Johane 4:19-35

¹⁹Mume ŋokaczi ʒiŋuc âzâcnewec: “Ŋicbomboŋ‐nane, no miŋecne manakopac, go porofete.

²⁰Irec mutec manape: Kâcɋenefâc‐nâŋec jaŋe tiki kecʒira Anutu mai ecne jumbieŋ, â Judaŋic ŋoŋe ine Jerusalem haeoa Anutu mai ecnezo, iŋuc mueŋgopieŋ.”

²¹Eme Jesuzi ʒiŋuc muwec: “Ŋokac, no gazape manac: Dameŋ moc bembeŋkekac, i maickeme ŋoŋe Mamac mai ecneniŋmu i tiki kecʒira mâcne â Jerusalem haeo wâc mi eniŋmu.

²²Ŋoŋe kâuc bahuc mai ecneeŋgopieŋ, nâŋe ine mana tarahuc mai ecneeŋgopeneŋ. Bâbâpiaŋ i Judaŋic nâŋeraonec.

²³Dameŋ moc maickeocmu erâ ʒi biac maickekac hâcne, ira kikefuŋfâc‐ticne fârine jaŋe maŋzi â dâŋ fâri qizecnere sâcko Mamac mai ecneniŋmu. Mamac e ŋic iŋucne jaŋere ecneekac.

²⁴Anutu e Mâro fuŋgâtâne, irec e mai ecneeŋgopieŋ ŋoŋe Mâro â dâŋ fâri qizec jahere ŋesiŋko mai ecnenʒepieŋ.”

²⁵Mume ŋokaczi ʒiŋuc âzâcnewec: “No manakopac, Mesia fuaocte mukicne, ʒâŋene moc Kristo, eki fuarâ wiac sasawa mu bataniŋ enâreocmu.”

²⁶Eme Jesuzi âzâcnewec: “Dâŋ gazakopac, no hâcne ʒi.”

²⁷Iŋuc muhame motecfâcne fisimbiŋ. Fisirâ ŋokachec muc manac ewec irec wareckembiŋ. Erâ wemo wiacte dâŋ âzâcnekomec, me weniŋucte âzâcnekomec, iŋuc muhuc wiocneniŋte manapie quŋkeme behembiŋ.

²⁸Eme ŋokac e opâ râqâc‐ticne beherâ haeo gasacke rarâ ŋic ʒiŋuc jazawec:

²⁹“Ŋoŋe warerâ ŋic moc honeniŋ, eki epo bapo irec dâŋ mutaniŋke‐nare‐fârekac. E Kristo wiac moc?”

³⁰Eme haeonec waharâ Jesurao fisi‐fârembiŋ.

³¹Eme motec jaŋe ʒiŋuc âzâcnembiŋ: “Qaqazu, nânâ nâc.”

³²Mupie jazawec, “Nânâ fuŋmoc fonarekac, i ŋoŋe mi manaŋgopieŋ.”

³³Iŋuc mume motec jaŋackoaŋ nazaŋ gazaŋ erâ mumbiŋ: “Moczi moc nânâ bafisirâ râcnembieŋ me?”

³⁴Mupie muwec, “Sorecnuwec ere mic reŋkehuc gie‐ticne baku babatara izi nânâ‐nane ekac.

³⁵Ŋaŋac ʒiŋuc mueŋgopieŋ: ‘Mosa 4 tarame nânâ fârine fuaocmu.’ Â noni ine ŋazape mananiŋ: Ŋoŋe qâhâŋnerâ ʒâŋe fihuc gie honeniŋ, nânâ fârine fufua dameŋ ʒine hâcne maickekac.