Johanningundru 9:18-40

¹⁸Juda kanali nunkangu, nau butju nganana warai ja nakaldra najina warai, wata morlalu ngundrana wonti, tanali nunkanipini, nulu nakaldra najina warai, ngaperi ja ngandri karkanantulu.

¹⁹Ja tanali pudlana jakalkana wonti ja jatana wonti: “Naupini judlani kupa nganai, nunkangundru judla jatai, nau butju dankanala? Worderu jenia pantjina warai, ngangau nulia karari najiai?”

²⁰Ngaperali ja ngandrieli nunkanali tanangu kalabana wonti ja jatana wonti: “Ngali milkila, naupini ngalini kupa nganai, ja nauja butju dankanala;

²¹Worderu nulia karari kantji najiai ngali ko; warle milki nunkani piri ngankana warai, ngali ko; nauja munta pirna nganai, ninaia munta jakalkanau, nauja nunkangundru muntali kalabananto.”

²²Jenia ngaperi ja ngandri nunkani jatana wonti, ngangau pudla Juda kanandru japali nganana wonti; ngangau Juda kana kulnukulnuni nganana wonti, warle nina Christus dikanani, nina tanali Godaia milindru worala nganai.

²³Jendrangundruja ngaperi ja ngandri nunkani jatana wonti: “Nauja munta pirna nganai, ninaia munta jakalkanau.”

²⁴Tanali nina kana, nau butju nganana warai, nakaldra pota mandrula karkana wonti ja nunkangu jatana wonti: “Godani pirna ngundrau!” ngaiani milkila, Naupini kana madlentji nganai.

²⁵Nulu kalabana wonti ja jatana wonti: “Nau kana madlentji nganai kara, ngani ko; kulno ngato milkila, ngani butju nganana warai ja karari nakaldra najiai.”

²⁶Tana nakaldra nunkangu jatana wonti: “Mina Nulu jinkangu ngankana warai? Worderu Nulu milki jinkani piri ngankana warai?”

²⁷Nulu tanangu kalabana wonti: “Ngani jurangu matja jatana warai ja jura bulu ngarana warai. Minandru jura jenia nakaldra ngarananto? Jura bakana ngantjai mili nunkani pantjila?”

²⁸Tana nunkangu kaldririna wonti ja jatana wonti: “Jidni mili nunkani nganai, ngaiani Mosini mili nganai.

²⁹Ngaiani milkila, Godali Mosingu kaukaubana wonti; nunkangundru ngaiani ko nganai, wodajerindru Nau nganai.”

³⁰Nulupini kanali tanangu kalabana wonti ja jatana wonti: “Jenia ngaruparana nganai, ngangau jura ko wodajerindru Nau nganai, ja Nulu milki ngakani piri ngankana warai.

³¹Ngaiani milkila, Godali kana madlentji wata ngarai, a-ai, kulno Godandru japali ngananani ja jertapaterina nunkani ngankanani, nina Nulia ngarai.

³²Nguralindru (tanali) wata ngarana wonti, kulnujeli kana butjuja milki, nau butju dankanala, piri ngankana wonti.

³³Naupini wata Godandru ngananani, Nau ngandandarinani jenia ngankala.”

³⁴Tanali kalabana wonti ja nunkangu jatana wonti: “Madlentjani jidni dankanala, ja jundru ngaianingu ngujangujara jinkiai?” Ja tanali nina tertubana wonti palaraia.

³⁵Jesujeli matja ngarana, tanali nina narrana warai, ja Nulu nina matja mankamankana, Nau nunkangu jatana wonti: “Jundru Godaia Ngatamurani morlalu ngundrai?”

³⁶Nulu kalabana wonti ja jatana wonti: “Worana Nau nganai, Kaparajai, ngato nunkangu morlalu ngundrananto?”

³⁷Jesus nunkangu jatana wonti: “Jundru nina najina warai, ja Nulia jinkangu ngankamalila wapaia, Naumata Nauja nganai.”

³⁸Nau jatana wonti: “Kaparajai, ngato morlalu ngundrai;” ja nau nunkangu pantjaterkana ngarina wonti.

³⁹Ja Jesus jatana wonti: “Ngani nunkangupini mitani wokaranala puntibala; ngangau tanali wata najiai najinanto, ja tanali najiai butjurinanto.”

⁴⁰Ja jenia Pharisaia palpali, tana nunkangunto ngananani, ngarana wonti ja nunkangu jatana wonti: “Ngaiani bakana butju nganai kara?”