Johannes 2:2-19

²Pwal Jesus me nöün kewe chon kaiö ra kö pwe repwe eti ewe apwüpwülü.

³Iwe, lupwen a it ünümer wain, inen Jesus a üreni, “Esap chüen wor ünümer wain.”

⁴Nge Jesus a pölüeni, “Nemin, kosap üreniei mine üpwe föri. Esamwo tori ai fansoun.”

⁵Mürin inen Jesus a üreni ekewe chon angang, “Oupwe chök föri mine a ürenikemi.”

⁶Iwe, a wor än ekewe chon Juta allükün ar lamalam usun ar repwe limeti inisiir me mettochur lupwen repwe fel ngeni Kot. Iei mine a wor wonu lenien koluk lon ewe imw, masouen eu me eu ina epwe ükükün rüe ika ilik kalon.

⁷Iwe, Jesus a üreni ekewe chon angang, “Oupwe alölöü ekei lenien koluk ren koluk.” Iwe, ra alölöör tori ra urela.

⁸Mürin Jesus a üreniir, “Iei oupwe üfi och ena koluk o uweela ren ewe chon nemeni ewe kametip.” Iwe, lupwen ra uwala ren ewe koluk

⁹mi wiliti wain, ätewe a neni. I esap silei ia ei wain a feito me ie. (Nge ekewe chon angang mi üfi ewe koluk ra silei.) Iei mine ewe chon nemeni ewe kametip a köri ewe mwän apwüpwülü söfö

¹⁰o üreni, “Aramas meinisin ra akomwen uwawu ewe wain mi fokun mürina. Mürin än ekewe chon kökköto ünümi chomong, epwe uwawu ewe wain mi mökükün. Nge en ka amwöchü ewe wain mi fokun mürina tori iei.”

¹¹Iei aeuin manaman Jesus a föri lon Kana lon Kalilea, iwe, nöün kewe chon kaiö ra lükü i.

¹²Mürin ei, Jesus me inan we me pwiin kewe pwal nöün kewe chon kaiö ra feila Kapernaum. Ikenan ra nonom lon ekoch rän.

¹³Iwe, lupwen a arap fansoun än ekewe chon Juta chulapen Pasofer, Jesus a feila Jerusalem.

¹⁴A tolong lon ewe imwenfel o a küna ekewe mwän mi amömö kow, sip me lisom, pwal ätekewe mi mot ngeni chepel o akasiwili moni.

¹⁵Iei mine a piti efoch säl o aea le cheela ekewe sip me ekewe kow meinisin seni lon ewe imwenfel. A atoropasa ekewe föün moni o akulätä ekewe chepel än ekewe chon akasiwili moni.

¹⁶Iwe, a kapas pöchökül ngeni ekewe mwän mi amömö ekewe lisom, “Oupwe uwawu ekei mettoch seni ikei. Oupwe ükütiu le föri pwe imwen Semei epwe eu imwen amömö.”

¹⁷Iwe, nöün kewe chon kaiö ra chechemeni pwe a mak lon ekewe Toropwe mi Pin, “Ai Kot, ai ekipwichi imwom mi pin a küküri le üti usun eu ekkei.”

¹⁸Mürin ekewe nöüwisen chon Juta ra üreni, “Meni sokun manaman ka tongeni föri om kopwe pwäri ngenikem pwe mi wor om pwüüng pwe kopwe föri ekei föför?”

¹⁹Jesus a pölüeniir, “Oupwe ataela ei imwenfel, nge ngang üpwe aüsefälietä lon ükükün ülüngat rän.”