Johanningundru 3:5-24

⁵Jesujeli kalabana wonti: “Morlalu, morlalu, ngani jinkangu jatai: Warle wata marra dankanani ngapali ja Jaolali, nau ngandandarila nganai Godaia mililani wirila.

⁶Mina palkujeli dankai, palku nganai; ja mina Jaolali dankai, Jaola nganai.

⁷Wata ngaruparau, ngangau ngani jinkangu jatana warai: Jura marra dankananto.

⁸Watara ngakai woderi nau jertapateriai ja birungana nunkani jundru ngarai, windri jundru wata ngujamai, woderindru nauja wokarai ja woderi ngakai; jeruja pratjana, tana Jaolandru dankai.”

⁹Nikodemulu kalabana wonti ja nunkangu jatana wonti: “Worderu jenia pantjiai?”

¹⁰Jesujeli kalabana wonti ja nunkangu jatana wonti: “Jidni ngujangujara jinkinietja nganai Israelani, ja jenia jundru wata ngujamai?

¹¹Morlalu, morlalu, ngani jinkangu jatai: Ngaiani jatai mina ng-aiani ngujamai, ja kaukaubai mina ngaiani najinala, ja ngaianini tinkari ngankani jura wata patai.

¹²Ngani mitaia potundru jurangu jatanani, jura wata morlalu ngundranani; worderu morla jura wata morlalu ngundrala nganai, ngani pariwilpaia potundru jurangu jatanani?

¹³Ja wata kulno pariwilpaia tarala wapaia, windri Nauja pariwilpandru ngarinala, Kanaia Ngatamura, Nauja pariwilpani nganai.

¹⁴Ja worderu Mosili pitarani tjutju miri ngankana wonti, ieruja tanali Kanaia Ngatamura miri ngankananto.

¹⁵Ngangau pratjanali, nunkangu morlalu ngundranani, wata tintaterinanto, a-ai, tepi ngurali ngamalkananto.”

¹⁶Ngangau jeruja Godali mitaia ngantj ana wonti, Nulia Ngatamura Kunakulno nunkani jinkina wonti, ngangau pratjanali tana nunkangu morlalu ngundranani, wata tintaterinanto, a-ai, tepi ngurali ngamalkananto.

¹⁷Ngangau Godali Ngatamura nunkani wata mitani jinpana wonti kalala kurala, a-ai, Nulu mitaia kulkananto.

¹⁸Warlenulu ninaia morlalu ngundranani wata kalala maninani; ja warlenulu wata morlalu ngundranani kalala matja manina, ngangau nulu Godaia Ngatamuraia Kunakulnuja talani wata morlalu ngundrai.

¹⁹Naupini kalala nganai: Praitji mitani wokarana wonti, ja kanali ngalpuru morla ngantj ana wonti praitjani; ngangau ngankana tananani madlentji nganana wonti.

²⁰Ngangau warle madlentji ngankai, praitjani kalakalariai, ja wata praitjani wokarai, ngankana nunkani tinkari pantjiati.

²¹Warle morlalulali ngankanani, praitjani wokarala nganai, ngangau ngankana nunkani tinkari pantjinanto, ngangau tanali Godani ngankana warai.”

²²Ngadani Jesus ja mili nunkani Judaia mitani wokarana wonti; ja naka Nau ngamana wonti tanangunto ja multibana wonti.

²³Ja bakana Johannili multibana wonti Ainoni, Salimingu karakara, ngangau ngapa marapu naka nganana wonti; ja tana wokarana wonti ja multibanila manina wonti.

²⁴Ngangau jendranguta Johannes wata kanjangarini ngamana wonti.