Johannes 6:56-70

⁵⁶Iö a mongö fitukei o ünümi chai a nonom loi, nge ngang üa nonom lon.

⁵⁷Ewe Sam mi manau a tinieito, o pokiten ewe Sam ngang üa pwal manau. Iei usun iö mi mongö fitukei epwe manau pokiten ngang.

⁵⁸Iei ewe mongö mi feitiu seni läng. Esap wewe ngeni ewe mongö ämi kewe lewo ra mongö, nge mürin ra mäla. Ätewe mi mongö ei mongö epwe manau tori feilfeilachök.”

⁵⁹Jesus a apasa ekei kapas lupwen a afalafal lon ewe imwen felikis lon Kapernaum.

⁶⁰Iwe, chomong lein nöün kewe chon kaiö ra rongorong ekei kapas o ra üra, “Ei afalafal a kon pöchökül. Iö a tongeni aüselinga?”

⁶¹Jesus esap rong seni eman mine ra kakapas won, nge a püsin silei pwe ra ngününgün usun an kewe kapas. Iei mine a üreniir, “Ifa usun, oua mochen likitala ämi lükülük ren ekei kapas?

⁶²Epwe ifa usun are oupwe küna Nöün Aramas lon an liwinsefälitä ngeni ewe leni ia a nom ie me mwan?

⁶³Ngünün Kot a afisätä manau, nge pöchökülen aramas esap fokun wor aüchean. Ekewe kapas üa fen ürenikemi ra eäni Ngün me manau.

⁶⁴Nge ekoch leimi resap lükü.” Pun Jesus a fen silei chök seni lepoputän iö kana resap lükü i, pwal ätewe epwe afangamä i.

⁶⁵Iwe, Jesus a sopwela le apasa, “Iei mine üpwe ürenikemi, pwe esap wor eman a tongeni feito rei, are ewe Sam esap atufichi.”

⁶⁶Iwe, seni ei fansoun chomong me lein nöün Jesus kewe chon kaiö ra kul seni o resap chüen mochen tapwela mürin.

⁶⁷Iei mine Jesus a aisini ekewe engol me ruoman chon kaiö, “Ifa usun, ämi ousap pwal mochen feila?”

⁶⁸Simon Petrus a üreni, “Äm Samol, iö aipwe feila ren? En ka eäni kapasen manau esemüch.

⁶⁹Äm aia lükü o silei pwe en Ewe mi Pin ka feito seni Kot.”

⁷⁰Iwe, Jesus a pölüeni, “Ifa usun, üsap filikemiitä engol me ruoman, nge fen eman leimi eman Tefil?”