Joaŋ 6:36-59

³⁶“Aê tec kasôm gêdêŋ amac su gebe Amac alic aêgac, mago akêŋ gêwiŋ atom.

³⁷Gêŋ samob, taŋ Tamoc kêkêŋ gêdêŋ aê naŋ, oc êndêŋ aê êmêŋ ma ŋac teŋ embe êndêŋ aê êmêŋ, oc jamasuc eŋ atom.

³⁸Aê kasêp aŋga undambê gamêŋ gebe jaŋgôm tauc ŋoc biŋ êtu tôŋ atom, jaŋgôm ŋac-kêsakiŋaêwaga nê biŋ êtu tôŋ.

³⁹Ma ŋackêsakiŋ-aêwaga tau nê biŋ amboac tonec gebe gêŋ samob, taŋ kêkêŋ gêdêŋ aêŋa naŋ, janam ŋateŋ sapu atom, jaŋu samob sêndi sa êndêŋ bêc ŋamuŋa.

⁴⁰Tamocnê biŋ tau tonec gebe lau samob, taŋ sêlic Latu ma sêkêŋ gêwiŋ eŋ naŋ, gêŋgôŋ mateŋ jali teŋgeŋ ma aê êŋu êsêac sêndi ŋa êndêŋ bêc ŋamuŋa.”

⁴¹Juda sêli aweŋ sa kêtu biŋ, taŋ kêsôm gebe “Aê mo kasêp aŋga undambê gamêŋ naŋŋa.”

⁴²Ma êsêac sêsôm gebe “Ŋac tonec Josep latu Jesu me masi. Têna agêc tama tec tajalagac. Ma amboac ondoc tec galoc eŋ kêsôm gebe Aê kasêp aŋga undambê gamêŋ nec.”

⁴³Tec Jesu gêjô êsêac aweŋ gebe “Ali awem sa atom.

⁴⁴Ŋac teŋ kêtôm gebe tau êndêŋ aê êmêŋ atom. Tamoc taŋ kêsakiŋ aê gamêŋ naŋ, embe ê eŋ, go aê jaŋu eŋ êndi sa êndêŋ bêc ŋamuŋa.

⁴⁵Teto gêc propetenêŋ buku gebe ‘Anôtô oc êndôŋ ŋamalac samob.’ Ma samob, taŋ sêŋô Tamocnê biŋ ma sêkôc kauc aŋga ênê naŋ, tec dêdêŋ aê sêmêŋ.

⁴⁶Teŋ gêlic Tamoc atom, ŋac tageŋ, taŋ kêsa aŋga Anôtô tau nê naŋ, taugeŋ tec gêlic tama.

⁴⁷Biŋŋanô, aê jasôm tobiŋŋanôgeŋ êndêŋ amac gebe Eŋ taŋ kêkêŋ gêwiŋ naŋ, gêŋgôŋ mata jali teŋgeŋ.

⁴⁸Mo ŋamalac gêŋgôŋ mateŋ jaliŋa aê.

⁴⁹Tamemi seŋ mana aŋga gamêŋ sawa, mago sêmac êndu.

⁵⁰Mo tecenec kêsêp aŋga undambê gêmêŋ gebe teŋ embe êniŋ oc êmac êndu atom.

⁵¹Mo mata jali, taŋ kêsêp aŋga undambê gêmêŋ naŋ aê. Ŋamalac teŋ embe êniŋ mo tau tonec, oc êŋgôŋ mata jali teŋgeŋ. Ma mo tau, taŋ aê jakêŋ naŋ, tauc ôlic tec jakêŋ gebe ŋamalac samob sêŋgôŋ mateŋ jali.”

⁵²Judawaga aweŋsuŋ gêôc ka tauŋ ma sêsôm gebe “Amboac ondoc, ŋac tonec kêtôm gebe êkêŋ nê ôli aêac taniŋ me.”

⁵³Tec Jesu kêsôm gêdêŋ êsêac gebe “Biŋŋanô, aê jasôm tobiŋŋanôgeŋ êndêŋ amac gebe Amac embe aniŋ Ŋamalacnê Latunê ôli to anôm ênê dec atom, oc matem jali ŋam ênêc amacŋa atom.

⁵⁴Eŋ taŋ geŋ aêŋoc ôlic to gênôm aêŋoc dec naŋ, gêŋgôŋ mata jali teŋgeŋ, ma aê oc jaŋu eŋ sa êndê bêc ŋamuŋa,

⁵⁵gebe aêŋoc ôlic kêtu gêŋ taniŋŋa ŋanô tau, ma aêŋoc dec kêtu gêŋ tanômŋa ŋanô tau.

⁵⁶Eŋ taŋ geŋ aêŋoc ôlic to gênôm aêŋoc dec naŋ, gêmoa aê ŋalelôm ma aê gamoa eŋ ŋalêlôm.

⁵⁷Tamoc mata jali kêsakiŋ aê gamêŋ, ma aê tec gamoa matoc jali kêtu Tamocŋa. Ma eŋ taŋ geŋ aê naŋ, êŋgôŋ mata jali êtu aêŋa amboac tonaŋgeŋ.

⁵⁸Mo tau, taŋ kêsêp aŋga undambê gêmêŋ naŋ, kêtôm mo, taŋ tamemi seŋ-seŋ ma sêmac êndu naŋ atom. Eŋ taŋ geŋ mo tonaŋ êŋgôŋ mata jali teŋgeŋ.”

⁵⁹Biŋ tonaŋ Jesu kêsôm gêdêŋ kêdôŋ mêtê gêmoa lôm Kapanaumŋa.