João 8:1-14

¹Jesus pit o'ju co'a kay―Oliveira dip'a kay.

²Kabia isum Jesus waram o'jepit Deus eju kawẽnwẽnap'a be―yabog̃at'a be. Adeayũ o'je'awero Jesus ekawẽn co pin puye. Ixe oabik. Adeayũ mutaybitbin o'e.

³G̃ebuje Fariseuyũ eju Moisés ekawẽn imutaybitbin'ukayũ ayacat o'tojot Jesus kay. Ayacat itoptep ma'g̃u osunuy. Inaka warara'acat itop kay itabiku osunuy. Warara'acat itop eju o'tobuxik ip Fariseuyũ. O'tojot ip Jesus kay. Adeayũ etabutpe ip o'tojot.

⁴— Kariwa — io'e ip Jesus pe. — Ite ayacat ocetobuxik wara'acat itop eju. Imẽnpuye ocetojot ekay — io'e ip.

⁵— Moisés o'e wuydobuyũ'ũm'ũm pe: “Wara'acat itop eju jepopomat cuy epeyabug̃bug̃ wita'am,” i. Imẽn Moisés ocemutaybitbin. Pãm ẽn? Apẽn ẽn ece'e? — io'e ip Jesus pe.

⁶Imẽn o'e ip Jesus pe. Tũybe cũg̃'ũma jede iãn o'e ip. “Cũg̃ g̃u ẽn e'em,” i'e ojuy ip Jesus pe. “Moisés ekawẽn tag̃ g̃u ẽn e'em,” i'e ojuy ip cebe. Jesus o'je'aetoro. Ipi mukorepkorem o'e jebum. Koreh. Yatoroh ipi mukorepkorem o'e.

⁷— Apẽn ẽn ece'e? — io'e ip waram. Kirik'ãy. O'ãy. — Ey'inat ikẽrẽat kug̃'ũm pima, ixe juy koam wita'a yamuju cekay ayacat abug̃ am — io'e Jesus cebe ip.

⁸Waram o'je'aetoro. Waram jebum ipi mukorepkorem. Koreh.

⁹O'jẽm ip cekawẽn co buje. Koap aypapayũ o'jẽm õn tak ikẽrẽat kug̃ iam itaybit puye. Warit. Xerewun. Wara'at. Xerewun. Wara'at. Xerewun. G̃uyjom warara'acayũ o'jẽm yaypan'isuayũ. Warit. Xerewun. Wara'at. Xerewun. Soat ip o'jẽm. Jesus acã o'jepoyat. Ayacat Jesus xe o'e cũg̃'i.

¹⁰Kirik'ãy. Jesus o'ãy. O'jeak ayacat kay. — Tũ'ũ — io'e. — Apõma o'ju ip “Ẽn ma ikẽrẽat kug̃ cĩcã Deus xe,” i'e ojuyayũ? “G̃a'a ayaoka wita'am,” i'e ojuyayũ? — io'e―Jesus o'e.

¹¹— Kariwa — io'e. — Ka'ũmg̃u ip — io'e. — O'jẽm ip — io'e. — Weiwat xeyũku. — “Ikẽrẽat kug̃ cĩcã ẽn,” i'ũmg̃u õn tak e'em ewebe — io'e Jesus. — Eju juy — io'e. — Waram pit eg̃ujurũg̃ g̃u ikẽrẽat — io'e Jesus.

¹²Waram pima Jesus o'jekawẽn adeayũ eju. — Kabia buxim õn — io'e. — Deus ekawẽn eymutaybitbin õn cũg̃ ma eyeku am. Okay itabucayũ kabiok tag̃ jekuku'ukayũ buxim g̃u. Ikẽrẽat mujurũg̃rũg̃'uk g̃u ip. Cũg̃ ma ip jekukum kabia dag̃ jekuku'ukat puxim. Yag̃uyisum jekukum ip — io'e.

¹³— Ẽn acã xipan jewemuwẽnuwẽn — io'e Fariseuyũ. — Cũg̃ g̃u ẽn kawẽnwẽn — io'e ip napa ma.

¹⁴— Cũg̃ ma õn kawẽnwẽn — io'e Jesus. — Eyetaybit g̃u pomawi ojot iam, poma õn cum iam tak — io'e. — Õn pit wetaybit pomawi ojot iam, poma õn cum iam tak — io'e. — Cũg̃ ma õn kawẽnwẽn wetaybit puye — io'e.