Johanningundru 6:2-20

²Ja kana wolara nunkangu karipaterina wonti, ngangau tanali tanana malka najina wonti, tana Nulu muntjani ngankana wonti.

³Ja Jesus mardawonpaia tarana wonti, ja naka Nau ngamana ngarina wonti nunkani milinto.

⁴Ja Passa, Juda kanaia ditji pirna, karakara nganana wonti.

⁵Jesus milkieli pariparina wonti ja najina wonti kana wolara nunkangu jurborinani, Nau Philippungu jatana wonti: “Wodajerindru ngaiana buka burungankananto tanali tajinanto?”

⁶Jenia Nau jatana wonti nina wontjana; ngangau Nau munta milkila nganana wonti, mina Nau jertapaterina wonti ngankala.

⁷Philippulu nunkangu kalabana wonti: “200 mardatandrali buka tanangu wata matja nganai, pilkipilki kulnujeli tanangundru windri ngalje maniati.”

⁸Mili kulno nunkani Andreas, Simon. Petruni ngatata, nunkangu jatana wonti:

⁹“Kanku kulno ninkida nganai, nulia buka ngunku mara wora ja paru mandru ngamalkai; ja mina jenia tanangu marapuni!”

¹⁰Jesus jataua wonti: “Ngankanau kana wolara ngamana ngarinanto!” Nunkangupini pirini kanta marapu nganana wonti. Ja kana 5,000 ngamana ngarina wonti.

¹¹Jesujeli buka patana wonti, ja Nulu jurakokana wonti, ja tanana milini jinkina wonti, ja milieli tanangu matja ngamana ngarina; jeruja bakana parundru, worderuntja tanali ngantjana wonti.

¹²Tana matja jerturina, Nau milini nunkanani jatana wonti: “Buka worduwordu kampanau, ngangau panila tintananto.”

¹³Tanali kampana wonti, ja billi marapratjana ja mandru buka worduwordujeli manamiri ngankana wonti buka ngunku mara worandru, tanana, tanali matja tajina, pinpana wonti.

¹⁴Kana worali nina malka, Jesujeli ngankanani matja najina, tana jatana wonti: “Naupini morlalu Nauja Propheta nganni, Nauja mitani wokarananto!”

¹⁵Jesujeli matja ngujamana, tana jertapaterinani wokarala ja nina patala ja nina mitaia kapara ngankala, Nau nakaldra mardawonpaia kutingana wonti kulnulu.

¹⁶Matja kalkaurarina, mili nunkani pantuja ngarina wonti,

¹⁷Ja tana botani wirina wonti ja ngapani Kapernaumia wapana wonti; ja matja ngalpuru ngananani, Jesus wata tanangu wokarana warai;

¹⁸Ja panto patijiritjma wonti, ngangau watara pirna ngakana wonti.

¹⁹Tana Statia 25 kara, 30 kara worita wapana, tanali Jesus najina wonti ngapani wapanani ja botani karakara wokaranani; ja tana japali pantjina wonti.

²⁰Nau tanangu jatana wonti: “Nganimata Nauja, wata japali ngananau.”