Johane 2:6-17

⁶Eme fic ira opâ pake 6 ŋewec. Judaŋic jaŋe me sahac‐jeŋic gâbâ ʒure jumbieŋte fic sâc opâ pake iŋuc ŋerawec. Pake i piticne mâcne, kâcɋene sâko.

⁷Eme Jesuzi kiŋaŋ qaqa ʒiŋuc jazawec: “Ŋoŋe opâ fiarâ pakeo qapie huoc.” Eme jaŋe iŋuc erâ opâ qapie hurâ pake micnao qafârewec.

⁸Iŋuc epie ʒiŋuc jazawec: “Ŋoŋe tucne fiarâ nânâ soŋaŋtao baraniŋ.”

⁹Eme jaŋe fiarâ barahapie opâzi waiŋ eme nânâ soŋaŋzi nâhonerâ kâuc bawec. Kiŋaŋ motec opâ fiarâ pakeo qapie huwec jaŋe sawazi waiŋte fuŋne mana tarambiŋ. Eme nânâ soŋaŋzi ŋic ŋokac bawec, e hefârerâ

¹⁰ʒiŋuc âzâcnewec: “Qanaŋ waiŋ aŋacne gumec‐jopapene nâkupie maŋjeŋic bibiriwazo eme ʒâhec waiŋ oomane gumec‐jopaeŋgopeneŋ, hata‐nâŋec iŋuc fokac. Go ine qac qâtikic ehuc aŋacne hefacketec ŋeku ʒâhec fuakac.”

¹¹Jesu e Kana haeo Galilaia mâreŋko ira hâcne mâsi bapa gie‐ticne fuŋkehuc Wofuŋ qâreŋ‐ticnere foŋ bararuŋkewec. Eme motecfâcne jaŋe i honerâ e manasiŋkembiŋ.

¹²Eme Jesu e Kana haeonec Kafanaum haeo rame neŋgoc ɋafâc‐ticne â motecfâc‐ticne mâmâc bâjâperâ rafârembiŋ. Eme ira boc mi jumbiŋ.

¹³Judaŋic aakic hombaŋ‐jeŋic bembeŋkewecte Jesuzi Jerusalem haeo rafewec.

¹⁴Eme taha ufuŋ ʒuhucnao lama bulimakao â hapâ wiac badomahuc nareŋ gareŋ embiŋ, ehuc irec moneŋ teboo wose biric embiŋ.

¹⁵Iŋuc epie Jesuzi honec‐joparâ repa mizeme ʒika eme ŋic mecne lama bulimakao mecne jâpec‐jopame wisepie moneŋ tie‐jarerâ irec tebo herândiŋkewec.

¹⁶Erâ hapâ badomambiŋ jaŋe ʒiŋuc jazawec: “Ŋoŋe Mamac‐nanere ficko wiac kosa mi epie situâc fic ezejec.”

¹⁷Jesu e iŋuc eme motecfâcne jaŋe miti papiao dâŋqâreŋ kecʒiŋuc fokac irec manasumbiŋ: “Gore ficte erâ bunane ʒoc ʒarâ ʒâfitacnukac.”