Johane 8:35-45

³⁵Kiŋaŋ qaqazi bomboŋ‐ticnere fic haeoa hati mi jurâ ju eocmu, ŋokâzi ine mamac‐ticnere fic haeo hati juraʒihuc juocmu.

³⁶Irec Ŋokâ eki firuec‐ŋopame ŋoŋe jâmbomac niŋgiŋ tâmiric juniŋmu.

³⁷“Ŋoŋe Abrahamte ɋâricfâc, i noni manakopac. Eme ŋoŋe ine dâŋnanezi ŋoŋerao hesowariekacte qâhâmocnuzo muŋgopieŋ.

³⁸No Mamac‐nanerao wiac honehuc jupo irec hâcne muekopac, â ŋoŋe ine ŋaŋacne mamactaonec wiac manambiŋ i eeŋgopieŋ.”

³⁹Mume ʒiŋuc âzâcnembiŋ: “Nâŋe mamac‐nâŋec Abraham.” Eme Jesuzi ʒiŋuc jazawec: “Ŋoŋe Abrahamte ɋâricfâc jurâ muzac e hawari enʒapiŋ.

⁴⁰Anuturao dâŋ fâri qizecne manapo i ŋazaekopac, ehame ŋoŋe nuzo muŋgopieŋ. Wiac iŋucne Abrahamzi mi ewec.

⁴¹Ŋoŋe ine ŋaŋacne maŋte hata âteeŋgopieŋ.” Eme jaŋe mumbiŋ, “Nâŋe fiuckonec mi fuambeŋ, Anutu e Mamac‐nâŋec mocjaha.”

⁴²Mupie Jesuzi ʒiŋuc jazawec: “Mamac‐ŋeŋic Anutu eme muzac, no âgo enarenʒapiŋ. No Anuturaonec hâcne wahapo, no nahacne maŋte mi wahapo, eki sorecnume wahapo.

⁴³Weniŋuc erâ jupie dâŋnanezi maŋŋeŋicko mi huekac? No dâŋ mupe ŋoŋe hazec afec mi manaeŋgopieŋ irec hâcne.

⁴⁴Ŋoŋe mamac‐ŋeŋic Sataŋ, eme ere qafeŋko wiac eeŋgopieŋ. E mârâc jaha ŋic sisipiric juweczi juwareekac. E dâŋ fâri qizecne râpeckewecte maŋticnao jâmbomac dâŋ moc mi fokac. E bureczi nânâ opâ‐ticne ewec. E burecŋic â burecte mamac.

⁴⁵No ine dâŋ fâri qizecne ŋazaekopacte dâŋnane qikiŋneeŋgopieŋ.