Joaŋ 7:4-23

⁴Ŋac teŋ embe taê ênam gebe nê wae êtu tapa, naŋ êŋgôm nê gêŋ ênêc lêlômgeŋ atom. Embe ôŋgôm nêm kôm teŋ, go ôtu awê êndêŋ lau samob sêlic.”

⁵Lasii sêsôm biŋ tonaŋ gebe sêkêŋ gêwiŋ eŋ atom amboac tonaŋ.

⁶Tec Jesu kêsôm gêdêŋ êsêac gebe “Aêŋoc noc kêdabiŋ atom tageŋ, êmacgeŋ nêm noc tec gêc ŋapaŋ.

⁷Lau nomŋa têntac gedec amac atom, têntac gedec aêgeŋ, gebe gawa êsêac sa gebe nêŋ kôm keso.

⁸Taôm api ana alic om. Aê tec oc japi jawac êndêŋ om tonec atom tageŋ, gebe aêŋoc noc kêdabiŋ atom.”

⁹Biŋ tonaŋ kêsôm gêdêŋ êsêac su ma gêmoa Galilaia.

¹⁰Lasii sêpi sêja su sebe sêlic om, go eŋ kêpi gêja amboac tonaŋ, mago gêmoa awê atom, kêsiŋ taugeŋ.

¹¹Gêdêŋ om tau Juda sesom eŋ ma sêsôm gebe “Ŋac tau gêmoa ondoc.”

¹²Lau taêsam sêli aweŋ sa kêtu eŋŋa. Ŋagêdô sêsôm gebe “Eŋ ŋac ŋajam”, ma ŋagêdô sêsôm gebe “Masi, eŋ kêsau lau.”

¹³Biŋ tonaŋ kêpi eŋ, tec êsêacnêŋ teŋ kêsôm kêtu awê atom, gebe samob têtêc Juda.

¹⁴Sêlic om e sêkô luŋgeŋ, go Jesu kêpi lôm dabuŋ jakêdôŋ mêtê gêdêŋ êsêac.

¹⁵Tec Juda sêŋac lemeŋ ma sêsôm gebe “Ŋac tônê kêjala mêtê amboac ondoc, têdôŋ eŋ atom nec.”

¹⁶Ma Jesu gêjô êsêac aweŋ gebe “Aêŋoc mêtê kêtu tauc êôc gêŋ atom, ŋac taŋ kêsakiŋ aê gamêŋ naŋ, nê gêŋ.

¹⁷Teŋ embe taê ênam gebe êŋgôm Anôtônê biŋ êtu tôŋ, oc êjala ŋoc mêtê ŋam gebe aŋga Anôtônê me aê kasôm tauc ŋoc biŋ.

¹⁸Ŋac taŋ kêsôm tau nê biŋ naŋ, gebe êŋgôm tau nê wae êsa. Ma ŋac taŋ gebe êŋgôm ŋac-kêsakiŋeŋwaga nê wae êsa naŋ, eŋ ŋac biŋŋanôŋa ma keso teŋ gêc eŋŋa atom.

¹⁹Mose kêkêŋ biŋsu gêdêŋ amac atom me. Mago amacnêm teŋ kêmasaŋ kêtu tôŋ atom. Ma amac adib aê abe anac aê êndu êtu asageŋŋa.”

²⁰Lau tau sêjô eŋ awa gebe “Ŋalau sec gêgôm aôm. Asa gebe ênac aôm êndu.”

²¹Tec Jesu gêjô êsêac aweŋ gebe “Aê gajam koleŋ tageŋ ma amac samob êŋac lemem.

²²Mose kêsakiŋ amac gebe asa ŋapalê, (lêŋ tau kê a aŋga Mosenê atom, gelom aŋga abeminêŋ,) tec amac êsa lau gêdêŋ sabat amboac tonaŋ.

²³Embe sêsa ŋac teŋ êndêŋ sabat gebe senseŋ Mosenê biŋsu su atom, ma amboac ondoc tec têmtac ŋandaŋ gêdêŋ aê gebe gagôm ŋac teŋ ôli samucgeŋ ŋajam kêsa gêdêŋ sabat.