Johane 7:22-34

²²Mupe mananiŋ: Mosezi motecfâc‐ŋeŋic sahac‐jeŋicko ma baniŋte muŋarewec. Erâ i Mosezi mi fuŋkewec, mimiŋne jaŋe fuŋkembiŋ. Eme gie i bapane maickeme sabata hombaŋko wâc baeŋgopieŋ.

²³Ine hâcne Mosere sâcmutâc dâŋ huckepie fârimâc ezacte hombaŋko motecfâc‐ŋeŋic sahac tofa‐jeŋicko gie i baeŋgopieŋ, â no ine ŋicpuriŋ sahac‐ticne furu jaha hombaŋko bâpiaŋkepo, irec wemocte mana gâpâre‐nareŋgopieŋ?

²⁴Ŋoŋe dâŋ onʒoŋ jaha sahacne mi muniŋ, mana wosâehuc dâŋ fârine munʒapiŋ me!”

²⁵Eme Jerusalem hae rune jaŋe ʒiŋuc mumbiŋ: “Ŋic qazo mueŋgopieŋ ine hâcne ʒi.

²⁶Hâc, e weniŋuc erâ dâŋ tâtâcko mume micnefâc‐nâŋec jaŋe mi qataracneŋgopieŋ? Me jaŋe fuŋne‐ticne mana tarahuc manacnepie Kristo ekac mecne?

²⁷Erâ iŋuc wâc mâcne mecne. E fufua‐ticnere fuŋne manaŋgopeneŋ. Kristo wareocmu ine ere fuŋne kâuc bafârenaŋmu.”

²⁸Jesu e taha ufuŋko miti qazu‐jarehuc domahame iŋuc mupie hahaŋne bahuc muwec, “Oi ŋoŋe, mana taracnurâ fufua‐nanere fuŋne manaeŋgopieŋ, ŋoŋe hâcne. Wahapo i no nahacne maŋte mi wahapo, jâmbomac rune moc jukac eki sorecnume wahapo. Ŋoŋe e kâuc baŋgopieŋ.

²⁹No ine e jahacne bufuŋkonec sorecnume wahapore e mana tarakopac.”

³⁰Iŋuc mume kâpâcwâru baniŋte mumbiŋ. Erâ dameŋ‐ticne mi maickewecte mejeŋic mâckeme behembiŋ.

³¹Ehame ŋic omane jaŋeraonec bocjahazi fuŋkerâ Jesu manasiŋkembiŋ. Ehuc ʒiŋuc mumbiŋ: “Kristo fisiocmu, e ŋic ʒizi mâsi baekac i sirickehuc baocmu me? Aricne, e bafâreekac.”

³²Ŋic jaŋe dâŋ iŋucne kamierâ mupie farisaio jaŋe manarâ taha bapa micne jaŋehec nazaŋ gazaŋ erâ momori jaŋe Jesu kâpâcwâru baniŋte sorec‐jopapie rambiŋ.

³³Eme Jesuzi ŋic ʒiŋuc jazawec: “No dameŋ bembeŋne sawa ŋoŋehec jurâ sorecnuwec erao risiepemu.

³⁴Eme ŋoŋe no basacnu‐bipiehuc mi bâfuacnuniŋmu. Ra jupemu ira wemocko fâniŋmu.”