Johane 7:5-41

⁵Ɋafâc‐ticne jaŋe e mi manasiŋkehuc iŋuc mumbiŋ.

⁶Mupie Jesuzi ʒiŋuc jazawec: “Ŋoŋe dameŋ kosao wiac ezo murâ sâcne eniŋmu, no ine dameŋ‐nane mi maickekac.

⁷Ŋic jaŋe ŋoŋe wemocko qaisoc‐ŋopaniŋmu, no ine juju bapa‐jeŋic sâqocne i mutaniŋkepe qaisocnueŋgopieŋ.

⁸Ŋoŋe hombaŋko raniŋ, no ine dameŋ‐nane mi maickekacte ʒiŋuczia mi rapemu.”

⁹Iŋuc murâ Galilaia mâreŋkoa juwec.

¹⁰Eme jaŋe bânierâ rahapie e ʒâhecko buc kamierâ rawec.

¹¹Eme hombaŋ maickeme Judaŋic micne jaŋe basarâ wiwioc erâ mumbiŋ, “E wena jukac?”

¹²Â ŋic omane sâko jaŋe ere dâŋ bocjaha mufembiŋ. Ehuc gâcnezi mumbiŋ, “E ŋic biaŋne,” â gâcnezi qatararâ mumbiŋ, “Aricne, e ŋic maŋ bâsifuc ejareekac.”

¹³Erâ Judaŋic micne jaŋere hâwic‐jopame dâŋ tâtâcko mi mumbiŋ.

¹⁴Eme hombaŋ ʒâʒâŋiŋko Jesu e taha ufuŋko ferâ miti jaza qazuc ewec.

¹⁵Miti mume Judaŋic micne jaŋe wareckerâ ʒiŋuc mumbiŋ: “E nâŋâcne mamana ficko mi juweczi weniŋuc erâ mitire fuŋne manaekac?”

¹⁶Mupie Jesuzi ʒiŋuc jazawec: “No mitire fuŋne qazu‐ŋareekopac i no nahacne mâcne, i sorecnuwec ere.

¹⁷Eme mitire fuŋne kecʒi i Anuturaonec me no nahacnaonec, i Anutu micne reŋkehuc mana tarazo.

¹⁸Moc e jahacnaonec manasurâ muocmu, e sahac mumuteŋte hata âteocmu, â moc e gie runere mumuteŋ fuaocte gie baocmu, ere ine sahac fefe tâmiric siocmâc jukac muzo.

¹⁹Mose e sâcmutâc dâŋ mufua‐ŋarewec. Â ŋoŋeraonec moczi moc mi reŋkeekac. Eme ŋoŋe wemo wiacte nuzo muŋgopieŋ?”

²⁰Mume ŋic omane sâko jaŋe mumbiŋ, “Go demoŋzi maŋge bâsifuckekac. Mozi guzo mukac?”

²¹Eme Jesuzi jazawec, “No mâsi mocjaha bapo irec erâ mu warec boc eeŋgopieŋ.

²²Mupe mananiŋ: Mosezi motecfâc‐ŋeŋic sahac‐jeŋicko ma baniŋte muŋarewec. Erâ i Mosezi mi fuŋkewec, mimiŋne jaŋe fuŋkembiŋ. Eme gie i bapane maickeme sabata hombaŋko wâc baeŋgopieŋ.

²³Ine hâcne Mosere sâcmutâc dâŋ huckepie fârimâc ezacte hombaŋko motecfâc‐ŋeŋic sahac tofa‐jeŋicko gie i baeŋgopieŋ, â no ine ŋicpuriŋ sahac‐ticne furu jaha hombaŋko bâpiaŋkepo, irec wemocte mana gâpâre‐nareŋgopieŋ?

²⁴Ŋoŋe dâŋ onʒoŋ jaha sahacne mi muniŋ, mana wosâehuc dâŋ fârine munʒapiŋ me!”

²⁵Eme Jerusalem hae rune jaŋe ʒiŋuc mumbiŋ: “Ŋic qazo mueŋgopieŋ ine hâcne ʒi.

²⁶Hâc, e weniŋuc erâ dâŋ tâtâcko mume micnefâc‐nâŋec jaŋe mi qataracneŋgopieŋ? Me jaŋe fuŋne‐ticne mana tarahuc manacnepie Kristo ekac mecne?

²⁷Erâ iŋuc wâc mâcne mecne. E fufua‐ticnere fuŋne manaŋgopeneŋ. Kristo wareocmu ine ere fuŋne kâuc bafârenaŋmu.”

²⁸Jesu e taha ufuŋko miti qazu‐jarehuc domahame iŋuc mupie hahaŋne bahuc muwec, “Oi ŋoŋe, mana taracnurâ fufua‐nanere fuŋne manaeŋgopieŋ, ŋoŋe hâcne. Wahapo i no nahacne maŋte mi wahapo, jâmbomac rune moc jukac eki sorecnume wahapo. Ŋoŋe e kâuc baŋgopieŋ.

²⁹No ine e jahacne bufuŋkonec sorecnume wahapore e mana tarakopac.”

³⁰Iŋuc mume kâpâcwâru baniŋte mumbiŋ. Erâ dameŋ‐ticne mi maickewecte mejeŋic mâckeme behembiŋ.

³¹Ehame ŋic omane jaŋeraonec bocjahazi fuŋkerâ Jesu manasiŋkembiŋ. Ehuc ʒiŋuc mumbiŋ: “Kristo fisiocmu, e ŋic ʒizi mâsi baekac i sirickehuc baocmu me? Aricne, e bafâreekac.”

³²Ŋic jaŋe dâŋ iŋucne kamierâ mupie farisaio jaŋe manarâ taha bapa micne jaŋehec nazaŋ gazaŋ erâ momori jaŋe Jesu kâpâcwâru baniŋte sorec‐jopapie rambiŋ.

³³Eme Jesuzi ŋic ʒiŋuc jazawec: “No dameŋ bembeŋne sawa ŋoŋehec jurâ sorecnuwec erao risiepemu.

³⁴Eme ŋoŋe no basacnu‐bipiehuc mi bâfuacnuniŋmu. Ra jupemu ira wemocko fâniŋmu.”

³⁵Iŋuc mume Judaŋic jaŋe ʒiŋuc muhuc nazaŋ gazaŋ embiŋ: “E wena rame basa‐bipienaŋte mukac? Judaŋic âgofâc‐nâŋec Grik mâreŋko juraŋgopieŋ jaŋerao raocte mukac, ehuc Grik miti jazaocte manasuhuc mukac?

³⁶Basacnu‐bipiehuc mi bâfuacnuniŋmu, â rapemu ira sâcne mi fâniŋmu, dâŋ iŋucne weniŋucte mukac?”

³⁷Judaŋic jaŋe hombaŋ botâŋne ŋetaraniŋte tutumaŋ sâko ehuc ŋehapie Jesuzi faharerâ domahuc dâŋ wiwic jaha ʒiŋuc muwec: “Moc e opâre hâmokacko norao warerâ nâzejec.

³⁸Â moc e manasiŋnuhuc juocmu ere bumaŋkonec opâ sâro fifisine wahahuc domaocmu. Miti papiao dâŋ iŋuc hâcne qâreŋkekicne.”

³⁹Jesu manasiŋkembiŋ jaŋe Mâro biŋe qajarehuc iŋuc muwec. Jesu e dameŋ ira sambâŋ eri tatamac‐ticnere maŋnao mi risie fewecte Mâro mi wahawec.

⁴⁰Ŋic jaŋe dâŋ i manarâ Jesure ʒiŋuc mumbiŋ: “E jâmbomac porofete sâko‐nâŋec.”

⁴¹Â gâcnezi mumbiŋ, “E Kristo jâmbâŋ.” Mupie tucnezi qatararâ mumbiŋ, “Wiac Kristo e wemocko Galilaia mâreŋkonec fuaocmu.