Johannes 6:29-51

²⁹Jesus a pölüeniir, “Kot a mochen pwe oupwe lükü ätewe i a tinato.”

³⁰Iei mine ra aisini, “Met sokun manaman kopwe föri pwe äm aipwe küna o lükuk? Met sokun föför kopwe föri?

³¹Äm kewe lewo ra mongö ewe mana lon ewe fanüapö, usun a mak lon ekewe Toropwe mi Pin, ‘A ngeniir ewe mongö seni läng pwe repwe mongö.’”

³²Mürin Jesus a üreniir, “Enlet, üpwe wesewesen ürenikemi: Esap Moses ewe mi ngenikemi ewe mongö seni läng, nge Semei i ewe mi ngenikemi ewe enletin mongö seni läng.

³³Pun ewe mongö Kot a ngenikemi ina i ätewe a feitiu seni läng o a fang manau ngeni chon fanüfan.”

³⁴Iwe, ra üreni, “Äm samol, kopwe ngenikem ei mongö fansoun meinisin.”

³⁵Mürin Jesus a üreniir, “Ngang ewe mongön manau. Iö a feito rei esap fokun chüen echik, nge iö a lüküei esap fokun chüen kaka.

³⁶Nge ngang üa ürenikemi pwe oua fen künaei, nge ousap mochen lüküei.

³⁷Chokewe meinisin Semei a ngeniei, repwe feito rei. Nge iö a feito rei, üsap fokun asüela.

³⁸Pun üa feitiu seni läng pwe üpwe föri letipen ewe mi tiniei, nge sap püsin letipei.

³⁹Iwe, iei letipen ewe mi tiniei, pwe esap pöüt seniei eman lein chokewe i a ngeniei, nge üpwe amanaueer lon ewe ränin sopolan.

⁴⁰Pun iei letipen Semei, pwe meinisin mi nenengeni ewe Nau o lükü i repwe eäni manau esemüch. Ngang üpwe amanaueer lon ewe ränin sopolan.”

⁴¹Pokiten ekei kapas ekewe chon Juta ra popuetä le ngününgünü Jesus, pun a apasa, “Ngang ewe mongön manau mi feitiu seni läng.”

⁴²Iwe, ra apasa, “Ifa usun, sap ätei Jesus nöün Josef we mwän? Sia silei saman me inan. Pwota a tongeni apasa pwe i a feitiu seni läng?”

⁴³Jesus a pölüeni, “Oupwe ükütiu le ngününgün lefilemi!

⁴⁴Esap wor eman a tongeni feito rei are ewe Sam mi tinieito esap panato rei. Iwe, üpwe amanaua lon ewe ränin sopolan.

⁴⁵A fen mak lon puken ekewe soufos, ‘Aramas meinisin repwe kaiö me ren Kot.’ Chokewe meinisin mi aüseling ngeni alon ewe Sam o kaiö seni repwe feito rei.

⁴⁶Üsap apasa pwe a wor eman a fen küna ewe Sam. Ätewe mi feito seni Kot, i chök ewe eman a küna ewe Sam.

⁴⁷Enlet, üpwe wesewesen ürenikemi: Iö a lüküei a eäni manau esemüch.

⁴⁸Ngang ewe mongön manau.

⁴⁹Ämi kewe lewo ra mongö ewe mana lon ewe fanüapö, nge ra mäla.

⁵⁰Nge iei ewe mongö mi feitiu seni läng, are eman a mongö seni esap mäla.

⁵¹Ngang ewe mongön manau mi feitiu seni läng. Are eman a mongö ei mongö epwe manau tori feilfeilachök. Iwe, ei mongö iei fitukei ngang üpwe fangala, pwe chon fanüfan repwe manau ren.”