Johanningundru 4:3-48

³Nau Judaiandru puntina wonti ja nakaldra Galilaiaia palkana wonti.

⁴Nau Samaria mitani palkingananto.

⁵Nau wokarana wonti Samaria ngura kulnuni, tala nunkani Sichar, nunkangupini mitani karakara, nina Jakobali ngatamurani nunkanani Josephangu jinkina wonti.

⁶Naka Jakobani ngapatjili nganana wonti. Ngangau Jesus palkanandru matja walturina, Nau ngamana ngarina wonti ngapatjilini; ja toda nganana wonti.

⁷Samaria widla kulno wokarana wonti ngapa kaluala. Jesus nankangu jatana wonti: “Ngakangu jinkiautapananto?”

⁸Ngangau mili nunkani nguraia wapana wonti buka burungankala.

⁹Samarita widla nunkangu jatana wonti: “Worderu jenia, jidni Juda kana nganai ja ngatjiai ngakangundru tapala, ngani Samarita widla ngananani?” Ngangau Juda kana wata manduriai Samaritalani.

¹⁰Jesujeli kalabana wonti ja jatana wonti nankangu: “Jundru Godaia poto ngujamanani ja worana Nauja nganai, Nauja jinkangu jatai: Jinkiau ngakangu tapananto, jidni nunkangu ngatjila nganai, ja Nulia jinkangu tepia ngapa jinkila nganai.”

¹¹Widla nunkangu jatana wonti: “Kaparajai, jundru wata ngapakoko ngamalkai ja ngapatjili mikari nganai; wodajerindru jundru tepia ngapa ngamalkai?

¹²Jidni morla pirna nganai ngaianini ngaperani Jakobangu, nulupini ngaianingu ninaia ngapatjili jinkina wonti, ja nulu muntali nunkangundru tapana wonti ja ngatamurajeli nunkanali ja ngantieli nunkanali?”

¹³Jesujeli kalabana wonti ja nankangu jatana wonti: “Warlepratjana nunkangupini ngapandru tapanani nakaldra tertieli pantjila nganai.

¹⁴Warle nunkangupini ngapandru tapala nganai, nina ngato nunkangu jinkila nganai, nau ngurali wata tertieli pantjila nganai; a-ai, naupini ngapa, nina ngato nunkangu jinkila nganai, nunkangu ngapa jukeri pantjila nganai, nau ngurali tepini ngakala nganai.”

¹⁵Widla nunkangu jatana wonti: “Kaparajai, ninapjni ngapa ngakangu jinkiau, ngani wata morla tertieli pantjinanto, ja wata morla ninkida wokarananto kaluala.”

¹⁶Jesus nankangu jatana wonti: “Wapau, noa jinkani karkau, ja nakaldra ninkida tikau!”

¹⁷Widlali kalabana wonti ja jatana wonti: “Ngani noa pani.” Jesus nankangu jatana wonti: “Talku jidni jatana warai, ngani noa pani.

¹⁸Ngangau jundru noa mara wora matja ngamalkana, ja nau, ninapini jundru karari ngamalkai, wata noa jinkani nganai; jenia jidni morlalu jatana warai.”

¹⁹Widla nunkangu jatana wonti: “Kaparajai, ngato na jiai, jidni Propheta nganai.

²⁰Ngaianini ngaperi nunkangupini: mardawonpani ngatjina wonti, ja jura jatai, Jerusalemingu nau piri nganai, woderi ngatjinanto.”

²¹Jesus nankangu jatana wonti: “Widlajai, ngakangu morlalu ngundrau, ditji kulno wokarala nganai, jura wata morla nunkangupini mardawanpani ja wata morla Jerusalemingu Ngapinangu ngatjila nganai.

²²Jura nunkangu ngatjiai, nina jura wata ngujamai; ngaiani nunkangupini ngatjiai, ninaia ngaiani ngujamai; ngangau Kulkanipirna Juda kanandru wokarai.

²³Ditji kulno wokarala nganai, ja matja karari nganai, nunkangu tana morlalu ngatjinietja Ngapinangu ngatjila nganai Jaolali ja morlalujeli; ngangau: Ngaperali jenipara ngantjai, nunkangu jeruja ngatjinani.

²⁴Goda Jaola nganai, ja tana nunkangu ngatjiai, Jaolali ja morlalujeli nunkangu ngatjinanto.

²⁵Widla nunkangu jatana wonti: “Ngani milkila Messias wokarala nganai, nina tanali dikai Christus; Nau wokaranani, Nulu ngaianingu pratjana kaukaubala nganai.”

²⁶Jesus nankangu jatana wonti: “Ngani Naujata, Nauja jinkangu jela ngankamalila wapaia.”

²⁷Ja jendranguta mili nunkani tikana wonti, ja tana ngaruparana wonti, ngangau Nau widlali ngankamaliai; ja wata kulno jatana wonti: “Mina jundru wontiai kara? Mina jidni nankangu jela ngankamaliai kara?”

²⁸Widlali ngapakoko nankani worarana wonti, ja nguraia tikana kurana wonti, ja kanani jatana wonti:

²⁹“Kaparanimai ja najianimai kana kulno, Nulupini ngakangu jatana warai pratjana, mina ngato ngankana warai; Naumata kara Christus?”

³⁰Tana ngurandru dunkana wonti ja nunkangu wokarana wonti.

³¹Jendranguta mili nunkani nunkangu ngatjina wonti ja jatana wonti: “Rabbi, tajiau!”

³²Nau tanangu jatana wonti: “Ngato buka ngamalkai ninaia jura wata ngujamai.”

³³Mili wora jaura ngankamalina wonti: “Kulnujeli nunkangu buka jinkina warai kara?”

³⁴Jesus tanangu jatana wonti: “Buka ngakani nganai, ngato jertapaterina nunkani ngankananto, Nulia ngana jinpana wonti, ja ngankana nunkani mudananto.

³⁵Wata jura jatai: Pira mandru ja mandruni kampani ditji wokarala nganai? Mai, ngani jurangu jatai, milki jurani miririanau ja maruni najianau, ngangau nau karari talku nganai kampananto.

³⁶Kampanietjali kalala maniai ja tandra kampai ngurali tepia; ngangau jelali mankinanto jaupanietja ja kampanietja;

³⁷Ngangau ninkina jenia jaura morlalu nganai: Kulno pilki jaupanietja ja kulno pilki kampanietja.

³⁸Ngato jurana jinpana wonti kampananto, mina jura wata ngankana warai; kana ngurujeli ngankana wonti, ja jura ngankanani tananani wirina wonti.”

³⁹Nungangupini ngurandru Samaritala marapujeli nunkangu morlalu ngundrana wonti widlaia jaurandru, nandru tinkari ngankana wonti: “Nau ngakangu jatana warai pratjana, mina ngato ngankana wonti.”

⁴⁰Samaritala nunkangu matja wokarana, tana nunkangu ngatjina wonti, Nau tanangunto ngamananto; ja Nau ditji mandru naka ngamana wonti.

⁴¹Ja morla marapujeli nunkani jaurandru morlalu ngundrana wonti,

⁴²Ja widlani tana jatana wonti: “Wata morla jinkani jaurandru ngaiani morlalu ngundrai, a-ai, muntali ngaiani ngarana warai ja ngujamai, Naupini morlalu Christus, kanaia Kulkanipirna nganai.”

⁴³Ditji mandruni Nau nakandru puntina wonti ja Galilaiaia palkana wonti.

⁴⁴Ngangau Jesujeli muntali morlalu kurana wonti, Propheta ngaperalani mitani waka nganai.

⁴⁵Nau Galilaiani matja wokarana, Galilaialali nina patana wonti, ngangau tanali pratjana najina paraia, mina Nulu Jerusalemingu ditji pirnani ngankana paraia; ngangau bakana tana ditji pirnani wokarana wonti.

⁴⁶Jesus nakaldra Kana ngurani Galilaiani wokarana wonti, woderi Nulu ngapandru waina ngankana paraia.

⁴⁷Ja kapakapara kulno nganana wonti, nunkani ngatamura muntja parana wonti Kapernaum ngurani. Nulu matja ngarana, Jesus Judaiandru Galilaiaia wokaranani, nau nunkangu wapana wonti ja ngatjina wonti, Nau ngarinanto ngatamura nunkani tepi ngankala; ngangau nau ngara wordu parana wonti.

⁴⁸Ja Jesus nunkangu jatana wonti: “Jura wata malka ja pirnala najinani, jura wata morlalu ngundranani”