Johane 7:1-12

¹Jerusalem haeonec Judaŋic jaŋe Jesu qaniŋte dâŋ qacnepie Judaia mâreŋ‐jeŋic qikiŋnerâ Galilaia mâreŋko sawa rac warec ehuc juwec.

²Ehuc juhame Judaŋic rehac boze hombaŋ‐jeŋic bembeŋkewec.

³Ehame qafâc‐ticne ʒiŋuc âzâcnembiŋ: “Go ʒawierâ Judaia mâreŋko rarâ, ʒira mâsi wiac baekic i ocna batec kikefuŋfâcge jaŋe honenʒepieŋ.

⁴Mozi fua tâcnezo murâ soŋsoŋ juhuc gie baocmu? Go gie iŋucne bazo muekicte ra ŋicguruo fua taniŋkerâ batec honeniŋ me!”

⁵Ɋafâc‐ticne jaŋe e mi manasiŋkehuc iŋuc mumbiŋ.

⁶Mupie Jesuzi ʒiŋuc jazawec: “Ŋoŋe dameŋ kosao wiac ezo murâ sâcne eniŋmu, no ine dameŋ‐nane mi maickekac.

⁷Ŋic jaŋe ŋoŋe wemocko qaisoc‐ŋopaniŋmu, no ine juju bapa‐jeŋic sâqocne i mutaniŋkepe qaisocnueŋgopieŋ.

⁸Ŋoŋe hombaŋko raniŋ, no ine dameŋ‐nane mi maickekacte ʒiŋuczia mi rapemu.”

⁹Iŋuc murâ Galilaia mâreŋkoa juwec.

¹⁰Eme jaŋe bânierâ rahapie e ʒâhecko buc kamierâ rawec.

¹¹Eme hombaŋ maickeme Judaŋic micne jaŋe basarâ wiwioc erâ mumbiŋ, “E wena jukac?”

¹²Â ŋic omane sâko jaŋe ere dâŋ bocjaha mufembiŋ. Ehuc gâcnezi mumbiŋ, “E ŋic biaŋne,” â gâcnezi qatararâ mumbiŋ, “Aricne, e ŋic maŋ bâsifuc ejareekac.”