Johanningundru 5:6-42

⁶Ninapini Jesujeli paranani najina wonti, ja Nulu ngarana wonti, nau ditji marapu jeruja nganana, Nau nunkangu jatana wonti: “Jundru ngantjai tepi pantjila?”

⁷Muntjali nunkangu kalabana wonti: “Kaparajai, ngato kana pani ngamalkai, nulu ngana pantuni worananto, ngapa matja patijiritjibana; ja ngani wokaranani kulno nguru ngakangu ngopera wiriai.”

⁸Jesus nunkangu jatana wonti: “Jiritjiau, turarani piri jinkani maniau ja wirariau!”

⁹Ja nurujeli naupini kana tepirina wonti, ja nulu turarani piri nunkani manina wonti ja wirarina wonti. Ja naupini ditji Sabbat nganana wonti.

¹⁰Juda kana nunkangu muntjalani jatana wonti: “Karari Sabbat nganai; ja jenia jinkangu wata lnanuni kurala wapaia turarani piri jinkani waltananto.”

¹¹Nulu tanangu kalabana wonti: Naupini, Nulu ngana tepi ngankana warai, ngakangu jatana warai: Turarani piri jinkani maniau ja wirariau!”

¹²Tanali nina jakalkana wonti: “Worana Naupini kana, Nau jinkangu jatana warai: Turarani piri jinkani maniau ja wirariau!”

¹³Naupini muntjala ko nganana wonti, worana Nau nganai, ngangau Jesus kutingana wonti, ngangau kana wolara nunkangupini pirini nganana wonti.

¹⁴Ngadani Jesujeli nina Godaia pungani mankamankana wonti ja nunkangu jatana wonti: “Mai, jidni tepirina warai; wata morla madlentji ngankau, jinkangu morla madlentji wokaraiati.”

¹⁵Naupini kana wapana wonti ja Juda kanani kaukaubana wonti: “Nau Jesus nganai, Nulu ngana tepi ngankana warai.”

¹⁶Ja Juda kana jendrangundruja Jesungu tirikaripaterina wonti ja wontjana wonti nina naria nandrala, ngangau Nulu jenia ngankana wonti Sabbatani.

¹⁷Jesujeli kalabana wonti ja tanangu jatana wonti: “Ngaperali ngakanali ngankai kararielu, ja ngato bakana ngankai”

¹⁸Jendrangundruja Juda kanali morla wontjana wonti nina naria nandrala, ngangau Nulu wata windri Sabbat wokaribana wonti, a-ai, Nulu bakana Goda Ngaperi nunkani dikana wonti, ja jeruja munta Goda jeribaka ngankaterina wonti.

¹⁹Jesujeli kalabana wonti ja tanangu jatana wonti: “Morlalu, morlalu, ngani jurangu jatai: Ngatamura munta ngandandariai ngankala, Nulu wata ngopera najinani Ngaperali ngankanani; ngangau mina Nulupini ngankai, jenia bakana Ngatamurajeli ngankai.

²⁰Ngangau Ngaperali Ngatamura ngantjai, ja Nulia pratjana nunkangu wondrai, mina Nulia muntali ngankai; ja ngankana morla pirna tanangu Nulia nunkangu wondrala nganai, jura ngaruparananto.

²¹Ngangau worderu Ngaperali narila jiritjibai ja tepi ngankai; jeruja bakana Ngatamurajeli tepi ngankai tanangu Nauja jertapateriai.

²²Ngangau Ngaperali wata kulnuni kalala kurai, a-ai kalala kurani pratjana Nulia Ngatamurani jinkina wonti,

²³Ngangau pratjanali Ngatamura pirna ngundrananto, worderu tanali Ngaperi pirna ngundrai. Warlenulu Ngatamurani wata pirna ngundrai, nulu Npaperi wata pirna ngundrai, Nulia ninaia jinpanala.

²⁴Morlalu, morlalu, ngani jurangu jatai: Warlenulu jaura ngakani ngarai, ja nunkangu morlalu ngundrai, Nulia ngana jinpanala, nulu tepi ngurali ngamalkai; ja kalalani nau wata wokarai, a-ai, nau narindru tepia wiringana wonti,

²⁵Morlalu, morlalu, ngani jurangu jatai: Ditji kulno wokarala nganai, ja matja karari nganai, narieli Godaia Ngatamuraia ngaiala ngarala nganai, ja tanali ngarai, tana tepirila nganai.

²⁶Ngangau worderu Ngaperali muntali nunkangu tepi ngamalkai, jeruja bakana Nulia Ngatamurani jinkina wonti, tepi muntali nunkangu ngamalkala.

²⁷Ja Nulia nunkangu ngurula jinkina wonti kalala kurananto; ngangau Nauja Kanaia Ngatamura nganai.

²⁸Wata ngaruparanau nunkangupini; ngangau ditji kulno wokarai, nunkangupini pratjanali, tana nari kutuni parai ngaiala nunkani ngarala nganai,

²⁹Ja dunkala nganai, tanali ngumu ngankanala tepia terkakala nganai, ja tanali madlentji ngankanala terkakala nganai kalalaia.

³⁰Ngani ngandandariai muntali ngakangundru ngankala; a-ai, worderu ngato ngarai, jeruka ngato kalala kurai; ja kalala kurani ngakani talku nganai, ngangau ngato wata ngakani jertapaterinali wontiai, a-ai, windri nunkani jertapaterinali, Nulia ngana jinpanala.

³¹Ngato ngakangundru muntali jaura ngamalkanan, jaura ngakani wata morlalu ngananani;

³²Kulno nguru ngakangundru jaura jatai, ja ngani milkila, jaura nunkani morlalu nganai, ninaia Nulia ngakangundru jatai.

³³Jura Johanningu jinpana paraia, ja nulu jaura jatana paraia morlaluja.

³⁴Ngato wata kanandru jaura morlalu maniai, a-ai, jenia ngani jatai, jura kulkani ngamalkananto.

³⁵Nau jerkini ja mintjini praitji nganana wonti; ja jura ngantjana paraia ditji ngalje murlali nganala praitjani nunkanani.

³⁶Ngato jaura morlalu morla pirna ngamalkai Johanningu; ngangau tananapini ngankana, tanana Ngaperali ngakangu jinkinala, ngato tanana mudananto, tananapini ngankana tanana ngato ngankai, ngakangundru morlalu jatai, Ngaperali ngana jinpanala.

³⁷Ja Ngaperali, Nulia ngana jinpanala, munta ngakangundru jaura morlalu jatana wonti. Jura wata ngaiäla nunkani ngarana wonti, ja wata mudla nunkani najina wonti;

³⁸Ja jaura nunkani wata jurangu paraia wapaia, ngangau ninaia, ninaia Nulia jinpanala, nunkangu jura wata morlalu ngundrai.

³⁹Jura wontiai Godaia jaurani, ngangau jura ngundrai nunkangu tepi ngurali ngamalkala, ja tanapini nganai, tanana ngakangundru kaukaubai.

⁴⁰Ja jura wata ngantjai ngakangu wokarala tepi ngamalkala.

⁴¹Kanandru wata ngato pirnala maniai.

⁴²Ngato jurana ngujamai, jura wata Godaia ngantjana jurangu ngamalkai.