Joaancha Laenai 8:18-30

¹⁸Nirijieeinna coaaraneein aitoon, nii caletoaera Ofate cajiniichaain coaaraneein ne. Nii jaun quesenetaaichenetene,” naa Jesosone jaunte:

¹⁹“Aanca aihane nii chaca,” naain bajaauruhane jana: “Cacoitucueneeichene jaun, Ofa coitucuheeiche. Cacoitucuhichene jana nihanete, Ofa netonai coitucuriquiche,”

²⁰naain relanajae Jesoso, nii ita taojiaauruhana jaan loreri Teenforo asaae, nii coriqui teeuruha cachaaurune jaaun neein. Niritoha Jesosone jaunte mucuhin enoanaa jerecure. Nete enoaaurene, jaiti nitohaneein teeuruhane jaan cojohinaca que turuenihana jaun.

²¹Nii baihate coaiteen aitiin: “Inae amuhanune baihate cariirijieriquicheein inacojoeein. Nete inara osa caaun cauhacha neein oriquicheein, nii cuhanune jaun cunaa naineneeichene jaun,” naa Jesosone jaun:

²²“Jerihanete raajenihane nesohin nijiaonreein. Nii jaunte nii cunajaun cuenerihacacheeine que aite,” naain ita rai ereereecuruha Jorioocuruna jaun:

²³“Inarate, caa chauratane que neeiniquiche. Canuna jana, cana choae caje nenaa neeinneeun.

²⁴Nii jaunte oha curiquicheein osa caaun, canuneein nihanune esenetaeneeichene jaun,” naa Cana Coaunera Calaohi Jesosone jana:

²⁵“Chaneeina jian,” naain bajaauruha Jorioocurune jana: “Inae inara rai aitocoaacaaun turuhanune caje coauneein.

²⁶Niha arajiin erenaa inara rai quiicha beenei. Nii caletoaerate rauhijiriin esinae aite. Cauricho que aonacaaunna jaunna jerichanetojoeein beebejeeun, caa chauratane que neniquichene rai,” naa Cana Coaunera Calaohi Jesosone

²⁷janate coitucusichurene, “Naaonjoain Cana Coaunera quete aitera,” naain coitucuurenihane jaun.

²⁸Nitohaneein coitucuurenihana jaunte: “Inara araaineein nihanu natiinte, enuha que ecuu canu nujuateein canu chujuuraa curiquicheein. Nii banate Curisitoneein nihanune coitucuhin, casuujua caje rocohin aitenihanune coitucuha curiquicheein. Acaihanejein carelaa Ofa Cana Coaunerana jaan que aitocoaaunne coitucuha curiquicheein.

²⁹Chabana jelai caratirihei caletoaera Ofa, niicha jerenohin ichacaaunna jaun,”

³⁰naa Cana Coaunera Calaohi Jesosone jaunte esenetaaure arajiin cachaauru.