Johane 5:2-11

²Eme Jerusalem haeo Lama Motâcko riqic moc ŋewec ʒâŋene Betesida. Ere mecnao fic memoc ŋerawec.

³Fic ira ŋic huchec â tiŋtuŋ â ʒeke puriŋ â soc kekereŋhec bocjaha fombiŋ, ehuc opâ qiriŋ qaocte woŋeckembiŋ;

⁴Wofuŋte aŋelo moczi dameŋ ocŋondeŋ sâc riqicko waharâ opâ qâuawec; qâuahame moczi bâbâni opâo huwec e huc ecnewec i niniŋkecneme ɋiɋic qawec.

⁵Eme moc fowec e puriŋ ecnehuc juhame jara 38 ewec.

⁶Eme Jesuzi ŋic e honerâ dameŋ ʒora fohuc jukac, iŋuc manarâ wiocnerâ muwec: “Go ɋiɋic qacmurâ egarekac me?”

⁷Eme puriŋzi muwec, “Bomboŋ, mo ŋic mo junarekaczi opâ qiriŋ qaha riqicko râecnuzac? Â no nahac huzo mupe ine moczi biac âkehocnurâ huekac.”

⁸Mume Jesuzi ʒiŋuc âzâcnewec: “Go faharerâ fofoge rorâ rac.”

⁹Mume izia sahac‐ticne biaŋkeme faharerâ fofo‐ticne ameckerâ rawec. Ʒoaŋ ira ine sabata hombaŋ ŋembiŋ.

¹⁰Irec Judaŋic jaŋe ŋic ɋiɋic qawec e ʒiŋuc âzâcnembiŋ: “Miŋecgac hombaŋko fofoge hâpokomec i mi eene.”

¹¹Mupie ʒiŋuc jazawec: “Bâpiaŋnukaczi ʒiŋuc naza sorec ekac: ‘Fofoge rorâ rac.’”