Johane 3:15-35

¹⁵Eme e manasiŋkeniŋmu jaŋe juju sanaŋ bâfuaniŋmu.

¹⁶Anutu e ŋic ŋoŋere mo iŋucne ecnewecte Ŋokâ jâmbâŋ‐ticne mocjaha e râe qikiŋ ecnewec. Eme e manasiŋkeniŋmu jaŋe moc mi sipirickehuc juju sanaŋ bâfuaniŋmu.

¹⁷Ŋokâ e ŋic jaŋere kiŋ bataraocte mâcne, ŋic bâpiaŋ‐jopaocte Anutuzi soreme wahawec.

¹⁸Moc e Ŋokâ manasiŋkekaczi okacnere biŋe mi ekac. Â moc e Ŋokâ mi manasiŋkekaczi ine biac okacnere biŋe ekac. Wemocte? E Anuture Ŋokâ jâmbâŋ mocjaha ere ʒâŋe mana maŋ mi ekac irec.

¹⁹Okacnere fuŋne ʒiŋuc fokac: Tatamaczi ŋic maic‐jopame jaŋe tatamac bâsuerâ dapâcte wosâembiŋ, juju bapa‐jeŋic sâqocnere iŋuc hâcne embiŋ.

²⁰Moc e sindaŋ eocmuzi tatamac râpeckeocmu, juju bapa‐ticnere fuŋne jaŋgeŋkezacte wemocko tatamacko fua taniŋ eocmu.

²¹Moc e dâŋ fâri qizecne reŋkeocmuzi ine tatamac maickeocmu, eme eebapa‐ticne Anuture micdâŋte sâcko ekicne irec fuŋne taniŋkeocmu.”

²²Eme juku Jesu e motecfâcne rocjopame Jerusalem hae beherâ Judaia qaŋeŋnaopec ra jumbiŋ. Ira jaŋehec juhuc ŋic opâ rua‐jarewec.

²³Johane e mâreŋ moc ʒâŋene Ainoŋ, Salim haeopec juhuc iŋuc jaha Miti Opâ gie bawec, ira opâ bocjaha fowecte ŋic jaŋe fisipie rua‐jarewec.

²⁴Johane e dameŋ ira kâpâcwâru ficko mi râekicne.

²⁵Eme Judaŋic moczi Johane motecfâc‐ticne jaŋehec opâ ruruare mu qaqatarac embiŋ.

²⁶Eme motec jaŋe Johanerao rarâ ʒiŋuc âzâcnembiŋ: “Qaqazu, go Jordaŋ ocniŋucnao juhaŋtecne ŋic moc bâfuacgume fuŋne‐ticne mujaŋgeŋkerâ nâzâmeŋ, eki dameŋ ʒiŋuczia ŋic opâ rua‐jareme erao rafâreŋgopieŋ.”

²⁷Mupie Johanezi ʒiŋuc jazawec: “Ŋic moc e sambâŋ runezi wiac râcne tahac mi ehame e jahac wemocko kâŋgâc roocmu.

²⁸No kecʒiŋuc muhuc ŋazapo i wemocko mickeniŋmu, ‘No Kristo aricne, no biŋe mumu‐ticne sawa.’

²⁹Ŋokac biŋe mucnekicne eki hâcne ŋokac rune. Eme ŋokac bahuc ʒeri kâcɋene ʒeri eme âgo‐ticnezi manarâ bafickehuc bubiaŋ sâko bâfuaocmu wâc. Bubiaŋ i hâcne manapemurâ dameŋne maickekac ʒi.

³⁰Eki fua fehame noni pitiwazepac.

³¹Faicnec wahaweczi qâhuc‐nâpo‐fârekac. Moc e mâreŋkonec fuakicnezi mâreŋte biŋe ekac â mâreŋkopec dâŋ muekac. Â sambâŋkonec wahaweczi ine qâhuc‐nâpo‐fârekac.

³²Eki wiac hone manac ewec irec dâŋ biŋe muekac. Mume ine ŋic jaŋe dâŋticne qikiŋneeŋgopieŋ.

³³Â dâŋticne mana maŋ ekac e Anutu mume sasanaŋ jukac dâŋ i dopeckekac.

³⁴Anutuzi ŋic sorewec eki Anuture dâŋ jaha muekac. Ŋic iŋucne e Anutuzi Mâro sâc tâmiric qikiŋnecneekac.

³⁵Mamac e Ŋokâ hone ririŋkehuc ere meo wiac sasawa râe‐fârewec.