Johannes 6:3-27

³Mürin Jesus me nöün kewe chon kaiö ra feitä won eu chuk o mottiu ikenan.

⁴Ei otun a arap fansoun ewe chulapen Pasofer än chon Juta.

⁵Iwe, Jesus a nenefetal o a küna pwe chomong aramas ra feito ren, iei mine a aisini Filip, “Ia sipwe tongeni kamö mongö me ie, pwe epwe naf ach sipwe amongöni ekei aramas meinisin?”

⁶Jesus a eäni ei kapas ais an epwe sotuni Filip, pun i a fen silei met epwe föri.

⁷Filip a pölüeni, “Ruopükü föün moni silifer esap naf ach sipwe kamö pilawa, pwe ina epwe chök ekis met eman me eman ekei aramas epwe angei.”

⁸Pwal eman nöün chon kaiö itan Andru, pwiin Simon Petrus, a üra,

⁹“A wor eman ät ikei mi wor ren limeföü pilawa seni föün parli me ruoman ik. Nge ifa usun, epwe naf ngeni ekei aramas meinisin?”

¹⁰Jesus a üra, “Oupwe üreni ekewe aramas pwe repwe mottiu.” A wor chomong fetil lon ewe leni, iei mine ekewe aramas meinisin ra mottiu. A wor ina epwe ükükün limungeröü mwän.

¹¹Mürin Jesus a angei ekewe pilawa, a iotekin kilisou ngeni Kot wor o a ineti ngeni ekewe aramas mi mot ikenan. Pwal ina chök usun mine a föri ngeni ekewe ik. Ir meinisin ra angei ükükün mine ra mochen.

¹²Iwe, lupwen ekewe aramas meinisin ra mötüla, Jesus a üreni nöün kewe chon kaiö, “Oupwe ionifengeni lusun ekewe mongö, pwe esap wor och epwe solapala.”

¹³Iei mine ra ionifengeni meinisin o amasoua engol me ruu chüük ren lusun ewe mongö seni ekewe limeföü pilawa seni föün parli ekewe aramas ra mongö.

¹⁴Iwe, lupwen ekewe aramas ra küna ewe manaman Jesus a föri, ra apasa, “Enlet, iei i ewe Soufos epwe feito won fanüfan.”

¹⁵Jesus a silei pwe ra ekiekin feito o seikätä fän pöchökül pwe epwe ar king, iei mine a sü seniir o liwinsefälitä won ewe chuk.

¹⁶Iwe, lupwen a tori lekuniol, nöün Jesus kewe chon kaiö ra feitiu ren ewe noom,

¹⁷ra tötä won efoch wa o seresila epek ewe noom pwe repwe sai ngeni Kapernaum. Iwe, a pwinila, nge Jesus esamwo feito rer.

¹⁸Nge mürin eu asepwäl mi pöchökül a enito, pwe nonoon ewe noom a wattela.

¹⁹Lupwen ekewe chon kaiö ra fen fötülei waar we ina epwe ükükün ülüngat ika rüanü mail, ra küna Jesus a fetalela won ewe matau o fetaleto arap ngeni waar we. Iwe, ra fokun rükö.

²⁰Nge Jesus a üreniir, “Ousap niuokus! Ngang ei!”

²¹Iwe, ra pwapwa pwe ra uwei Jesus won ewe wa, nge lon ewe chök otun ewe wa a tori ewe leni ia ra mochen sai ngeni ie.

²²Sorotän ewe rän ewe mwichen aramas mi nometiu epek ewe noom ra küna pwe a chök wor efoch wa a nom ikenan. Ra silei pwe Jesus esap tötä won ewe wa fiti nöün kewe chon kaiö, pwe ir chök ra sai.

²³Nge mi wor ekoch wa seni Tiperias ra il arap ngeni ewe leni ia ra mongö ewe pilawa ie mürin än ewe Samol iotekin kilisou won.

²⁴Iwe, lupwen ewe mwichen aramas ra küna pwe Jesus me nöün kewe chon kaiö resap nom ikenan, ra tötä won ekewe wa o saila Kapernaum, pwe repwe kütta Jesus.

²⁵Iwe, lupwen ekewe aramas ra küna Jesus me epek ewe noom, ra aisini, “Sense, inet ka feito ikei?”

²⁶Jesus a pölüeniir, “Enlet, üpwe wesewesen ürenikemi: Oua küttaei pokiten oua mongö ewe pilawa tori oua mötüla, nge ousap küttaei pokiten oua weweiti ai kewe manaman.

²⁷Ousap angang fän iten mongö mi tongeni ngauala, nge oupwe angang fän iten mongö mi nonomola tori manau esemüch. Iei ewe mongö Nöün Aramas epwe ngenikemi, pun Kot ewe Sam a fen anomu won asisilen an tipeeu ngeni.”