Joaancha Laenai 8:1-25

¹Nii janate acaauru que janoriin, naain Oliboneein curuajaain nenaa atane ucuuno cue Cana Coaunera Calaohi Jesoso.

²Inae janohane janate naain Jerosaleeun cauha cue, coaiteen enacoaauneein cuu nenaa Teenforo asaae enohane coina. Nii janate rene turuhajeeuruha arajii cachaaurune jaun, nelauriaain relanajae Jesoso.

³Nii janate nejelau quicha que nicharatihane jana ene cojoaeloroe eruhin, mucuhin, tajiha turuaa uure, Cana Coaunera aitoonjoa que cacha relaaurera fariseeocuru.

⁴Nitohaneein turuaainte, nii cuu nenacaauru cataaun teein: “Naaojoaain nejelau quicha ainane janana, caa ene eruhin mucuhin uhaacaanura cacha relaera.

⁵Cana Quiricha Inoaesi cuhanete laenaain cana rai rauhin teein letoaelu Moisesa, nitohaniha ene cojoaelorohe ne, sohin jaohacache ajeri que botosiine coina. ‘Tonaai jana ii,’ ”

⁶naain bajaaure, nii ene sohin joaeratenaa jerenihane coulurujueeuruhane coina. Nii janate acaauru tonoraelanaala notoroaain, biji couturi que atane laenaje.

⁷Nii janate cuu tonoranajae lanaala atane laenajiha biji couturi quene jana, cuu jeelai coaineeinejeein bajaebajaecuruhana jaun, couturi michuriin: “Niha cau leinjiin inara jana osa que lanaala, chabana baaso ichae lanaala nenaa ne, nii ichoaechaniha focoine ajeri que,”

⁸naain coaiteen notoroaain atane laenaje biji couturi que Jesoso.

⁹Niritoha Jesosone jaunte, aihuru bana acaauru netonai baaso ichacuruhana jaun, acaauru suujua que tacaana jaun, coejeein, biinaa que ichoaichaain leinjihana leinjihanaain mituhin cauha cuure. Inae satiin mituhin amuuruha nii ene coulurujueurerana jaun, nii eneecha que jerajejeein neeorihana jaun,

¹⁰nimichuhin nichauraain: “Aancaauruche icholurueraauruta. Ta ishohin ijiaohache chuneine,” naain nii ene caje bajaa Jesosone janate:

¹¹“Aiheicheta curuaanaa. Nihei casohin cajaohiche chuneita,” naa nii enene jana: “Niheichu, canu niha natiin chatohaneein cheteein, ishohin ijiaonaa nainihaaunche. Inae caunichuche. Jiaonriha caa baiha coaiteen nosateichenera,” naain nii ene jiane Jesoso.

¹²Nii baihate coaiteen cachaauru rai beebeje Jesoso: “Canuna caa chauratane que nenacaauru cononeein neeunra. Quere esenetaerate ichaonaa tera cono siricheein. Chabana nocohenaanau amuhemuheriaain,” naa Cana Coaunera Calaohi Jesosone janate:

¹³“Nohaneeicha. Ichaajenihane aitiinte aitohicha. Nii jaun chaque nelatihei nii aitohine jaanta,” naauruha fariseeocurune jana:

¹⁴“Caraajenihane aitiin aitocoaaunne niha natiinte, nelate quere. Canuna nii uhanuluna jaan jelai coitucuun. Jana inara coitucuheeiche. Niheichu canu cunajaanu coitucuheeiche.

¹⁵Nechu jataain Cana Coaunera coitucueneeichene jaunte, joaenreein inara suujua cuaaichene jaun, joaenreein ereereequiche. Aanca chunei coulurujuerichaaun canu.

¹⁶Canu, cacha coulurujianunete, esinae rauhijiriin coulurujuenojoineei ne, canuhacha jelai caitono nenihana jaun, caletoaera Cana Inaca aina aitocoaunna jaun.

¹⁷Charijieein teeinti ‘Ita rijiitojoeein ereeuruha coroatajai coaraaurune, esenetaacache nete ne,’ naain aite inara quiricha inoaesi cuhane, nitohaneein ichaquichene coina.

¹⁸Nirijieeinna coaaraneein aitoon, nii caletoaera Ofate cajiniichaain coaaraneein ne. Nii jaun quesenetaaichenetene,” naa Jesosone jaunte:

¹⁹“Aanca aihane nii chaca,” naain bajaauruhane jana: “Cacoitucueneeichene jaun, Ofa coitucuheeiche. Cacoitucuhichene jana nihanete, Ofa netonai coitucuriquiche,”

²⁰naain relanajae Jesoso, nii ita taojiaauruhana jaan loreri Teenforo asaae, nii coriqui teeuruha cachaaurune jaaun neein. Niritoha Jesosone jaunte mucuhin enoanaa jerecure. Nete enoaaurene, jaiti nitohaneein teeuruhane jaan cojohinaca que turuenihana jaun.

²¹Nii baihate coaiteen aitiin: “Inae amuhanune baihate cariirijieriquicheein inacojoeein. Nete inara osa caaun cauhacha neein oriquicheein, nii cuhanune jaun cunaa naineneeichene jaun,” naa Jesosone jaun:

²²“Jerihanete raajenihane nesohin nijiaonreein. Nii jaunte nii cunajaun cuenerihacacheeine que aite,” naain ita rai ereereecuruha Jorioocuruna jaun:

²³“Inarate, caa chauratane que neeiniquiche. Canuna jana, cana choae caje nenaa neeinneeun.

²⁴Nii jaunte oha curiquicheein osa caaun, canuneein nihanune esenetaeneeichene jaun,” naa Cana Coaunera Calaohi Jesosone jana:

²⁵“Chaneeina jian,” naain bajaauruha Jorioocurune jana: “Inae inara rai aitocoaacaaun turuhanune caje coauneein.