Johane 20:4-28

⁴Hatao gagasac jaha rahuc âgonezi Petoro âte tariŋkerâ biac ra fisiwec.

⁵Ra fisirâ hawecmaŋko mi raʒihuc mâc okarierâ fime raʒime qoruc râpâ sawa fome honewec.

⁶Ehame Petoro e ʒâhec fisirâ maŋnao raʒirâ qoruc râpâ honewec

⁷â qizec‐ticnere foŋ moc buc bazukicne fome honewec.

⁸Iŋuc eme motec âgo‐ticne bâbâni ʒâŋeruŋko fisiwec eki raʒirâ iŋuc jaha hone‐fârerâ manapaŋkewec.

⁹Juwicnao ine jahe Jesuzi hâmockonec ɋârerâ fahareocte miti papiao findaŋdâŋ fowec i mi mana tarapic.

¹⁰Eme jahe haeo mocwâc risie rapic.

¹¹Eme Maria eki ʒâŋeruŋ sahacnao domahuc kiowec; kiohuc ra motâcko okarierâ ʒâŋeruŋko fime raʒime

¹²aŋelo jajahec ŋaqi qaŋqaŋhec Jesure qâŋɋâŋ fofotacnao ŋepire honec‐jofawec, moc e qizecne fowecko â moc e kikene fowecko ŋewec.

¹³Eme jahe mupic: “Ŋokac, go wemocte kiokomec?” Eme eki muwec: “Wofuŋ‐nanere qâŋɋâŋ mocko bawisepie basakopac.”

¹⁴Iŋuc murâ forisierâ Jesu jahacne honewec. Honerâ Jesu hawarine mi hone tarawec.

¹⁵Eme Jesuzi wiocnerâ muwec: “Ŋokac, go wemocte kiokomec? Mo basakic?” Eme eki jufu runezi domakac muhuc ʒiŋuc âzâcnewec: “Ŋicbomboŋ‐nane, goki qâŋɋâŋ mocko bara râemecko mutec manarâ ra rozepac.”

¹⁶Eme Jesuzi muwec, “Maria.” Mume e forisierâ Judadâŋko “Rabuni” muwec, nâŋâcne dâŋko qaqazu.

¹⁷Eme Jesuzi ʒiŋuc âzâcnewec: “Bâua basanaŋ mi enarec. No Mamactao miŋecnea fepemu i! Go rarâ qomâfâc‐nane ʒiŋuc jazac: Nore Mamaczi ŋoŋere Mamac, â nore Anutuzi ŋoŋere Anutu, eme erao hâcne fepemu.”

¹⁸Eme Maria Madala haeoneczi risie rarâ motecfâcne ʒiŋuc jazawec: “No Wofuŋ honepe dâŋ iŋuc nazajec.”

¹⁹Eme Sonda hae ŋafeme motec jaŋe Judaŋic jaŋere hâwic‐jopame tumaŋnerâ ficmotâc ki bafârerâ ŋembiŋ. Ŋehapie Jesu e ŋondeŋ‐jeŋicko fuarâ domahuc jazawec: “Wama ŋoŋerao fozejec.”

²⁰Iŋuc murâ mejahecne â tambaraŋne jowatuwec. Eme motec jaŋe Wofuŋ honerâ bujeŋic biaŋkewec.

²¹Eme harierâ jazawec: “Wama ŋoŋerao fozejec. Mamaczi no sorecnuwec iŋuc jaha noni ŋoŋe sorec‐ŋopakopac.”

²²Iŋuc murâ ficnec‐joparâ muwec: “Tiri Mâro ro maŋ eniŋ,

²³ŋoŋe ŋic sâqocne‐jeŋic mutâmirepie tâmire‐jareocmu, mi mutâmirepie fojareocmu.”

²⁴Motec âgo‐jeŋic moc ʒâŋene Toma, ʒâŋene moc Didimo, eki mocko juhame Jesuzi fua‐jarewec.

²⁵Eme motec âgofâcne jaŋe biŋedâŋ ʒiŋuc âzâcnembiŋ: “Nâŋe Wofuŋ honembeneŋ.” Iŋuc mupie muwec: “No nahac ʒâŋe jâmbâŋ‐nanezi menao biriŋ râfu honerâ menanezi râfu bahonerâ tambaraŋne bâuarâ dâŋŋeŋic manape fârine eocmu.”

²⁶Sonda mocwâc fuame motec jaŋe Tomahec mâmâc ficko qâzuckerâ motâc ki bafârerâ ŋembiŋ. Ŋehapie Jesu e ŋondeŋ‐jeŋicko mocwâc fuarâ domahuc jazawec: “Wama ŋoŋerao fozejec.”

²⁷Iŋuc murâ Toma âzâcnewec: “Go memotecgezi menane bahonec â mege sicnerâ tambaraŋ‐naneo râec, erâ maŋjahec mocwâc mi ehuc manasiŋnuzemec.”

²⁸Eme Tomazi muwec: “Go Wofuŋ‐nane â Anutu‐nane.”