Johannes 4:16-23

¹⁶Jesus a üreni ewe fefin, “Kopwe feila o köri pwülüom, iwe, epwe etuk lupwen kopwe liwinto.”

¹⁷Ewe fefin a pölüeni, “Esap wor pwülüei.” Nge Jesus a üreni, “Mi pwüng om apasa pwe esap wor pwülüom.

¹⁸Ka fen pwülüeni limman mwän, nge ewe eman ka pwülüeni iei esap wesewesen pwülüom. Ka kapas wenechar ngeniei.”

¹⁹Mürin ewe fefin a üreni, “Ai samol, iei üa silei pwe en eman soufos.

²⁰Äm kewe lewo ra fel ngeni Kot won ei chuk, nge ämi chon Juta oua apasa pwe Jerusalem ina chök ewe leni ia aramas repwe fel ngeni Kot ie.”

²¹Jesus a üreni, “Nemin, kopwe lüküei, epwe war ewe fansoun lupwen aramas resap chüen fel ngeni ewe Sam won ei chuk ika lon Jerusalem.

²²Ämi chon Samaria oua fel ngeni iö ousap silei, nge äm chon Juta aia fel ngeni iö aia silei, pun manau a pop seni chon Juta.

²³Nge epwe war eu fansoun, nge iei a fen nom, lupwen aramas repwe fel ngeni ewe Sam lon manamanen ewe Ngünün Kot me ewe let, pun ewe Sam a kütta chokewe mi fel ngeni lon let.