Joaŋ 6:5-18

⁵Jesu gêôc mataanô sa e gêlic lau taêsam dêdêŋ eŋ, ma kêsôm gêdêŋ Pilip gebe “Aêac tanam ôli mo aŋga ondoc gebe lau tonec sêniŋ.”

⁶Biŋ tonaŋ Jesu kêsôm gebe ênsaê eŋ, gebe tau kêjala gêŋ, taŋ gebe êŋgômŋa naŋ.

⁷Ma Pilip gêjô eŋ awa gebe “Aêac embe tanam ôli mo ŋa denari 200 ma mêŋtakêŋ ŋagec-ŋagec êndêŋ êsêac êndêŋ-êndêŋgeŋ, mago oc êtôm atom.”

⁸Go ênê ŋacseŋominêŋ teŋ, Simon Petere lasi Andrea, kêsôm gadêŋ eŋ gebe

⁹“Ŋapalê teŋ kêkôc mo lemeŋ teŋ ma i luagêc tec gêmoa, mago gêŋ tecenec oc êtôm lau taêsam tonec ŋai amboac ondoc.”

¹⁰Go Jesu kêsôm gebe “Asôm gebe lau sêŋgôŋ sic.” Aŋga gamêŋ tonaŋ gêgwaŋ taêsam gêc. Amboac tonaŋ lau, taŋ sêŋgôŋ sic naŋ, amboac 5,000.

¹¹Go Jesu kêkôc mo ma gêjam daŋge, go gêjac sam gêdêŋ lau, taŋ sêŋgôŋ naŋ, ma gêgôm i amboac tonaŋgeŋ gebe sêniŋ êtôm têntac êwiŋ.

¹²Seŋ e gêôc êsêac tôŋ, go kêsôm gêdêŋ nê ŋacseŋomi gebe “Anac ŋagêdôgêdô sa, gebe teŋ ênaŋa atom.”

¹³Mo lemeŋ teŋgeŋ tecenaŋ, mago lau seŋ e dedec ŋagêdô-gêdô gêcŋa, go sêjac sa kêsêp gadob 12 e mêŋgêc.

¹⁴Ŋamalac sêlic gêŋtalô, taŋ eŋ gêgôm naŋ, tec sêsôm gebe “Propete taŋ êmêŋ nom naŋ ŋac tau tonec biŋŋanôgoc.”

¹⁵Jesu kêjala gebe êsêac sebe sêmêŋ sêjaŋgo eŋ su ma sêkêŋ eŋ êtu nêŋ kiŋ, tec kêtaiŋ taugeŋ gêc kêpi lôc gêja.

¹⁶Kêtula, go nê ŋacseŋomi sêsêp bugêjactoŋ sêja

¹⁷e sêpi waŋ teŋ sebe sêlac sêna Kapanaum. Gamêŋ ŋakesec kêsa su, mago Jesu gêô lasê êsêac atom tageŋ,

¹⁸ma mu gêbuc ŋatêna e ŋadembom secanô.