Johane 8:27-38

²⁷Mamac‐ticnere iŋuc jazame jaŋe mi mana tarambiŋ.

²⁸Irec Jesuzi ʒuhuckerâ ʒiŋuc jazawec: “Ŋoŋe Ŋic Fâri Wâtuŋne bâfeŋnerâ fuŋne‐ticne mana taraniŋmu. Erâ no nahacne maŋte wiac mi eekopac, Mamaczi qazu‐narewec dâŋ ijaha muekopac, i wâc mana taraniŋmu.

²⁹Sorecnuwec e nohec juekac. No dameŋ sâc wiac epe bape maname biaŋkeekacte no mi behecnuekac.”

³⁰Dâŋ iŋuc mume ŋic bocjahazi manasiŋkembiŋ.

³¹Eme e manasiŋkembiŋ Judaŋic jaŋe hâcne ʒiŋuc jazawec: “Ŋoŋe nore dâŋko juhuc ine motec fuŋfuŋfâc‐nane eniŋmu.

³²Eme nore dâŋ fâri qizecne mana tarapie izi batarac‐ŋopame niŋgiŋ tâmiric sâcne erâ juniŋmu.”

³³Mume dâŋ ʒiŋuc bâtikiecnembiŋ: “Nâŋe Abrahamte ɋâricfâc, mozi mo kiŋaŋ qaqafâc‐ticne bacnâporâ niŋgiŋ‐nâpowecte go ʒiŋuc mukomec: ‘Niŋgiŋ tâmiric eniŋmu’?”

³⁴Eme Jesuzi ʒiŋuc jazawec: “No jâmbomac jâmbâŋ ŋazakopac, moc e sâqocne baocmuzi sâqocnere kiŋaŋ qaqa eocmu.

³⁵Kiŋaŋ qaqazi bomboŋ‐ticnere fic haeoa hati mi jurâ ju eocmu, ŋokâzi ine mamac‐ticnere fic haeo hati juraʒihuc juocmu.

³⁶Irec Ŋokâ eki firuec‐ŋopame ŋoŋe jâmbomac niŋgiŋ tâmiric juniŋmu.

³⁷“Ŋoŋe Abrahamte ɋâricfâc, i noni manakopac. Eme ŋoŋe ine dâŋnanezi ŋoŋerao hesowariekacte qâhâmocnuzo muŋgopieŋ.

³⁸No Mamac‐nanerao wiac honehuc jupo irec hâcne muekopac, â ŋoŋe ine ŋaŋacne mamactaonec wiac manambiŋ i eeŋgopieŋ.”