Johannes 19:25-37

²⁵Nge ünükün ewe iräpengesin Jesus ra ütä inan we, pwiin inan we, Maria pwülüen Klopas me Maria Maktalene.

²⁶Lupwen Jesus a küna inan we me ewe chon kaiö i a echeni mi ütä ikenan, a üreni inan we, “Nengeni, ätenan noumw.”

²⁷Mürin a üreni ewe chon kaiö, “Nengeni, iei i inom.” Iwe, seni lon ena otun ewe chon kaiö a angei Maria pwe epwe nom ren lon imwan.

²⁸Mürin Jesus a silei, pwe iei an angang meinisin a wesöchüla. Iwe, fän iten an epwe pwönüetä mine a mak lon ekewe Toropwe mi Pin, Jesus a apasa, “Üa kaka.”

²⁹Mi wor eu rume mi ur ren wain mi mwal ikenan. Ra atukalong eu farawa lon o pachetä lesopun efoch mwüch seni ewe irä isop o pöüätä ngeni awen Jesus.

³⁰Lupwen Jesus a wes me ün ewe wain, a apasa, “A wesila!” Mürin a rotiu o mäla.

³¹Mürin ekewe nöüwisen chon Juta ra tüngorei Pilatus pwe epwe mwütätä, pwe repwe kupi pechen ekewe mwän mi iräpenges, repwe pwal angeatiu inisiir seni won ekewe iräpenges. Ra tüngor won ei, pun ei rän eu ränin amol, nge ir resap mochen pwe inisin ekewe aramas repwe nom won ekewe iräpenges lon ewe ränin sapat, pun ei ränin sapat eu rän mi fokun pin.

³²Iei mine ekewe sounfiu ra feila o kupi pechen ewe aemanün me aruomanün mwän ra iräpenges me Jesus.

³³Nge lupwen ar feiliti Jesus, ra küna pwe a fen mäla, iei mine resap chüen kupi pechen.

³⁴Nge eman ekewe sounfiu a angei wokun siles o posu ngeni lepekin Jesus. Iwe, lon chök ewe otun cha me koluk ra puwu seni.

³⁵Ewe eman mi küna fisitän ei mettoch a pwärätä usun, pwe ämi oupwe pwal lükü. An kapasen pwärätä a let, a silei pwe mine a apasa a let.

³⁶Ekei mettoch ra fis pwe epwe pwönüetä mine a mak lon ekewe Toropwe mi Pin: “Esap wor efoch chün epwe kup.”

³⁷Mi pwal wor eu fos a mak lon ekewe Toropwe mi Pin, “Aramas repwe nenengeni ätewe ra posu.”