Johane 8:2-23

²Hae fureme irecnec risierâ taha ufuŋko feme ŋic jaŋe erao mâretec tumaŋnembiŋ. Eme ira ŋehuc miti jaza qazuc ewec.

³Ehame miti qaqazu â farisaio ŋic jaŋe ŋokac moc boe sau ehuc juhame bâfuakicne e Jesurao bararâ

⁴mumbiŋ, “Qaqazu, ŋokac kecʒi boe sau ehuc juhame bâfuakicne.

⁵Eme Mose e ŋokac iŋucne qânâzi hehâmoc‐jopazore sâcmutâc dâŋko munârewec. Gahac ine weniŋuc mukic?”

⁶I mâc esâickepie dâŋ iŋuc me iŋuc mume dâŋko râeniŋte fecnehuc mumbiŋ. Mupie Jesu e daperâ mâreŋko mezi qâreŋkewec.

⁷Qâreŋkehame wiocnerâ wiocne epie qâhâŋnerâ ʒiŋuc jazawec: “Ŋoŋeraonec moc bahac tâmiric juekaczi fuŋkerâ qânâzi heme henʒepieŋ.”

⁸Iŋuc murâ mocwâc daperâ mâreŋko qâreŋkewec.

⁹Ehame jaŋe dâŋticne manarâ micnezi bânieme moc moc raku rafârembiŋ. Eme ŋokac e Jesure maŋfuŋko buc domame,

¹⁰Jesuzi qâhâŋnerâ wiocnerâ muwec: “Ŋokac, jaŋe wena? Moczi moc okacnere dâŋ mi mugarejec me?”

¹¹Eme ŋokazi muwec, “Wofuŋ, aricne.” Mume muwec, “Eme noni iŋuc jaha okacnere dâŋ mi mugarepemu. Go mâc ra juhuc sâqocne mocwâc mi bazemec.”

¹²Eme Jesuzi ŋic dâŋ moc ʒiŋuc ʒuhuckerâ jazawec: “No mâreŋ sâc ŋic ŋoŋere ʒoctamac. Eme moc e no bâjâpecnuocmuzi dapâcko mi rahuc juocmu. E jujure tatamac focnehame juocmu.”

¹³Iŋuc mume farisaio ŋic jaŋe ʒiŋuc âzâcnembiŋ: “Ʒi go gahac fuŋnege mutaniŋkekomec, i manapene fârine mi ekac.”

¹⁴Mupie Jesuzi ʒiŋuc jazawec: “No nahac fuŋne‐nane mutaniŋkepe irec fârimâc mi eekac. No wenirec warepo â wena rapemu irec fuŋne manahuc dâŋ muekopac. Ŋoŋe ine irec â irec mâmâc kâuc baeŋgopieŋ.

¹⁵Ŋoŋe fuŋne riritu gie baeŋgopieŋ i sasahac eekac. No ine fuŋne riritu gie mi baekopac.

¹⁶Me fuŋne riritu gie bapemuo ine fârinehec eocmu. No fuŋne riritu gie buc bapane mi fokac. Mamac sorecnuwec eki baficnume bapane fokac.

¹⁷Eme sâcmutâc dâŋŋeŋicko kecʒiŋuc fokac: ‘Ŋic jajaheczi mocte fuŋne ritupire fârine muzo.’

¹⁸Eme no fuŋne‐nane mutaniŋkehape Mamac sorecnuwec eki iŋuc jaha mutaniŋkeekac.”

¹⁹Dâŋ iŋuc jazame wiocnerâ mumbiŋ, “Mamacge wena?” Eme ʒiŋuc jazawec: “Ŋoŋe no mi mana taracnuhuc Mamac‐nane iŋuc jaha mi mana taraeŋgopieŋ, no mana taracnurâ muzac, Mamac‐nane iŋuc jaha mana taranʒapiŋ.”

²⁰Jesu e ufuŋko taha katapa ŋewec maŋne ira miti jaza qazuc ehuc dâŋ i muwec. Eme dameŋ‐ticne mi maickewecte wemocko afeckerâ kâpâcwâru banʒapiŋ.

²¹Eme Jesu e harierâ ʒiŋuc jazawec: “No behec‐ŋopa rape ŋoŋe basacnurâ sâqocne‐ŋeŋichec juku hâmoniŋmu. No ra jupemu ira wemocko fâniŋmu.”

²²Iŋuc mume Judaŋic jaŋe mumbiŋ, “‘No ra jupemu ira wemocko fâniŋmu’, iŋuc wemocte mukac? Sahac‐ticne qarâ hâmoocte mukac me weniŋuc?”

²³Eme Jesuzi ʒiŋuc jazawec: “Ŋoŋe juwickonec, no faickonec, ŋoŋe mâreŋkonec, no mâreŋkonec mâcne.