Text copied!
CopyCompare
Kâte Bible - Johane - Johane 4

Johane 4:28-52

Help us?
Click on verse(s) to share them!
28Eme ŋokac e opâ râqâc‐ticne beherâ haeo gasacke rarâ ŋic ʒiŋuc jazawec:
29“Ŋoŋe warerâ ŋic moc honeniŋ, eki epo bapo irec dâŋ mutaniŋke‐nare‐fârekac. E Kristo wiac moc?”
30Eme haeonec waharâ Jesurao fisi‐fârembiŋ.
31Eme motec jaŋe ʒiŋuc âzâcnembiŋ: “Qaqazu, nânâ nâc.”
32Mupie jazawec, “Nânâ fuŋmoc fonarekac, i ŋoŋe mi manaŋgopieŋ.”
33Iŋuc mume motec jaŋackoaŋ nazaŋ gazaŋ erâ mumbiŋ: “Moczi moc nânâ bafisirâ râcnembieŋ me?”
34Mupie muwec, “Sorecnuwec ere mic reŋkehuc gie‐ticne baku babatara izi nânâ‐nane ekac.
35Ŋaŋac ʒiŋuc mueŋgopieŋ: ‘Mosa 4 tarame nânâ fârine fuaocmu.’ Â noni ine ŋazape mananiŋ: Ŋoŋe qâhâŋnerâ ʒâŋe fihuc gie honeniŋ, nânâ fârine fufua dameŋ ʒine hâcne maickekac.
36Ro qânusuc gie baocmuzi furine roocmu, â fârinezi juju sanaŋte biŋe eocmu. Eme he sarac ewec â fârine rome fewec jahe mâmâc babafic erâ ʒeri enicmu.
37Ehame dâŋ kecʒi sanaŋkeocmu: ‘Moczi he sarac eekac, â moczi fârine rome feekac.’
38Noni ŋoŋe he sarac mi embiŋko fârine ropie feocte sorec‐ŋopakopac. Gie i gâcnezi bapie fuawec eme ŋoŋe mâc rauckeŋgopieŋ.”
39Eme Samaria ŋokac e haefâc‐ticne ʒiŋuc jazawec: “Wiac epo bapo i mutaniŋke‐nare‐fârejec.” Eme dâŋ irec bocjahazi Jesu manasiŋkembiŋ.
40Irec Jesurao fisirâ jaŋehec juocte hefârembiŋ. Eme Jesuzi mana‐jarerâ ʒoaŋ gie bapa jajahec jaŋere haeo juwec.
41Eme miti jazame bocjaha jâmbâŋzi mana ʒakiembiŋ.
42Ehuc ŋokac ʒiŋuc âzâcnembiŋ: “Qanaŋ gore dâŋ binaŋte erâ manasiŋkembeneŋ, ʒi ine nâŋe nâŋâc micticnaonec dâŋ manarâ ʒiŋuc manapaŋkeŋgopeneŋ: Eki jâmbomac mâreŋ sâc ŋic nâŋâcne Bâbâpiaŋ.”
43Eme Jesu e jaŋehec gie bapa jajahec jurâ Galilaia mâreŋko rawec.
44Jesu e jahac qanaŋ ʒiŋuc mufuawec: “Porofete moc e jahacne hae mâreŋko jume sâcne mi sâseniŋmu.”
45Eme Galilaia mâreŋko rafisime Galilaia ŋic jaŋe âgo ecnembiŋ. Ine jaŋe juwicnao mâmâc Jerusalem haeo rarâ aakic hombaŋko gie bame honembiŋte iŋuc ecnembiŋ.
46Eme Kana haeo Galilaia mâreŋko mârâc mume opâzi waiŋ ewec ira hâcne mocwâc risiewec. Eme Kafanaum haeo kia moc juwec, e ŋokâ‐ticne hucsâko bame fowec.
47Eme Jesu e Judaia mâreŋkonec risierâ Galilaia mâreŋko mocwâc ware fisikac, iŋuc mupie manarâ kia e Kana haeo Jesurao rarâ ŋokâ‐ticne hâmozo ehuc fowec irec jowame ranicte numucnewec.
48Eme Jesuzi ʒiŋuc âzâcnewec: “Ŋoŋe mâsi â wiac ʒâŋe furu‐ŋeŋic sawa honerâ dâŋnane mana ʒakieeŋgopieŋ.”
49Eme ŋiczi muwec: “Wofuŋ, ŋokâ‐nane hâmozacte biac fâzemec.”
50Mume Jesuzi ʒiŋuc âzâcnewec: “Go mâc rac, ŋokâge ɋiɋic qakac.” Eme ŋic e Jesure dâŋ mana ʒakiehuc risie rawec.
51Ehame motec jaŋe kiŋaŋ warerâ ʒiŋuc âzâcnembiŋ: “Ŋokâge ɋiɋic qajec jukac.”
52Mupie ɋiɋic qawec dameŋ irec mu indiŋ ejareme mumbiŋ: “Jacne ʒoaŋ ʒâʒâŋiŋ ŋehame ira hucticne âke niniŋkejec.”

Read Johane 4Johane 4
Compare Johane 4:28-52Johane 4:28-52