Johane 4:9-30

⁹Âzâcneme ŋokac e muwec, “Go Judaŋiczi weniŋuc erâ Samaria ŋokac norao opâre mukic?” Judaŋic â Samaria ŋic jaŋe bâtâcko jujumbieŋte ŋokac e iŋuc muwec.

¹⁰Eme Jesuzi ʒiŋuc âzâcnewec: “Go Anutu jauŋ‐ticnere fuŋne â opâre gazakopac nore fuŋne mâmâc kâuc bakic. Mana tararâ muzac numu‐naretec opâ fifisine garezapo.”

¹¹Mume ŋokaczi ʒiŋuc âzâcnewec: “Bomboŋ, opâ nombâŋ i ʒoricne, erâ go opâ fifiage aricnere opâ fifisine wenirec fiacmu?

¹²Mimiŋne‐nâŋec Jakobo e opâ nombâŋ ʒi rowec. Erâ e jahacne â ŋokâfâcne â lama bulimakaofâc‐ticne jaŋe opâ ʒi jaha nâhuc jumbiŋ. Goki Jakobore sâc i jâuruhuc opâ moc bâfuacmu?”

¹³Iŋuc mume Jesuzi ʒiŋuc âzâcnewec: “Opâ ʒi gapecne tâmiric, irec i hati nârâ nâ ehuc juzo,

¹⁴â nore opâ ine gapecnehec, moc e i nâocmu, e opâre mocwâc mi hâmohuc mâc juraʒihuc juocmu. Noni opâ i ŋic moc râcnepe maŋticnao opâ ʒâŋe bâfuacneme juju sanaŋte ʒâkâŋko rahuc domaocmu.”

¹⁵Mume ŋokaczi ʒiŋuc muwec: “Bomboŋ, go opâ i naretec nârâ opâre mocwâc mi hâmozepac, ehuc ʒira gâbâ ware fiahuc domaekopac i behezepac.”

¹⁶Iŋuc mume Jesuzi ʒiŋuc âzâcnewec: “Ra ŋowege jowatec warenic.”

¹⁷Eme ŋokaczi muwec, “No ŋowe‐nane aricne.” Mume Jesuzi muwec, “Go ŋowege aricne, i sâcne mukomec;

¹⁸go ŋic memoc ba behec ejaremeŋ, â ʒiŋuczia bakomec e gore ŋowe aricne, irec go dâŋ jâmbomac mukomec.”

¹⁹Mume ŋokaczi ʒiŋuc âzâcnewec: “Ŋicbomboŋ‐nane, no miŋecne manakopac, go porofete.

²⁰Irec mutec manape: Kâcɋenefâc‐nâŋec jaŋe tiki kecʒira Anutu mai ecne jumbieŋ, â Judaŋic ŋoŋe ine Jerusalem haeoa Anutu mai ecnezo, iŋuc mueŋgopieŋ.”

²¹Eme Jesuzi ʒiŋuc muwec: “Ŋokac, no gazape manac: Dameŋ moc bembeŋkekac, i maickeme ŋoŋe Mamac mai ecneniŋmu i tiki kecʒira mâcne â Jerusalem haeo wâc mi eniŋmu.

²²Ŋoŋe kâuc bahuc mai ecneeŋgopieŋ, nâŋe ine mana tarahuc mai ecneeŋgopeneŋ. Bâbâpiaŋ i Judaŋic nâŋeraonec.

²³Dameŋ moc maickeocmu erâ ʒi biac maickekac hâcne, ira kikefuŋfâc‐ticne fârine jaŋe maŋzi â dâŋ fâri qizecnere sâcko Mamac mai ecneniŋmu. Mamac e ŋic iŋucne jaŋere ecneekac.

²⁴Anutu e Mâro fuŋgâtâne, irec e mai ecneeŋgopieŋ ŋoŋe Mâro â dâŋ fâri qizec jahere ŋesiŋko mai ecnenʒepieŋ.”

²⁵Mume ŋokaczi ʒiŋuc âzâcnewec: “No manakopac, Mesia fuaocte mukicne, ʒâŋene moc Kristo, eki fuarâ wiac sasawa mu bataniŋ enâreocmu.”

²⁶Eme Jesuzi âzâcnewec: “Dâŋ gazakopac, no hâcne ʒi.”

²⁷Iŋuc muhame motecfâcne fisimbiŋ. Fisirâ ŋokachec muc manac ewec irec wareckembiŋ. Erâ wemo wiacte dâŋ âzâcnekomec, me weniŋucte âzâcnekomec, iŋuc muhuc wiocneniŋte manapie quŋkeme behembiŋ.

²⁸Eme ŋokac e opâ râqâc‐ticne beherâ haeo gasacke rarâ ŋic ʒiŋuc jazawec:

²⁹“Ŋoŋe warerâ ŋic moc honeniŋ, eki epo bapo irec dâŋ mutaniŋke‐nare‐fârekac. E Kristo wiac moc?”

³⁰Eme haeonec waharâ Jesurao fisi‐fârembiŋ.