Johane 5:8-33

⁸Mume Jesuzi ʒiŋuc âzâcnewec: “Go faharerâ fofoge rorâ rac.”

⁹Mume izia sahac‐ticne biaŋkeme faharerâ fofo‐ticne ameckerâ rawec. Ʒoaŋ ira ine sabata hombaŋ ŋembiŋ.

¹⁰Irec Judaŋic jaŋe ŋic ɋiɋic qawec e ʒiŋuc âzâcnembiŋ: “Miŋecgac hombaŋko fofoge hâpokomec i mi eene.”

¹¹Mupie ʒiŋuc jazawec: “Bâpiaŋnukaczi ʒiŋuc naza sorec ekac: ‘Fofoge rorâ rac.’”

¹²Mume wiocnerâ mumbiŋ, “Fofoge rorâ rac gazajec ŋic e ʒâŋene mo?”

¹³Mupie ŋic biaŋkeweczi kâuc bawec. Jesu e ŋicguru ira domambiŋ jaŋere ŋondeŋko kamierâ rawec.

¹⁴Izi ʒâhec Jesuzi ŋic e taha ufuŋko bâfuarâ uŋ ʒiŋuc âzâcnewec: “Go sahacge biaŋkejec, eme wiac ŋemâc bâmâcne jâmbâŋ fua‐garezacte sâqocne mocwâc mi bazemec.”

¹⁵Eme ŋic e Jesu hone tararâ ra Judaŋic ʒiŋuc jazawec: “Ŋic bâpiaŋnukac ʒâŋene Jesu.”

¹⁶Jesu e sabata hombaŋko gie iŋucne bawecte Judaŋic jaŋe râsi ecnembiŋ.

¹⁷Epie Jesuzi ʒiŋuc jazawec: “Mamac‐nane e gie ʒuʒuhuc jaha baekac, eme noni iŋuc jaha wâc eekopac.”

¹⁸Eme Jesu e sabata hombaŋ hesifuckewec â Anuture Mamac‐nane muhuc Anuture sâcko ʒuhuckewec, Judaŋic jaŋe wiac jajahec irec erâ mana gâpârerâ qaniŋte mumbiŋ.

¹⁹Eme Jesuzi dâŋ ʒiŋuc jazawec: “No jâmbomac jâmbâŋ ŋazape mananiŋ, Ŋokâzi maŋticnere sâcne gie mi baekac, Mamaczi bame sâc honehuc baekac. Eki baekac ijaha Ŋokâzi baekac.

²⁰Mamac e Ŋokâ honebâckeekacte gie baekac sâc jâutu‐fâreekac, erâ gie ʒi honeŋgopieŋ sawa mâcne, fekicne sâko jâutume ŋoŋe honerâ wareckeniŋmu.

²¹Mamac e hâmokicne wiwic‐joparâ bâɋârec‐jopaekac, iŋuc jaha Ŋokâzi e me e bâɋârezo murâ bâɋâreocmu.

²²Erâ Mamac e ŋic okacnere dâŋ mi mutara‐jareekac, gie i Ŋokâre meo râewec.

²³Eme ŋic jaŋe Mamac sâseeŋgopieŋ iŋuc jaha Ŋokâ sâsenʒepieŋ. Moc e Ŋokâ mi sâseocmuzi, Ŋokâ sorewec, Mamac hâcne, e iŋuc jaha mi sâseocmu.

²⁴No jâmbomac jâmbâŋ ŋazape mananiŋ: Moczi nore dâŋ mana maŋ ehuc, sorecnuwec e manasiŋkeocmu, ŋic e ʒiŋuczia juju sanaŋhec ekac. E okacnere biŋe mi ee hâmoc râpeckerâ jujuo raʒiwec jukac hâcne.

²⁵No jâmbomac jâmbâŋ ŋazape mananiŋ: Dameŋ moc maickeocmu, erâ ʒi biac maickekac hâcne, ira hâmokicnezi Anutu Ŋokâ‐ticne ere dâŋ manarâ ɋârerâ juniŋmu.

²⁶Mamac e jujure fuŋqizecne, eme Ŋokâ e iŋuc jaha jujure fuŋqizecne eocte qikiŋnecnewec.

²⁷Erâ e Ŋic Fâri Wâtuŋne jukacte ŋic okacnere dâŋ mutara‐jareocte mucnewec.

²⁸Dâŋ irec manapie mi quŋkezejec. Dameŋ moc bakicne fokac i maickeme ʒâŋeruŋko foeŋgopieŋ jaŋe ere dâŋ wiwira manarâ wefunʒoŋgopieŋ.

²⁹Ehuc juju biaŋne jumbiŋzi juju sanaŋte faharenʒoŋgopieŋ, â juju sâqocne jumbiŋzi kiŋte okacne roniŋte faharenʒoŋgopieŋ.

³⁰No nahacne maŋte gie i bapane mi fokac, Mamac‐nanere micsâcko sawa okacnere dâŋ mutara‐jareekopac. Iŋuc ehuc okacnere gie bape sâckoa eocmu. I no nahacne dâŋ mâcne, sorecnuwec ere dâŋ ʒaeckeekopac.

³¹“No nahac fuŋne‐nane mutaniŋkepe fârimâc eocmu.

³²Fuŋne‐nane i moczi mutaniŋkeocmu, erâ no manakopac, fuŋne‐nane mutaniŋkeme fârine eocmu.

³³Ŋoŋe Johane mu indiŋ ecnepie dâŋ fâri qizecne mutaniŋkewec.