Text copied!
CopyCompare
Kâte Bible - Johane - Johane 4

Johane 4:6-48

Help us?
Click on verse(s) to share them!
6Eme ijaha Jakobore opâ nombâŋ fowec wâc. Eme Jesu e ira guŋpiticko fisirâ betaŋkerâ nombâŋmecko waha ŋemanawec.
7Ŋehame Samaria ŋokac moczi opâ fiaocte fisiwec. Fisime Jesuzi ʒiŋuc âzâcnewec: “Go opâ moc gumecnuc.”
8Motecfâcne jaŋe nânâ furine baniŋte haeo fehapie Jesu buc ŋehuc ŋokac opâre âzâcnewec.
9Âzâcneme ŋokac e muwec, “Go Judaŋiczi weniŋuc erâ Samaria ŋokac norao opâre mukic?” Judaŋic â Samaria ŋic jaŋe bâtâcko jujumbieŋte ŋokac e iŋuc muwec.
10Eme Jesuzi ʒiŋuc âzâcnewec: “Go Anutu jauŋ‐ticnere fuŋne â opâre gazakopac nore fuŋne mâmâc kâuc bakic. Mana tararâ muzac numu‐naretec opâ fifisine garezapo.”
11Mume ŋokaczi ʒiŋuc âzâcnewec: “Bomboŋ, opâ nombâŋ i ʒoricne, erâ go opâ fifiage aricnere opâ fifisine wenirec fiacmu?
12Mimiŋne‐nâŋec Jakobo e opâ nombâŋ ʒi rowec. Erâ e jahacne â ŋokâfâcne â lama bulimakaofâc‐ticne jaŋe opâ ʒi jaha nâhuc jumbiŋ. Goki Jakobore sâc i jâuruhuc opâ moc bâfuacmu?”
13Iŋuc mume Jesuzi ʒiŋuc âzâcnewec: “Opâ ʒi gapecne tâmiric, irec i hati nârâ nâ ehuc juzo,
14â nore opâ ine gapecnehec, moc e i nâocmu, e opâre mocwâc mi hâmohuc mâc juraʒihuc juocmu. Noni opâ i ŋic moc râcnepe maŋticnao opâ ʒâŋe bâfuacneme juju sanaŋte ʒâkâŋko rahuc domaocmu.”
15Mume ŋokaczi ʒiŋuc muwec: “Bomboŋ, go opâ i naretec nârâ opâre mocwâc mi hâmozepac, ehuc ʒira gâbâ ware fiahuc domaekopac i behezepac.”
16Iŋuc mume Jesuzi ʒiŋuc âzâcnewec: “Ra ŋowege jowatec warenic.”
17Eme ŋokaczi muwec, “No ŋowe‐nane aricne.” Mume Jesuzi muwec, “Go ŋowege aricne, i sâcne mukomec;
18go ŋic memoc ba behec ejaremeŋ, â ʒiŋuczia bakomec e gore ŋowe aricne, irec go dâŋ jâmbomac mukomec.”
19Mume ŋokaczi ʒiŋuc âzâcnewec: “Ŋicbomboŋ‐nane, no miŋecne manakopac, go porofete.
20Irec mutec manape: Kâcɋenefâc‐nâŋec jaŋe tiki kecʒira Anutu mai ecne jumbieŋ, â Judaŋic ŋoŋe ine Jerusalem haeoa Anutu mai ecnezo, iŋuc mueŋgopieŋ.”
21Eme Jesuzi ʒiŋuc muwec: “Ŋokac, no gazape manac: Dameŋ moc bembeŋkekac, i maickeme ŋoŋe Mamac mai ecneniŋmu i tiki kecʒira mâcne â Jerusalem haeo wâc mi eniŋmu.
22Ŋoŋe kâuc bahuc mai ecneeŋgopieŋ, nâŋe ine mana tarahuc mai ecneeŋgopeneŋ. Bâbâpiaŋ i Judaŋic nâŋeraonec.
23Dameŋ moc maickeocmu erâ ʒi biac maickekac hâcne, ira kikefuŋfâc‐ticne fârine jaŋe maŋzi â dâŋ fâri qizecnere sâcko Mamac mai ecneniŋmu. Mamac e ŋic iŋucne jaŋere ecneekac.
24Anutu e Mâro fuŋgâtâne, irec e mai ecneeŋgopieŋ ŋoŋe Mâro â dâŋ fâri qizec jahere ŋesiŋko mai ecnenʒepieŋ.”
25Mume ŋokaczi ʒiŋuc âzâcnewec: “No manakopac, Mesia fuaocte mukicne, ʒâŋene moc Kristo, eki fuarâ wiac sasawa mu bataniŋ enâreocmu.”
26Eme Jesuzi âzâcnewec: “Dâŋ gazakopac, no hâcne ʒi.”
27Iŋuc muhame motecfâcne fisimbiŋ. Fisirâ ŋokachec muc manac ewec irec wareckembiŋ. Erâ wemo wiacte dâŋ âzâcnekomec, me weniŋucte âzâcnekomec, iŋuc muhuc wiocneniŋte manapie quŋkeme behembiŋ.
28Eme ŋokac e opâ râqâc‐ticne beherâ haeo gasacke rarâ ŋic ʒiŋuc jazawec:
29“Ŋoŋe warerâ ŋic moc honeniŋ, eki epo bapo irec dâŋ mutaniŋke‐nare‐fârekac. E Kristo wiac moc?”
30Eme haeonec waharâ Jesurao fisi‐fârembiŋ.
31Eme motec jaŋe ʒiŋuc âzâcnembiŋ: “Qaqazu, nânâ nâc.”
32Mupie jazawec, “Nânâ fuŋmoc fonarekac, i ŋoŋe mi manaŋgopieŋ.”
33Iŋuc mume motec jaŋackoaŋ nazaŋ gazaŋ erâ mumbiŋ: “Moczi moc nânâ bafisirâ râcnembieŋ me?”
34Mupie muwec, “Sorecnuwec ere mic reŋkehuc gie‐ticne baku babatara izi nânâ‐nane ekac.
35Ŋaŋac ʒiŋuc mueŋgopieŋ: ‘Mosa 4 tarame nânâ fârine fuaocmu.’ Â noni ine ŋazape mananiŋ: Ŋoŋe qâhâŋnerâ ʒâŋe fihuc gie honeniŋ, nânâ fârine fufua dameŋ ʒine hâcne maickekac.
36Ro qânusuc gie baocmuzi furine roocmu, â fârinezi juju sanaŋte biŋe eocmu. Eme he sarac ewec â fârine rome fewec jahe mâmâc babafic erâ ʒeri enicmu.
37Ehame dâŋ kecʒi sanaŋkeocmu: ‘Moczi he sarac eekac, â moczi fârine rome feekac.’
38Noni ŋoŋe he sarac mi embiŋko fârine ropie feocte sorec‐ŋopakopac. Gie i gâcnezi bapie fuawec eme ŋoŋe mâc rauckeŋgopieŋ.”
39Eme Samaria ŋokac e haefâc‐ticne ʒiŋuc jazawec: “Wiac epo bapo i mutaniŋke‐nare‐fârejec.” Eme dâŋ irec bocjahazi Jesu manasiŋkembiŋ.
40Irec Jesurao fisirâ jaŋehec juocte hefârembiŋ. Eme Jesuzi mana‐jarerâ ʒoaŋ gie bapa jajahec jaŋere haeo juwec.
41Eme miti jazame bocjaha jâmbâŋzi mana ʒakiembiŋ.
42Ehuc ŋokac ʒiŋuc âzâcnembiŋ: “Qanaŋ gore dâŋ binaŋte erâ manasiŋkembeneŋ, ʒi ine nâŋe nâŋâc micticnaonec dâŋ manarâ ʒiŋuc manapaŋkeŋgopeneŋ: Eki jâmbomac mâreŋ sâc ŋic nâŋâcne Bâbâpiaŋ.”
43Eme Jesu e jaŋehec gie bapa jajahec jurâ Galilaia mâreŋko rawec.
44Jesu e jahac qanaŋ ʒiŋuc mufuawec: “Porofete moc e jahacne hae mâreŋko jume sâcne mi sâseniŋmu.”
45Eme Galilaia mâreŋko rafisime Galilaia ŋic jaŋe âgo ecnembiŋ. Ine jaŋe juwicnao mâmâc Jerusalem haeo rarâ aakic hombaŋko gie bame honembiŋte iŋuc ecnembiŋ.
46Eme Kana haeo Galilaia mâreŋko mârâc mume opâzi waiŋ ewec ira hâcne mocwâc risiewec. Eme Kafanaum haeo kia moc juwec, e ŋokâ‐ticne hucsâko bame fowec.
47Eme Jesu e Judaia mâreŋkonec risierâ Galilaia mâreŋko mocwâc ware fisikac, iŋuc mupie manarâ kia e Kana haeo Jesurao rarâ ŋokâ‐ticne hâmozo ehuc fowec irec jowame ranicte numucnewec.
48Eme Jesuzi ʒiŋuc âzâcnewec: “Ŋoŋe mâsi â wiac ʒâŋe furu‐ŋeŋic sawa honerâ dâŋnane mana ʒakieeŋgopieŋ.”

Read Johane 4Johane 4
Compare Johane 4:6-48Johane 4:6-48