Johanningundru 20:2-17

²Nani mindrina wonti ja Simon Petrungu, ja mili kulnuni, nina Jesujeli ngantjana wonti, wokarana wonti, ja pudlangu jatana wonti: “Tanali Kapara narikutundru manina warai, ja ngaiani ko, wodajeri tanali nina k urana warai.”

³Petrus ja mili kulno dunkana wonti ja narikutuni wokarana wonti.

⁴Pudla jela mindrina wonti, ja mili kulno ngopera nganingana wonti Petrungu, ja nau ngopera narikutuni wokarana wonti.

⁵Ja nulu buruna ngarina wonti, ja nulu kati paranani najina wonti, ja nau wata wirina wonti.

⁶Simon Petrus, nau nunkangu karipaterina, wokarana wonti, ja nau narikutuni wirina wonti ja najina wonti kati paranani,

⁷Ja kangukati, nina tanali nunkangu mangatandrani karala wiri, wata katini jela paranani, a-ai, nina pilki karana wonti piri kulnuni.

⁸Ngadani bakana mili kulno, nau ngopera narikutuni wokarana warai, wirina wonti, ja nulu najina wonti ja morlalu ngundrana wonti.

⁹Ngangau tanali jaura wata milkila nganana wonti, Nau narindru tepi terkakananto.

¹⁰Pudla mili nakaldra tikana wonti pungaia.

¹¹Maria narikutuni pankini palarani terkana wonti ja jindrana wonti. Nani jindranali narikutuni buruna ngarina wonti,

¹²Ja nandru angela mandru kati bulujeli ngamanani najina wonti, kulno mangatandrani ja kulno tidnani, woderi Jesu palku parana wonti.

¹³Ja pudla nankangu jatana wonti: “Widlajai, minandru jidni jindrai?” Nani pudlangu jatana wonti: “Ngangau tanali Kapara ngakani manina warai, ja ngani ko, wodajeri nina kurana warai.”

¹⁴Nani jenia matja jatana, nandru najina karitjina wonti, Jesus terkanani najina wonti; ja nani ko nganana wonti Nau Jesus nganai.

¹⁵Jesus nankangu jatana wonti: “Widlajai, minandru jidni jindrai? Worana jundru wontiai?” Nandru ngundrana wonti, Nau gardenngamalkanietja nganai, ja nunkangu jatana wonti: “Kaparajai, jundru nina padakana warai? Jatau ngakangu woderi jundru nina kurano warai, ja ngato nina manila nganai.”

¹⁶Jesus nankangu jatana wonti: “Mariajai!” Nani karitjina wonti ja nunkangu jatana wonti: “Rabbuni!” jenia wondrai Ngujangujara jinkinietja.

¹⁷Jesus nankangu jatana wonti: “Ngana wata patau! ngangau ngani wata tarana warai ngakani Ngaperaia. Wapau ngatatani ngakanani ja tanangu jatau: Ngani tarai ngakani Ngaperani ja jurani Ngaperani, ja ngakani Godani ja jurani Godani.”