Johanningundru 1:9-45

⁹Naupini praitji morlalu, Naupini kanani warupotuni mintjiai, mitani wokarananto.

¹⁰Naupini mitani nganana wonti, ja mita maru nunkangundru pantjina wonti, ja mita marujeli nina wata ngujamana wonti.

¹¹Nau wokarana wonti nunkanani, ja tanali nunkanali nina wata patana wonti.

¹²Worderuntjali nina patana wonti, tanangu Nulu ngurula jinkina wonti Godaia kupa pantjinanto, tanali talani nunkanani morlalu ngundranani.

¹³Tanapini wata kumarali, bakana wata palku jertapaterinali, bakana wata materi jertapaterinali, a-ai, Godandru dankana wonti.

¹⁴Ja jaura palku pantjina wonti, ja ngaianangunto ngamana wonti, ja ngaiana pirnala nunkani najina wonti, Ngaperi Kunakulnuja pirnalani jeribaka murlali ja morlalu manamiri.

¹⁵Johannili nunkangundru tinkari ngankana wonti, ja nau maritjina wonti ja jatana wonti: “Naupini Nau nganai, nunkangundru ngani jatana wonti: Nau ngakangu ngadani wokarala nganai ngakangu ngopera wapana wonti; ngangau Nau morla ngopera nganana wonti ngakangu.”

¹⁶Ja nunkani manamirindra ngaiana pratjanali manina wonti murla ja murla.

¹⁷Ngangau jirijiribani jaura Nulia Mosili jinkina wonti; murla ja morlalu Jesu Christiuigundru pantjina wonti.

¹⁸Wata kulnujeli Goda najina wonti; Ngatamura Kunakulnujeli, Nauja Ngaperaia ngalpani ngamai, Nulia ngaianangu kaukaubana wonti.

¹⁹Ja naupini Johannini tinkari ngankani nganai, matja Juda kanali Jerusalemingundru Priesta ja Levita jinpanala, tanali nina jakalkananto: “Worana jidni nganai?”

²⁰Ja nulu morlalu kurana wonti ja wata jedina wonti; ja nulu morlalu kurana wonti: “Wata ngani Christus nganai?”

²¹Ja tanali nina jakalkana wonti: “Worana jidni? Jidni Elias nganai?” Nau jatana wonti: “Wata ngani nau.” Jidni Propheta nganai? Ja nulu kalabana wonti: “Pani.”

²²Tana nunkangu jatana wonti: “Ja worana jidni nganai, ngaiani kalabani jaura tikalkananto tanangu, tanali ngaianina jinpana warai; mina jidni jatai jinkangundru?”

²³Nau jatana wonti: “Ngani karkanietjaia ngaiala pitarani nganai, Kaparaia palto talku ngankinganimai, worderu Propheta Jesaias jatana wonti.

²⁴Ja tana jinpani Pharisaiandru nganana wonti.

²⁵Ja tanali nina jekibana wonti ja nunkangu jatana wonti: “Minandru jundru multibai wata Christus ngananani ja wata Elias ja wata Propheta?”

²⁶Johannili kalabana wonti ja tanangu jatana wonti: “Ngato ngapali multibai, ja Nau jurangu terti terkai, nina jura wata ngujamai.

²⁷Naupini Nau nganai Nau ngakangu ngadani wokarala nganai, Nau ngakangu ngopera nganana, nunkangu ngani wata talku nganai tidnaputa jinka nunkani dukarala.”

²⁸Jenia Bethabarani pantjina wonti, Jordan kaiarani jerankari, woderi Johannili multibana wonti.

²⁹Ditjini kulnuni Johannili najina wonti Jesus nunkangu wokaranani, ja jatana wonti: “Najiau Godaia tjipi kuparu, Nuluwa kana warupotuja madlentji mandrala wapaia!”

³⁰Naupini nganai, nunkangundru ngani jatana wonti: “Ngakangu ngadani kana kulno wokarala nganai, Nau ngakangu ngopera wapana wonti; ngangau Nau morla ngopera nganana wonti ngakangu.”

³¹Ja ngato nina wata ngujamana wonti, a-ai, windri ngangau Juda kanali nina ngujamananto, jendrania ngani wokarana wonti ngapali multibala.

³²Ja Johannili tinkari ngankana wonti ja jatana wonti: “Ngato najina wonti Jaola pariwilpandru ngarinani mulapara jeribaka, ja Nauja nunkangu ngamana ngarina wonti.”

³³Ja ngato nina wata ngujamana wonti, a-ai, windri Naupini, Nulia ngana jinpana wonti ngapali multibala, ngakangu jatana wonti: “Worangu jundru najila nganai Jaola ngarinani ja nunkangu ngamanani, Naupini nganai, Nau Jaolali kulikirieli multibai.”

³⁴Ja ngato najina wonti ja tinkari ngankana wonti: Naupini Godaia Ngatamura nganai.

³⁵Tankubana ditjini Johannes nakaldra terkana wonti ja nunkani mili mandru.

³⁶Ja nulu Jesu palkanani najina wonti ja jatana wonti: “Najiau Godaia Tjipi kuparu!”

³⁷Ja mili mandrujeli nina matja ngarana jatanani, pudla Jesungu karipaterina wonti.

³⁸Jesus worakalina karitjina wonti ja najina wonti pudlana nunkangu karipaterinank Nau pudlangu jatana wonti: “Mina judla wontiai?” Pudla nunkangu jatana wonti: “Rabbi — jenia wondrai ngujangujara jinkinietja — woderi jidni ngamai?”

³⁹Nau pudlangu jatana wonti: “Kaperalumai ja najialumai!” Pudla wokarana wonti ja najina wonti, woderi Nau ngamanani; ja nunkangupini ditjini pudla nunkangunto ngamana wonti. Ja ditji kunarku nganana wonti.

⁴⁰Andreas, Simon Petruni ngatata, pudlangundru kulno nganana wonti, pudlali Johanningundru ngarana warai, ja nunkangu karipaterina warai.

⁴¹Nulupini ngopera Simon neji nunkani mankamankana wonti, ja nunkangu jatana wonti: “Ngali Messias mankamankana warai, jenia wondrai Christus.”

⁴²Nulu nina Jesungu wapalkana wonti. Jesujeli nina matja najina, jatana wonti: “Jidni Simon nganai, Jonani ngatamura; jundru Kephas tala ngamalkala nganai; jenia wondrai “Marda.”

⁴³Tankubana ditjini Jesujeli ngantjana wonti Galilaiaia palkala, ja Nulu Philippus mankamankana wonti ja nunkangu jatana wonti: “Ngakangu karipateriau!”

⁴⁴Philippus Bethsaidandru nganana wonti, Andreani ja Petruni ngurandru.

⁴⁵Philippula Nathanaeli mankamankana wonti ja nunkangu jatana wonti: “Ninaia, nunkangundru Mosili jirijiribani jaurani ja Prophetali dakana wonti, ninapini ngaiani mankamankana warai, Jesu Josephani ngatamura Nazaretandru.”