ava gembu!”

²²Aminge setero, Pilate mino sisira, “Tefo! Na rea gembena, a gembeni! Ava irarira!”

²³Isoro kakato ne Iesu arafa dedo ainda amboda, nunda embo boka ava budo soro edo, diti isambu avononde naká fugutuseri. Fugedo, ne diti ava inono daba daba ruruseri, ne avononde naká ava sedo. Nunda tamo asugari ghousa barago ruruseri. Tamo asugari amo, jo avagaya iraeri.

²⁴Ágido, isoro kakato ne tofo tofo se nininguseri, “Namonde jo jighi torerae arera. Namonde mave kikindoro gae barira amo, tamo asugari evia nune barira,” Amingusera da beká mo: God da geka rea aindae sisira ava, beká are dae sedo aminguseri. God da Geka sisira, amo eviri: “Nanda embo boka, tofo tofo soro edo ruruseri. A nanda tamo asugari ghousa ava bari dae sedo, kikindoro garuseri,” God da Geka anakora aminge sisira, aindae isoro kakato ne aminguseri.

²⁵Amingero, Iesu da korosi dengesida, evevetu mendeni fetiriseri. Evevetu fetirisera amo, Iesu noi nunda gagarakoghae, noi da nunombo eni, amo Clopas noaro Mary, kotugo Iesu noi da nunombo eni, amo Magdara embo evetu javo Mary ri.

²⁶Iesu namanenda genembo eni dubo budo ghusira aimi, Iesu da noighae dabade fetirero gido, Iesu noikena eminge sisira, “Aya, ninda mandi avarere.”

²⁷Aminge sedo, kotugo jovereghe nunda ambo jimbi aikena sisira, “Ninda nei avarere.” Aminge setiri, nunda ambo jimbiá eredo Iesu da noi budo kamboda isira. Sifo aminda nu tuturo edo, nunda kamboda kaifa edo ghusira.

²⁸Ari rea nune aetira amo, etiri inono usira ava, Iesu kasama usira. Kasama edo, God da Geka eni rea resira, ava beká are dae sedo, Iesu eminge sisira, “Na dubo sagherira.”

²⁹Setiri, vaini (wine) dokegha aghada averegetero fasirisira ava, ika eni javo hisofi seraera, ainda fatu ava budo, roera eni sofeya avavaga bu aminda vakimbedo, aimi fati budo, nunda békada fifituseri.

³⁰Fitero, vaini (wine) ava mindido, Iesu, “Inono etira!” sisira. Aminge sedo, nu tumo darido, ghamo asegari dotutusira.

³¹Ainda amboda, Jusi embo da babojegari Pilate kena era ategi useri, nu ‘avori’ sari ningido, ne Iesu a tafasara kakato da ata de jojoregaoro totoi amboro, korosida ava bari dae sedo, ategi useri. Ne aminge benunu sisera da beká mo: sifo aminda Jusi embo nenda Jarige Yari Da Kirumo+ aindae simbugeraera. Ava sedo, sifo atarira amo, Jangutari da Sifo kakara bekári. Sifo aminda, tamo korosida irari ava, jo uju aeri.

³²Aindae, Pilate ‘avori’ setiri, isoro kakato era, tafasara kakato Iesu de dabade arafa dorusera, ainda ata de jojoreguseri.

³³De jojoregetero dadabetiri, fera Iesu kena buvurutusera amo, Iesu anakora ambiri gido, nunda ata jo de jorae useri.

³⁴Numo, isoro kato eniimi eredo nunda gorobai Iesu da reimada gae basetiri, uvu ororoghae baingoro edo vovosusira.

³⁵(Nane gosusena, evia tumondaovo dae sedo, resena. Na kasama erena. Nane resena emo, geka bekári.)

³⁶God da Geka rea resira ava, beká are dae sedo aminguseri. Amo eviri: “Nunda etu eni jo de jorae arera.”

³⁷A vasa eninda resira: “Genembo nene gae basisera ava, fuge garera,” God da Geka aminge resira.