Joaŋ 8:35-59

³⁵Saklŋwaga oc êŋgôŋ andu endeŋ tôŋgeŋ atom, latu tec êŋgôŋ endeŋ tôŋgeŋ.

³⁶Latu embe eŋgamboac amac su, ôc tec amoa nêm lêtêgeŋ.

³⁷Aê kajalagac gebe Abrahamnê wakuc amac, mago amac adib abe anac aê andu ŋam gebe aêŋoc biŋ wackêsêp amacnêm ŋalêlôm atom.

³⁸Gêŋ taŋ aê galic aŋga Tamocnê naŋ, tec kasôm. Ma biŋ, taŋ amac aŋô aŋga tameminê naŋ, tec agôm amboac tonaŋgeŋ.”

³⁹Ma êsêac sêjô eŋ awa gebe “Tamemai Abraham.” Tec Jesu kêsôm gêdêŋ êsêac gebe “Embe Abrahamnê ŋapalê amac, naŋ aŋgôm gêŋ atôm Abraham acgom,

⁴⁰ma galoc amac adib abe anac aê êndu. Aê kasôm biŋŋanô, taŋ gaŋô aŋga Anôtônê naŋ, gêdêŋ amac, tec abe anac aê. Abraham gêgôm gêŋ amboac tonaŋ atom.

⁴¹Amac agôm tameminê geŋ.” Ma êsêac sêsôm gêdêŋ eŋ gebe “Mockaiŋ teŋ kêka aêac lasê atom, aêac tamemai tageŋ tec gêmoa, eŋ Anôtô.”

⁴²Tec Jesu kêsôm gêdêŋ êsêac gebe “Anôtô embe amac tamemi, oc têmtac êwiŋ aê, gebe aê kasa aŋga Anôtônê, ma aŋga ênê tec gamêŋ. Tauc kakac tauc tec gamêŋ nec atom. Ŋac tau tônê kêsakiŋ aê gamêŋ.

⁴³Ambôac ondoc tec nêm kauc kêsa kêpi aêŋoc biŋ atom. Ŋam gebe amac akêŋ taŋem aêŋoc biŋ akêtôm atom.

⁴⁴Amac tamemi Sadaŋ tau, ma sec, taŋ kêkac tameminê ŋalêlôm naŋ, abe aŋgôm ŋanô êsa. Ŋac tau tonaŋ tôc andaŋgeŋ kêtu gêjac-ŋamalac-ênduwaga ma eŋ gêmoa biŋŋanô ŋalêlôm atom, gebe biŋŋanô gêc eŋŋa atom. Embe êsôm biŋdansaŋ, oc êsôm tau nê geŋ, gebe dansaŋtênato dansaŋmôkê eŋ.

⁴⁵Mago aê kasôm biŋŋanô, tec akêŋ gêwiŋ aê atom.

⁴⁶Amacnêm asa oc eoc aêŋoc geo teŋ lasê. Aê embe jasôm blgŋanô, ma amboac ondoc tec akêŋ êwiŋ aê atom.

⁴⁷Ŋac taŋ aŋga Anôtônê naŋ, gêŋô Anôtônê biŋ. Amac aŋga Anôtônê atom, tec aŋô ênê biŋ atom.”

⁴⁸Juda sêjô eŋ awa gebe “Aêac asôm gebe aôm ŋac Samariaŋa teŋ, tec ŋalau sec teŋ gêôc aôm nec. Aêac asôm jagêdêŋ me masi.”

⁴⁹Tec Jesu gêjô êsêac aweŋ gebe “Ŋalau sec teŋ gêôc aê atom. Aê katoc Tamoc sa, mago amac agôm aê êndu-êndugeŋ.

⁵⁰Tauc gasom waec atom. Ŋac taŋ gesom ŋoc waec ma kêmêtôc biŋ naŋ, tec gêmoa.

⁵¹Biŋŋanô, aê jasom tobiŋŋanôgeŋ êndêŋ amac gebe Ŋac teŋ embe êmansaŋ aêŋoc biŋ êtu tôŋ, oc êlic gêmacanô atom endeŋ tôŋgeŋ.”

⁵²Ma Juda sêsôm gêdêŋ eŋ gebe “Galoc aêac ajala ŋanôgeŋ gebe ŋalau sec teŋ gêôc aôm. Abraham to propete sêmac êndu, mago aôm kôsôm gebe ‘Ŋac teŋ embe êmansaŋ aêŋoc biŋ êtu tôŋ, oc ênsaê gêmacanô atom endeŋ tôŋgeŋ.’

⁵³Aôm kôlêlêc tamemai Abraham, taŋ gêmac êndu naŋ su me. Ma propete sêmac êndu. Aôm gobe ôŋgôm taôm amboac asa.”

⁵⁴Tec Jesu gêjô êsêac aweŋ gebe “Embe jaŋgôm tauc waec êsa, oc ŋoc waec ŋanô masi. Tamoc taŋ amac asôm gebe nêm Anôtô eŋ naŋ, tec gêgôm aê waec kêsa.

⁵⁵Amac ajala eŋ atom, mago aê tec kajala eŋgac. Aê embe jasôm gebe Kajala eŋ atom, oc jatu dansaŋtêna teŋ jatôm amac. Mago aê kajala eŋ tec kamasaŋ ênê biŋ gamoa.

⁵⁶Tamemi Abraham têtac ŋajam gebe êlic aêŋoc bêc e gêlic ma kêtu samuc.”

⁵⁷Ma Juda sêsôm gêdêŋ eŋ gebe “Aômnêm jala kêtôm 50 su atom, ma gôlic Abraham amboac ondoc.”

⁵⁸Tec Jesu kêsôm gêdêŋ êsêac gebe “Biŋŋanô, aê jasôm tobiŋŋanôgeŋ êndêŋ amac gebe Abraham têna kêkôc eŋ atomgeŋ, ma aê gamoa.”

⁵⁹Ma êsêac sejoŋ poc sa sebe têtuc eŋ. Tec Jesu kêtaiŋ tau su aŋga lôm dabuŋ kêsa awê gêja.