Johannes 20:3-25

³Mürin Petrus me ewe eman chon kaiö ra feila ren ewe peias.

⁴Ir me ruoman ra sä, nge ewe eman chon kaiö a müttir seni Petrus, pwe a akomwen tori ewe peias.

⁵A pworotiu o nelong lon o küna ekewe mangaku mi pwechepwech lon ewe peias, nge esap tolong lon.

⁶Iwe, Simon Petrus a säto mürin o tolong lon ewe peias. A küna ekewe mangaku mi pwechepwech ikenan,

⁷pwal ewe mangaku mi finifin ngeni möküren Jesus. Nge ei mangaku ese nomofengen me ekewe mangaku mi pwechepwech, pwe a numufengen won an.

⁸Mürin ewe eman chon kaiö mi akomwen tori ewe peias a pwal tolong lon. Iwe, a küna ekewe mangaku o lükü, pwe Jesus a manausefäl.

⁹(Resap mwo weweiti mine a mak lon ekewe Toropwe mi Pin, pwe Jesus epwe fokun manausefäl seni mäla.)

¹⁰Mürin ekewe chon kaiö ra liwinsefäliti lenier.

¹¹Nge Maria a ükütä ünükün ewe peias o a kekechü. Lupwen a chüen kekechü a pworotiu o nenelong lon ewe peias.

¹²Iwe, a küna ruoman chon läng mi üföüf üf mi pwechepwech, ra mot ewe ia somän Jesus a nom ie me mwan, eman a mot ünümöküran, nge eman a mot ünüpechen.

¹³Iwe, ra aisini Maria, “Nemin, pwota ka kechü.” A pölüeni, “Pun ra angeala somän ai Samol, nge üsap silei ia ra anomu ie!”

¹⁴Mürin a kul o küna Jesus pwe a ütä ikenan. Nge esap silei pwe i Jesus.

¹⁵Iwe, Jesus a aisini, “Nemin, pwota ka kechü? Iö na ka kükütta?” Nge Maria a ekieki pwe i eman chon tanipi, iei mine a üreni, “Ai samol, are en ka angeala somän Jesus, kose mochen üreniei ia ka anomu ie, pwe üpwe feila o angei.”

¹⁶Iwe, Jesus a föüni iten neminewe o apasa, “Maria!” Mürin Maria a kul ngeni o apasa lon kapasen Ipru, “Rapponi!” (Wewen “Sense”)

¹⁷Jesus a üreni, “Kosap atapaei, pun üsamwo feitä ren Semei. Nge kopwe feila ren pwii kewe o üreniir, pwe üpwe feitä ren Semei pwal Semer, ren ai Kot pwal ar Kot.”

¹⁸Iei mine Maria Maktalene a feila o üreni ekewe chon kaiö, “Üa küna ewe Samol!” A pwal apworausa ngeniir usun mine a eäni kapas ngeni.

¹⁹Iwe, lekuniolun ewe chök ränin, lon ewe aeuin ränin wiik, ekewe chon kaiö ra mwichfengen lon eu imw, nge ra lokeela asaman kewe, pun ra niuokusiti ekewe nöüwisen chon Juta. Mürin Jesus a feito, a ütä lefiler o üreniir, “Kinamwe epwe torikemi.”

²⁰Mürin an apasatä ekei kapas, a pwäri ngeniir pöün kewe me lepekin. Iwe, ekewe chon kaiö ra fokun pwapwa, pun ra küna ar we Samol.

²¹Iwe, Jesus a kapassefäl ngeniir, “Kinamwe epwe torikemi! Usun Semei a tiniei, iei usun ngang üa tinikemi.”

²²Mürin än Jesus apasa ei, a ngasetiu wor o üreniir, “Oupwe angei ewe Ngünmifel.

²³Are ämi oua amusala än eman tipis, epwe musala. Nge are ämi ousap amusala än eman tipis, esap musala.”

²⁴Iwe, Tomas a pwal iteni Lippwe, eman lein ekewe engol me ruoman chon kaiö, esap nom rer lupwen Jesus a wareitiir.

²⁵Iei mine chiechian kewe chon kaiö ra asile ngeni, “Äm aia küna ach Samol!” Nge Tomas a pölüeniir, “Are üsap küna ekewe lemon chüföl lon pöün o tikilong lon, are üsap pwal iseis pei won kinasen lepekin, üsap fokun lükülük.”