Johanningundru 6:18-62

¹⁸Ja panto patijiritjma wonti, ngangau watara pirna ngakana wonti.

¹⁹Tana Statia 25 kara, 30 kara worita wapana, tanali Jesus najina wonti ngapani wapanani ja botani karakara wokaranani; ja tana japali pantjina wonti.

²⁰Nau tanangu jatana wonti: “Nganimata Nauja, wata japali ngananau.”

²¹Tana jertapaterina wonti nina botaia manila, ja nurujeli bota dirkalaia pararana wonti, wodajeri tana jertapaterinani pararala.

²²Ditji kulnuni, tanali kana wolarali panto dirkalani jerankari matja terkana, najina wonti, wata bota nguru naka nganala wiri, windri naupara kulnulu, ja Jesus wata milini nunkanani jela botani wirila wiri, a-ai, windri mili nunkani pilki wapala wiri

²³— Bota nguru wokarana warai Tiberiandru nunkangupini pirini karakara, wodajeri tanali buka tajila wiri Kaparaia jurakokanandru —;

²⁴Kana worali najina, Jesus wata ninkida ngananani, bakana wata mili nunkani, tana bakana bota worani wirina wonti, ja Kapernaum ngurani wokarana wonti Jesus wontila.

²⁵Ja tanali nina pantuni jerutajerra matja mankamankana tana nunkangu jatana wonti: “Rabbi, winta jidni ninkida wokarana warai?”

²⁶Jesujeli tanangu kalabana wonti ja jatana wonti: “Morlalu, morlalu, ngani jurangu jatai: Jura ngana wata wontiai, ngangau jura malka najila wiri, a-ai, ngangau tanangupini bukandru jura tajila wiri ja jerturila wiri.

²⁷Wata jenipara buka ngankanau jenia mudai, a-ai, jenipara buka, jenia tepi nguralini parala nganai, ninapini Kanaia Ngatamurajeli jurangu jinkila nganai; ngangau Ninapini Goda Ngaperali morlalu kurana wonti.”

²⁸Tana nunkangu jatana wonti: “Mina ngaiani ngankananto Godaia ngankana ngankala?”

²⁹Jesujeli kalabana wonti ja tanangu jatana wonti: “Naupini Godaia ngankana nganai: Jura nunkangu morlalu ngundrananto, ninapini Nulia jinpanala.”

³⁰Tana nunkangu jatana wonti: “Mina malka jundru ngankai, ngaiani nina najinanto ja jinkangu morlalu ngundrananto? Mina jundru ngankai?

³¹Ngaianini ngaperi worali pitarani Manna tajina wonti, worderu dakanala parai: Buka pariwilpandru Nulia tanangu tajinanto jinkina wonti.”

³²Jesus tanangu jatana wonti: “Morlalu, morlalu, ngani jurangu jatai: Wata Mosili jurangu buka pariwilpandru jinkina wonti, a-ai, Ngaperali ngakanali jurangu buka morlalu pariwilpandru jinkiai.

³³Ngangau Godaia buka Nauja nganai, Naupini pariwilpandru ngariai, ja mitalani tepi jinkiai.”

³⁴Tana nunkangu jatana wonti: “Kaparajai, milingeru ngaianingu ninapini buka jinkiau!”

³⁵Jesus tanangu jatana wonti: “Ngani tepia buka nganai; worana ngakangu wokarai nauja wata mauali pantjila nganai; ja warle ngakangu morlalu ngundrai, nauja wata morla tertieli pantjila nganai:

³⁶Ngani jurangu jatana warai: Jura ngana najina warai ja wata morlalu ngundrai.

³⁷Pratjana mina Ngaperali ngakanali ngakangu jinkiai, ngakangu wokarala nganai, ja worana ngakangu wokarai, ninapini ngato wata narrala nganai.

³⁸Ngangau ngani pariwilpandru ngarina wonti wata ngakani jertapaterina ngankala, a-ai, nunkani jertapaterina, Nulia ngana jinpanala.

³⁹Jenia Ngaperaia jertapaterina nganai, Nulia ngana jinpanala: Ngato pratjanandru, mina Nulia ngakangu jinkinala, panila tintananto, a-ai, ngato jenia ditjini ngadalani jiritjibananto.

⁴⁰Ngangau jenia Ngaperaia ngakanaia jertapaterina nganai: Warle Ngatamura najiai, ja nunkangu morlalu ngundrai, tepi ngurali ngamalkananto; ja ngato nina ditjini ngadalani jiritjibala nganai.”

⁴¹Juda kana buljubuljurina wonti, ngangau Nau jatana warai: “Ngani jenipara buka nganai, Nau pariwilpandru matja ngarina.”

⁴²Ja jatana wonti: “Naupini wata Jesus, Josephani ngatamura, nunkani ngaperi ja ngandri ngaiani ngujamai? Worderu Naupini jatai: Ngani pariwilpandru matja ngarina?”

⁴³Jesujeli kalabana wonti ja tanangu jatana wonti: “Wata buljubuljurilkijiribamalianau.

⁴⁴Wata kulno ngurunguru nganai ngakangu wokarala, Ngaperali ngakanali, Nulia ngana matja jinpana, nina wata parumanani; ja ngato nina ditjini ngadalani jiritjibala nganai.

⁴⁵Propheta worani dakanala parai: Ja tana pratjana jenipara nganala nganai, tanali Godandru ngujangujara matja manina; warletanali Ngaperandru matja ngarana ja kirina, ngakangu wokarai.

⁴⁶Wata kulnujeli Ngapina najina warai, a-ai, windri Nulia, Nauja Ngaperandru nganai, Nulia Ngapina matja najina.

⁴⁷Morlalu, morlalu, ngani jurangu jatai: Warle ngakangu morlalu ngundrai, nulu tepi ngurali ngamalkai.

⁴⁸Ngani tepia buka nganai.

⁴⁹Ngaperi worali juranali pitarani Manna tajina wonti ja palina wonti.

⁵⁰Naupini buka, pariwilpandru matja ngarina, jenipara nganai, tanali nunkangundru tajinanto ja wata palinanto.

⁵¹Ngani tepia buka nganai, Naupini pariwilpandru matja ngarina; warle nunkangupini bukandru tajila nganai, nulu tepi ngamalkala nganai ngurali; Naupini buka, nina ngato jinkila nganai, ngani palku nganai, ninaia ngani jinkiterila nganai mitalaia tepini.”

⁵²Juda kana jatamalina wonti ja jatana wonti: “Worderu Nulupini ngaianingu palku nunkani jinkila nganai tajinanto?”

⁵³Jesus tanangu jatana wonti: “Morlalu, morlalu, ngani jurangu jatai: Jura wata Kanaia Ngatamuraia palku tajinani, ja kumari nunkani tapanani, jura wata tepi jurangu ngamalkanani.

⁵⁴Warle ngana palku tajiai, ja ngana kumari tapai, nulu tepi ngurali ngamalkai, ja ngato nina ditjini ngadalani jiritjibala nganai:

⁵⁵Ngangau ngani palku buka morlalu nganai, ja ngani kumari tapani morlalu.

⁵⁶Warle ngana palku tajiai, ja ngana kumari tapai, nau ngakangu ngamai ja ngani nunkangu.

⁵⁷Worderu ngana Ngaperi tepieli jinpanala, ja ngani Ngaperandru tepi nganai; jeruja bakana warle ngana tajiai, nau ngakangundru tepi ngamala nganai.

⁵⁸Naupini jenipara buka nganai, Nauja pariwilpandru matja ngarina; wata jeruja worderu ngaperi worali juranali Manna tajina wonti ja palina wonti; warle ninapini buka tajiai, nau ngurali tepi ngamala nganai.”

⁵⁹Tananapini Nau jatana wonti, Nulu Kapernaum jaura pungani ngujangujara jinkina.

⁶⁰Mili nunkani marapujeli jenia matja ngarana, tana jatana wonti: Naupini jaura ngurunguru nganai, worana ngurunguru nganai nina ngarala?”

⁶¹Jesujeli muntali matja ngujamana, mili nunkani jendrangundruja buljubuljurinani, Nau tanangu jatana wonti: “Jendrangundruja jura kintjakintjariai?

⁶²Jura najinani Kanaia Ngatamura taranani, wodajeri Nauja ngopera nganana wonti?