Johane 6:10-66

¹⁰Eme Jesuzi muwec, “Ŋoŋe ŋic ejarepie qâzuckerâ waha ŋeniŋ.” Eme mâreŋ ira kecɋaŋ fowec i toma âterâ ŋic 5 tauseŋ qâririŋ iŋuczi waha ŋerambiŋ.

¹¹Eme Jesuzi poroŋ rorâ daŋge murâ ŋic ŋerambiŋ jaŋe bâtâc bajarewec â qowi iŋuc jaha mupie sâc jarewec.

¹²Nârâ gapec‐jopame Jesuzi motecfâcne ʒiŋuc jazawec: “Tiwâne forâ sipirickezacte nuseniŋ.”

¹³Eme jaŋe poroŋ memoc irec tiwâne nusepie sasac 12 hurâ fusewec.

¹⁴Eme ŋic jaŋe fuŋne qaqa mâsi i hone manac erâ mumbiŋ, “Porofete sâko mâreŋko fuaocte mukicne, ʒine hâcne jâmbâŋ.”

¹⁵Eme jaŋe Jesu orâŋkerâ mezi rorâ ŋicwofuŋ‐jeŋic âkendâŋnezo ehapie hone tarac‐joparâ behec‐joparâ e jahackoaŋ tikio fewec.

¹⁶Hae owâeme motecfâcne jaŋe riqicmecko humbiŋ.

¹⁷Hurâ Kafanaum haeo risie raniŋte wokeo fembiŋ. Erâ hae dapâc eme Jesu juhame buc rambiŋ.

¹⁸Ehuc mâŋâŋ sanaŋne domame siri kâcɋene qame rambiŋ.

¹⁹Jaŋe kilometa 4 me 5 irec sâc rakuhapie Jesuzi riqic faio âte âte rarâ woke bâqiŋkeme honerâ fâfârembiŋ.

²⁰Iŋuc epie wira‐jarerâ muwec: “Nahac fâkopac, mi hâwic‐ŋopaoc.”

²¹Eme wokeo ropie feocte ehapie izia woke mâreŋ razo mumbiŋko fisiwec.

²²Ŋic guru sâko jaŋe riqic ocniŋucnao fohapie hae furewec. Hae fureme ʒiŋuc mumbiŋ: “Jacne ŋafeo woke mocsâkoa ŋeme honembeneŋ, ira motecfâcne Jesu beherâ buc ferâ rambieŋ.”

²³Iŋuc manahuc ŋehapie Tiberia haeonec woke gâcne Wofuŋzi daŋge murâ poroŋ gumec‐jopawecko ware fisimbiŋ.

²⁴Eme ŋic jaŋe Jesu e jahacne â motecfâcne basac‐joparâ wokeo ferâ Kafanaum haeo risie rarâ ira basambiŋ.

²⁵Riqic ʒiŋucnao basaku bâfuarâ mumbiŋ, “Qaqazu, go wezimucne waremec?”

²⁶Wiocnepie ʒiŋuc jazawec: “No jâmbomac jâmbâŋ mupe mananiŋ, ŋoŋe fuŋne qaqa mâsi bape honeeŋgopieŋ irec mâcne, nânâ gumec‐ŋopape nâ gapec embieŋ, irec basacnuŋgopieŋ.

²⁷Ŋoŋe gie banʒepieŋ, erâ nânâ sisirowenere mâcne, juju sanaŋte nânâ irec giene banʒepieŋ. Ŋic Fâri Wâtuŋne eki, Anutu Mamaczi kamac sarahuc âkendâŋnewecte, juju sanaŋte nânâ i sâcne ŋareocmu.”

²⁸Mume dâŋ ʒiŋuc bâtikiecnembiŋ: “Nâŋe weniŋuc erâ Anuture gie banaŋmu?”

²⁹Eme ʒiŋuc jazawec: “Ŋic sorewec e manasiŋkezo, izi Anuture gie biŋe‐ŋeŋic ekac.”

³⁰Mume dâŋ ʒiŋuc âzâcnembiŋ: “Mo fuŋne qaqa mâsi mo batec honerâ manasiŋgunaŋmu? Mo gie mo bacmu?

³¹Mimiŋnefâc‐nâŋec jaŋe mâreŋ sawao mana nâjumbieŋ. Eme irec dâŋqâreŋ ʒiŋuc fokac: ‘Sambâŋkonec nânâ jareme nâjumbieŋ.’”

³²Eme Jesuzi ʒiŋuc jazawec: “Jâmbomac jâmbâŋ mupe mananiŋ: Mose e sambâŋkonec nânâ mi bâfua‐ŋarewec, Mamac‐nanezi sambâŋkonec nânâ fârine ŋareekac hâcne.

³³Nânâ sambâŋkonec waharâ mâreŋŋic juju bâfua‐ŋareekac izi Anuturaonec nânâ fârine ekac.”

³⁴Mume ʒiŋuc âzâcnembiŋ: “Wofuŋ, go nânâ mukic i dameŋ sâc nârezemec.”

³⁵Eme ʒiŋuc jazawec: “Jujure nânâ no hâcne. Moc e norao qohotaocmu e nânâre moc mi hâmoocmu, â moc e no manasiŋnuocmu e opâre moc mi hâmoocmu.

³⁶No ine ŋazape, ŋoŋe no honecnu‐bipiehuc sifu mi manasiŋnueŋgopieŋ.

³⁷Mamaczi nareekac i jaŋe norao fisi‐fâreniŋmu, â norao fisiocmu e mi bâsuepemu.

³⁸Sambâŋkonec wahapo i no nahacne micdâŋ dopeckepemurâ mâcne, sorecnuwec ere micdâŋ dopeckepemurâ wahapo.

³⁹Mamac‐nanezi norao râec‐jopaekac ŋic i jaŋe sipirickenʒipiŋte hone qâzuc ejareku dameŋ sâkoo furu jaha wiwic‐jopape faharenʒoŋgopieŋ; sorecnuwec ere micdâŋ iŋuc hâcne fokac.

⁴⁰Ŋokâ hone dendeŋnehuc manasiŋkeniŋmu sâc juju sanaŋ rauckeniŋmu; Mamac‐nanere micdâŋ iŋuc hâcne fokac. Eme noni dameŋ sâkoo bâɋârec‐jopazokopac.”

⁴¹Jesu e “sambâŋkeonec nânâ no hâcne” iŋuc muwecte Judaŋic jaŋe mana sâqorecnehuc dâŋembiŋ.

⁴²Ehuc ʒiŋuc mumbiŋ: “Wiac Jesu e Josefere ŋokâ, neŋgoc mamac jahec‐ticne i nâŋe honec‐jofaeŋgopeneŋ. Eme wemocte ʒiŋuc mukac: ‘No sambâŋkonec wahapo’?”

⁴³Mupie Jesuzi ʒiŋuc jazarâ muwec: “Ŋoŋe boc mi manapie sâqorezejec.

⁴⁴Ŋic moc e jahacne maŋte norao fifisi i mi fokac, Mamac sorecnuwec eki fâreme fifisine ine fokac. Eme noni ŋic iŋucne e dameŋ sâkoo bâɋârezokopac.

⁴⁵Porofete jaŋere dâŋqâreŋ ʒiŋuc fokac: ‘Anutu e jahac ŋic sasawa miti jaza qazuc eocmu.’ Irec moc e Mamaczi miti âzâcne qazuc eme manaocmu e norao fisiocmu.

⁴⁶Ŋic moczi moc Mamac honewec i mi fokac, Anuturaonec wahawec e mocjahazi Mamac honewec.

⁴⁷No jâmbomac jâmbâŋ ŋazape mananiŋ: Moc e no manasiŋnuocmuzi juju sanaŋhec eocmu.

⁴⁸Jujure nânâ no hâcne.

⁴⁹Mimiŋnefâc‐ŋeŋic jaŋe mâreŋ sawao mana nâipiehuc hâmo‐fârembiŋ.

⁵⁰Â sambâŋkonec nânâ nârâ mi hâhâmo ine norao fokac ʒi.

⁵¹Jujure nânâ sambâŋkonec wahakicne no nahacne hâcne. Irec moc e noraonec nânâ nârâ juraʒihuc juocmu sanaŋ. Biuc‐nanezi nânâ ekac, i ŋiczi juju bâfuaniŋte ŋarepemu.”

⁵²Eme Judaŋic jaŋaczia mu qaqatarac erâ mumbiŋ, “E weniŋuc erâ biuc‐ticne nâreme nanaŋmurâ mukac?”

⁵³Epie Jesuzi ʒiŋuc jazawec: “No jâmbomac jâmbâŋ ŋazakopac, ŋoŋe Ŋic Fâri Wâtuŋne ere biuc â soc mi nâniŋmuo maŋŋeŋicko juju mi fuaocmu.

⁵⁴Moc e nore biuc â soc nâocmuzi juju sanaŋhec eocmu, eme noni dameŋ sâkoo bâɋârezokopac.

⁵⁵Nore biuc izi nânâ fârine, â nore soc izi opâ fârine.

⁵⁶Nore biuc â soc nâocmuzi no maŋnuocmu a noni e maŋkepemu.

⁵⁷Mamac e juju runezi sorecnume wahapore Mamacte erâ juekopac, eme no nâcnuocmuzi iŋuc jaha nore erâ juocmu.

⁵⁸Sambâŋkonec nânâ irec fuŋne iŋuc fokac. I mimiŋnefâc‐ŋeŋic nâmbiŋ iŋucne mâcne. Jaŋe nâipiehuc hâmombiŋ. Â nore nânâ ʒi nâocmu e ine juraʒihuc juocmu sanaŋ.”

⁵⁹Jesu e Kafanaum haeo mitificko juhuc dâŋ i jaza qazuc ewec.

⁶⁰Kikefuŋfâc‐ticne jaŋeraonec bocjahazi dâŋ i manarâ mumbiŋ, “Dâŋ kecʒi manapene ququŋkenehec ekac, i mozi manaocmu?”

⁶¹Eme mu takic embiŋ i Jesu e maŋticnezi manarâ ʒiŋuc jazawec: “Dâŋ i manapie sâqorekac me?

⁶²Eme Ŋic Fâri Wâtuŋnezi mârâc juweckoa risie feme manapie weniŋuc eocmu?

⁶³Sahacte biuczi juju bâbâfua i mi fokac, juju bâbâfua i Mârore gie. No dâŋ ŋazaekopac i Mârohec â jujuhec.

⁶⁴Eme ŋoŋeraonec tucnezi ine mana maŋ mi eeŋgopieŋ.” Jesu e miti‐ticne qikiŋneniŋmu jaŋe mârâcko mana tarac‐jopawec, â doc baocmu e mâmâc mana tarawec, irec dâŋ iŋuc jazawec.

⁶⁵Erâ dâŋ moc ʒiŋuc ʒuhuckerâ muwec: “No irec hâcne kecʒiŋuc ŋazapac: Moc e Mamaczi mi baafeckeha norao fisirâ jujune mi fokac.”

⁶⁶Eme dameŋ ira kikefuŋfâc‐ticne jaŋeraonec bocjahazi jume jujure takic‐jopame râpeckembiŋ.