Johane 8:41-57

⁴¹Ŋoŋe ine ŋaŋacne maŋte hata âteeŋgopieŋ.” Eme jaŋe mumbiŋ, “Nâŋe fiuckonec mi fuambeŋ, Anutu e Mamac‐nâŋec mocjaha.”

⁴²Mupie Jesuzi ʒiŋuc jazawec: “Mamac‐ŋeŋic Anutu eme muzac, no âgo enarenʒapiŋ. No Anuturaonec hâcne wahapo, no nahacne maŋte mi wahapo, eki sorecnume wahapo.

⁴³Weniŋuc erâ jupie dâŋnanezi maŋŋeŋicko mi huekac? No dâŋ mupe ŋoŋe hazec afec mi manaeŋgopieŋ irec hâcne.

⁴⁴Ŋoŋe mamac‐ŋeŋic Sataŋ, eme ere qafeŋko wiac eeŋgopieŋ. E mârâc jaha ŋic sisipiric juweczi juwareekac. E dâŋ fâri qizecne râpeckewecte maŋticnao jâmbomac dâŋ moc mi fokac. E bureczi nânâ opâ‐ticne ewec. E burecŋic â burecte mamac.

⁴⁵No ine dâŋ fâri qizecne ŋazaekopacte dâŋnane qikiŋneeŋgopieŋ.

⁴⁶Ŋoŋeraonec moczi sâcne nore bahac moc muocmu? Eme no sâc iŋucnezi dâŋ fâri qizecne ŋazape wemocte mi mana ʒakieeŋgopieŋ?

⁴⁷Moc e Anuture biŋe juocmuzi dâŋticne manaocmu. Ŋoŋe Anuture biŋe mi jueŋgopieŋte dâŋticne qikiŋneeŋgopieŋ.”

⁴⁸Mume Judaŋic jaŋe dâŋ ʒiŋuc bâtikiecnembiŋ: “Wiac wemo mueŋgopeneŋ, go Samaria ŋic, go demoŋzi egareekac.”

⁴⁹Eme Jesuzi ʒiŋuc jazawec: “No demoŋzi mi enareekac, no Mamac‐nane sâseekopac, ŋoŋe ine no ba jawa enareeŋgopieŋ.

⁵⁰No ʒâŋe biŋe‐nanere manabâc erâ mi ŋazakopac. Ʒâŋe biŋe‐nane hewirickerâ irec dâŋne mumu ine mocte gie.

⁵¹No jâmbomac jâmbâŋ ŋazape mananiŋ: Moc e nore dâŋ bajuocmuzi hâmoc moc mi maicke‐jâmbâŋkeocmu.”

⁵²Iŋuc mume Judaŋic jaŋe kecʒiŋuc mumbiŋ: “Demoŋzi egareekac, i jâmbomac. Abraham hâmowec, â porofete jaŋe iŋuc jaha hâmombiŋ, ehame go ʒiŋuc mukic: ‘Moc e nore dâŋ bajuocmuzi hâmoc moc mi maickeocmu.’

⁵³Mamac‐nâŋec Abraham e sâkozi hâmowec, eme go ere sâc jâuruzo mukomec? Â porofete jaŋe iŋuc jaha wâc hâmombiŋ. Go wemocte sahacge boc bafekomec?”

⁵⁴Mupie Jesuzi ʒiŋuc jazawec: “No nahac sahac‐nane bafepe mi sâckeocmu. Mamac‐nane jukac, e Anutu‐nâŋec mucneeŋgopieŋ, eki ine muafecnuekac.

⁵⁵Ŋoŋe e mi mana taraeŋgopieŋ, no ine mana taraekopac. Irec no weniŋuc mi mana tarakopac mupemu. I mupe burec eme ŋoŋere sâc ezapo. Aricne, no mana tarahuc dâŋticne bajuekopac.

⁵⁶Mamac‐ŋeŋic Abraham e nore ʒâfo maickeme honeocte aŋac sâko bajuwec. Erâ juku maickeme honerâ ʒeri ewec.”

⁵⁷Iŋuc mume Judaŋic jaŋe mumbiŋ, “Go jarage 50 mi bazumeŋzi Abraham honemeŋ me?”