Johannes 7:34-49

³⁴Ämi oupwe küttaei, nge ousap künaei, pun ousap tongeni feila ewe ia üpwe nom ie.”

³⁵Iwe, ekewe nöüwisen chon Juta ra kapasfengen lefiler, “Ia i epwe feila ie, pwe äm aisap tongeni küna? Ifa usun, epwe feila lon ekewe telinimwen chon Krik, ia nöüch aramas ra toropasfeil ie o afalafala ekewe chon Krik?

³⁶Met wewen an apasa, ‘Oupwe küttaei, nge ousap künaei, ousap pwal tongeni feila ia üpwe nom ie?’”

³⁷Lesopolan ränin ewe chulap, iei ewe rän mi fokun aüchea, Jesus a ütä o apasa fän leüömong, “Iö a kaka epwe feito rei o ün!

³⁸Iö a lüküei usun ekewe Toropwe mi Pin ra apasa, chanpupun kolukun manau repwe puwu seni lelukan.”

³⁹Jesus a kapas won ei usun ewe Ngünmifel, chokewe mi lükü i repwe angei. Lon ena fansoun Kot esamwo tinato Ngünmifel, pun Jesus esamwo tolong lon lingan.

⁴⁰Iwe, ekoch ekewe aramas me lon ewe mwich ra rongorong än Jesus kapas o ra apasa, “Ei mwän i wesewesen ewe Soufos.”

⁴¹Nge ekoch ra apasa, “I ewe Kraist.” Nge pwal ekoch ra apasa, “Kraist esap feito seni Kalilea.

⁴²Ekewe Toropwe mi Pin ra apasa, pwe Kraist epwe eman mwirimwirin Tafit, epwe uputiu lon Petleem ewe telinimwen Tafit.”

⁴³Iei usun a fis tipefesen lon ewe mwich pokiten Jesus.

⁴⁴Ekoch ra mochen turufi i, nge esap wor eman a atapa.

⁴⁵Iwe, lupwen ekewe chon tümwünü imwenfel ra liwinsefäl, ekewe souasor mi lap me ekewe Farisi ra aisiniir, “Pwota ousap etekinato?”

⁴⁶Ra pölüeni, “Esap wor eman aramas a afalafal usun än ei mwän afalafal.”

⁴⁷Ekewe Farisi ra aisiniir, “Ifa usun, ei mwän a pwal atupukemi?

⁴⁸Ifa usun, a wor eman lein ekewe nöüwis ika ekewe Farisi a lükü i?

⁴⁹Ei mwichen aramas esap silei än Moses kewe Allük, iei mine ra nom fän än Kot anümamau.”