Johane 7:30-51

³⁰Iŋuc mume kâpâcwâru baniŋte mumbiŋ. Erâ dameŋ‐ticne mi maickewecte mejeŋic mâckeme behembiŋ.

³¹Ehame ŋic omane jaŋeraonec bocjahazi fuŋkerâ Jesu manasiŋkembiŋ. Ehuc ʒiŋuc mumbiŋ: “Kristo fisiocmu, e ŋic ʒizi mâsi baekac i sirickehuc baocmu me? Aricne, e bafâreekac.”

³²Ŋic jaŋe dâŋ iŋucne kamierâ mupie farisaio jaŋe manarâ taha bapa micne jaŋehec nazaŋ gazaŋ erâ momori jaŋe Jesu kâpâcwâru baniŋte sorec‐jopapie rambiŋ.

³³Eme Jesuzi ŋic ʒiŋuc jazawec: “No dameŋ bembeŋne sawa ŋoŋehec jurâ sorecnuwec erao risiepemu.

³⁴Eme ŋoŋe no basacnu‐bipiehuc mi bâfuacnuniŋmu. Ra jupemu ira wemocko fâniŋmu.”

³⁵Iŋuc mume Judaŋic jaŋe ʒiŋuc muhuc nazaŋ gazaŋ embiŋ: “E wena rame basa‐bipienaŋte mukac? Judaŋic âgofâc‐nâŋec Grik mâreŋko juraŋgopieŋ jaŋerao raocte mukac, ehuc Grik miti jazaocte manasuhuc mukac?

³⁶Basacnu‐bipiehuc mi bâfuacnuniŋmu, â rapemu ira sâcne mi fâniŋmu, dâŋ iŋucne weniŋucte mukac?”

³⁷Judaŋic jaŋe hombaŋ botâŋne ŋetaraniŋte tutumaŋ sâko ehuc ŋehapie Jesuzi faharerâ domahuc dâŋ wiwic jaha ʒiŋuc muwec: “Moc e opâre hâmokacko norao warerâ nâzejec.

³⁸Â moc e manasiŋnuhuc juocmu ere bumaŋkonec opâ sâro fifisine wahahuc domaocmu. Miti papiao dâŋ iŋuc hâcne qâreŋkekicne.”

³⁹Jesu manasiŋkembiŋ jaŋe Mâro biŋe qajarehuc iŋuc muwec. Jesu e dameŋ ira sambâŋ eri tatamac‐ticnere maŋnao mi risie fewecte Mâro mi wahawec.

⁴⁰Ŋic jaŋe dâŋ i manarâ Jesure ʒiŋuc mumbiŋ: “E jâmbomac porofete sâko‐nâŋec.”

⁴¹Â gâcnezi mumbiŋ, “E Kristo jâmbâŋ.” Mupie tucnezi qatararâ mumbiŋ, “Wiac Kristo e wemocko Galilaia mâreŋkonec fuaocmu.

⁴²Tiri Papiao dâŋ ʒiŋuc mukicne: Kristo e Dawidire haefuŋ Betelehem ira oso gitecfâc‐ticne jaŋere ŋondeŋkonec fuaocmu.”

⁴³Ŋic jaŋe Jesure iŋuc muhuc fâuckembiŋ.

⁴⁴Eme gâcnezi kâpâcwâru baniŋte murâ mejeŋic mâckeme behembiŋ.

⁴⁵Eme momori jaŋe taha bapa micne â farisaio jaŋerao risiepie wio‐jarerâ mumbiŋ: “Ŋoŋe wemocte mi rorâ bawareŋgopieŋ?”

⁴⁶Wiopie momori jaŋe mumbiŋ, “E dâŋ muekac, iŋucne ŋic gâcnezi mumune mi fokac.”

⁴⁷Mupie farisaio ŋic jaŋe ʒiŋuc jazambiŋ: “Me, ŋoŋe iŋuc jaha maŋ bâsifuc eŋarejec?

⁴⁸Soŋaŋ kâcqene â farisaio ŋic nâŋeraonec moczi erao moc qohotac me?

⁴⁹I aricne i, ŋic omane guru, sâcmutâc dâŋ mi mamana jaŋe sawa, hârâcte biŋe jaŋe hâcne.”

⁵⁰Eme âgo‐jeŋic moc Nikodemo, mârâc Jesu iqickewec, eki ine ʒiŋuc jazawec:

⁵¹“Ŋoŋe muniŋ, ŋic moc fuŋne‐ticne mi manahuc â kiŋticne mi honehuc okacnere dâŋ mâc mumutarane, iŋuc ezore sâcmutâc papia‐nâŋecko moc qâreŋkekicne fokac me?”