Johane 3:2-31

²Ŋic eki hâcne Jesu ŋafeo iqickerâ ʒiŋuc âzâcnewec: “Qaqazu, nâŋe fuŋnege manaeŋgopeneŋ, go qaqazu fârinezi Anuturaonec wahameŋ, go mâsi baekic i ŋic moczi Anutu tâmiric juhuc bapane mi ekac.”

³Mume Jesuzi ʒiŋuc âzâcnewec: “No jâmbomac jâmbâŋ gazape: Moc e harierâ fufua ɋâricne mi fuaocmuzi Anuture uucmaŋ sâcne mi bâfuaocmu.”

⁴Eme Nikodemozi muwec, “Hâc, moc e kâcɋeŋkekicnezi fufua ɋâricne weniŋuc fuaocmu, wemocko neŋgoc bumaŋko mocwâc hume hâsine roocmu?”

⁵Mume Jesuzi ʒiŋuc âzâcnewec: “No jâmbomac jâmbâŋ gazape: Moc e Opâ â Mârore kiwecko ɋâricne mi fuakicnezi Anuture uucmaŋko sâcne mi raʒiocmu.

⁶Ŋickiwecko fuakicnezi ŋic hawari jaha, Mârore kiwecko fuakicnezi Mârore hawari jaha.

⁷Ŋoŋe fufua ɋâricne fuaniŋte mupe go manatec mi quŋkeoc.

⁸Mâŋâŋ e kosa qaekac, eme go fânâŋ‐ticne i manaekic, â fuŋne wenirec fuŋkerâ wareekac, â wena rataraekac, ine mi manaekic. Eme moc e Mârore kiwecko fuakicne, e fuŋne‐ticne iŋucnea fokac.”

⁹Mume Nikodemozi dâŋ ʒiŋuc bâtikiecnewec: “I weniŋuc erâ iŋuc ezo?”

¹⁰Mume Jesuzi ʒiŋuc âzâcnewec: “Go Israe ŋic jaŋere qaqazuzi irec kâuc bakomec me?

¹¹No jâmbomac jâmbâŋ gazape: Nâŋe wiac hone manac eeŋgopeneŋ ijaha ŋaza mutâc eeŋgopeneŋ, eme ŋoŋe ine dâŋnâŋec qikiŋneeŋgopieŋ.

¹²Wiac mâreŋko fufuane irec mac ŋazape sifu mi mana ʒakieeŋgopieŋ, eme wiac sambâŋko fufuane irec ŋazape wemo‐ŋeŋiczi mana ʒakieniŋmu?

¹³Ŋic moczi sambâŋko moc mi fewec, Ŋic Fâri Wâtuŋne, sambâŋkonec wahawec, e mocjahazi sambâŋko wâc juekac.

¹⁴“Mose e mârâc jaha mâreŋ sawao homa bâfeŋnewec, iŋuc jaha Ŋic Fâri Wâtuŋne e bâfeŋnezo mukicne.

¹⁵Eme e manasiŋkeniŋmu jaŋe juju sanaŋ bâfuaniŋmu.

¹⁶Anutu e ŋic ŋoŋere mo iŋucne ecnewecte Ŋokâ jâmbâŋ‐ticne mocjaha e râe qikiŋ ecnewec. Eme e manasiŋkeniŋmu jaŋe moc mi sipirickehuc juju sanaŋ bâfuaniŋmu.

¹⁷Ŋokâ e ŋic jaŋere kiŋ bataraocte mâcne, ŋic bâpiaŋ‐jopaocte Anutuzi soreme wahawec.

¹⁸Moc e Ŋokâ manasiŋkekaczi okacnere biŋe mi ekac. Â moc e Ŋokâ mi manasiŋkekaczi ine biac okacnere biŋe ekac. Wemocte? E Anuture Ŋokâ jâmbâŋ mocjaha ere ʒâŋe mana maŋ mi ekac irec.

¹⁹Okacnere fuŋne ʒiŋuc fokac: Tatamaczi ŋic maic‐jopame jaŋe tatamac bâsuerâ dapâcte wosâembiŋ, juju bapa‐jeŋic sâqocnere iŋuc hâcne embiŋ.

²⁰Moc e sindaŋ eocmuzi tatamac râpeckeocmu, juju bapa‐ticnere fuŋne jaŋgeŋkezacte wemocko tatamacko fua taniŋ eocmu.

²¹Moc e dâŋ fâri qizecne reŋkeocmuzi ine tatamac maickeocmu, eme eebapa‐ticne Anuture micdâŋte sâcko ekicne irec fuŋne taniŋkeocmu.”

²²Eme juku Jesu e motecfâcne rocjopame Jerusalem hae beherâ Judaia qaŋeŋnaopec ra jumbiŋ. Ira jaŋehec juhuc ŋic opâ rua‐jarewec.

²³Johane e mâreŋ moc ʒâŋene Ainoŋ, Salim haeopec juhuc iŋuc jaha Miti Opâ gie bawec, ira opâ bocjaha fowecte ŋic jaŋe fisipie rua‐jarewec.

²⁴Johane e dameŋ ira kâpâcwâru ficko mi râekicne.

²⁵Eme Judaŋic moczi Johane motecfâc‐ticne jaŋehec opâ ruruare mu qaqatarac embiŋ.

²⁶Eme motec jaŋe Johanerao rarâ ʒiŋuc âzâcnembiŋ: “Qaqazu, go Jordaŋ ocniŋucnao juhaŋtecne ŋic moc bâfuacgume fuŋne‐ticne mujaŋgeŋkerâ nâzâmeŋ, eki dameŋ ʒiŋuczia ŋic opâ rua‐jareme erao rafâreŋgopieŋ.”

²⁷Mupie Johanezi ʒiŋuc jazawec: “Ŋic moc e sambâŋ runezi wiac râcne tahac mi ehame e jahac wemocko kâŋgâc roocmu.

²⁸No kecʒiŋuc muhuc ŋazapo i wemocko mickeniŋmu, ‘No Kristo aricne, no biŋe mumu‐ticne sawa.’

²⁹Ŋokac biŋe mucnekicne eki hâcne ŋokac rune. Eme ŋokac bahuc ʒeri kâcɋene ʒeri eme âgo‐ticnezi manarâ bafickehuc bubiaŋ sâko bâfuaocmu wâc. Bubiaŋ i hâcne manapemurâ dameŋne maickekac ʒi.

³⁰Eki fua fehame noni pitiwazepac.

³¹Faicnec wahaweczi qâhuc‐nâpo‐fârekac. Moc e mâreŋkonec fuakicnezi mâreŋte biŋe ekac â mâreŋkopec dâŋ muekac. Â sambâŋkonec wahaweczi ine qâhuc‐nâpo‐fârekac.