João 7:2-51

²Juteu tõ otuhtoh konõto okynahkopyra toehse. Otuhtoh esety Tãtome tyrityamo.

³Ynara tykase Jezu akorõ tõ eya, —Ytoko taroino Jutea pona. Opoetory tomo a ajamitunuru enepota, tykase toto.

⁴—Oty katoh taro rokẽ otonẽnõko mahno kure oexiry ekãtopory se awahtao? tykase toto, typoihtose eya xine.

⁵(Zakorõ tõ roropa onenetupuhpyra kynexine.)

⁶Ynara tykase Jezu eya xine, —Jytotohpo pyra ro mana. Oytotohkõ emero rokẽ kure oya xine mana,

⁷Ritonõpo zehno exiketõ ozehno xine pyra exiryke. Yrome yzehno toh mana. “Iirypyryme matose popyra ipunaka,” karyke ya eya xine. Moro poko jotururuke mã yzehno toto.

⁸Otuhtoh pona ytotoko. Ytopyra ase aporo jytotohpo pyra ro exiryke, tykase Jezu eya xine.

⁹Morarame morara kaxĩpo moroto rokẽ ehse Jezu kynexine Karirea po.

¹⁰Morotoino zakorõ tõ toytose ahtao Jezu roropa toytose otuhtoh konõto pona, okomino. Tokare pyra toytose ynororo.

¹¹Morarame otuhtoh konõto po tupise juteu tõ tuisary tomo a repe. Yrome osenepopyra toehse ynororo. —Otoko nae? tykase toto, tokaropose.

¹²Putiputime tõturuse toto itamurume Jezu poko imoihmãkõ rãtao. —Kurã mokyro, tykase toto, emero pyra. —Arypyra, tykase imehnomo. —Onekunohtõ rokẽ mokyro, tykase toto.

¹³Yrome aryhnaka oturupyra toto, juteu tõ tuisary zuno toexirykõke.

¹⁴Morarame otuhtoh konõto irãnaka toehse ahtao, Jezu toytose Ritonõpo maro oturutoh taka ahno amorepase.

¹⁵Aomiry etaryke tyya xine tõsenuruhkase juteu tõ tuisary, —Otokoino mose amorepato toehse nae? Atamorepatoh taka ytopitopyra mana, tykase toto.

¹⁶Tozuhse toto Jezu a, —Jamoreme amorepato pyra ase. Ritonõpo poe rokẽ ãmorepatorỹko ase, eya tonehpose jexiryke.

¹⁷Ritonõpo omipona exiketõ rokẽ mã jomiry enetupuhnõko mã toto. Ritonõpo poe jomiry ehtoh enetupuhnõko roropa mã toto Ritonõpo omipona se toexirykõke.

¹⁸—Tamoreme rokẽ oturukety ahtao tõmiry rokẽ eahmãko mana. Yrome tonehpohpõ poe oturukety tonehpohpõ omiry kure tyrĩko mana. Mokyro ajohpe pyra exikety ipunaka.

¹⁹Moeze omihpyry nae matose, Ritonõpo nymeropohpyry eya. Yrome aomipona pyra matose. Oty katoh jetapary kuhnõko matou? tykase Jezu eya xine.

²⁰—Jorokohpe mase, tykase imoihmãkomo. —Onoky oetapary se nahe? tykase toto eya.

²¹Ynara tykase Jezu, —Toiro toerohse ywy oserematohae. Ritonõpo jamitunuru enepoase oya xine. Moro poko mosenuruhkatose.

²²Yrome matose Moeze omi poe omũkurukõ aipotapihpyry sahkãko ro 8me aenurutopõpyry tõmehse ahtao. Oserematohae ro oseremara matose. Aipotapihpyry sahkãko matose Moeze omipona oehtohkõme repe. (Osemazuhme nymyry pyra Moeze a aipotapihpyry tysahkapose. Atamurukomo a osemazuhme tysahkapose.)

²³Oty katohme oserematohae kurãkara kurãkatopõpyry poko ya yzetũ manymyatohse? Morara ahtao yzehno pyra ehtoko.

²⁴“Popyra mase,” kara ehtoko imehnomo a zae aehtoh waro pyra awahtao xine. Ipũkõ enery poko rokẽ oya xine, “Iirypyryme mase,” kara ehtoko imehnomo a, tykase Jezu eya xine.

²⁵Morarame Jerusarẽpõkõ ynara tykase, —Mosero etapary se toh nahe?

²⁶Enetoko ke totasẽme rokẽ oturũko mana. Yrome imehnõ mã onyhxiropyra. Ajohpe pyra hnah, tuisa tõ mosero enetupuhnõko nah Ritonõpo nymenekahpyryhme?

²⁷Yrome Ritonõpo nymenekahpyry tooehse ahtao, ozeino oehnõko nae? Aehtoh waro pyra sytatose exĩko. Yrome mosero oehtopõpyry waro sytatose, tykase toto.

²⁸Morarame toto amoreparyhtao Ritonõpo maro oturutoh tao ynara tykase Jezu opore, —Juaro nymyry hmatohu? Joehtopõpyry waro roropa hmatou ipunaka? Jamoreme oehpyra exine. Jenehpohpõ mã zae rokẽ exikety mokyro. Yrome zuaro pyra matose.

²⁹Zuaro ase, Ritonõpo winoino tooehse jexiryke, inenehpohpyryme jexiryke.

³⁰Morarame Jezu apoiry se toehse toh repe. Yrome anapoipyra toh tokurehse apoitohpo pyra ro exiryke.

³¹Yrome tuhke tonetupuhse imoihmãkomo a. Ynara tykase toto, —Ritonõpo nymenekahpyry imepỹ pyra mana. Orẽpyrahxo rukuh mosero nae Ritonõpo jamitunuru nae, tykase toto ipoko.

³²Morarame imehnõ putiputi kary totase parixeu tomo a Jezu enetuputyry poko. Morara kary etaryke tyya xine Ritonõpo maro oturutoh erase tõ taropose eya xine, Ritonõpo maro oturuketõ tuisary tomo a roropa, taropose toto Jezu apoitohme repe.

³³Morarame ynara tykase Jezu imoihmãkomo a, —Okynã pyra ase amaro xine. Esyryhmãko ropa ase Jenehpohpono a.

³⁴Jupĩko matose. Yrome jenezomopyra matose, jesaka ytosaromepyra oexirykõke, tykase Jezu eya xine.

³⁵Mame oseya rokẽ tõturuse toto juteu tomo, —Azahko ytõko na roropa osenezomopyra toehtohme? Otarãme juteutõkara esaka ytõko mana kuekyrykõ sapararahme exiketõ amorepase. Otarãme juteutõkara amoreparyme ytõko mana, tykase toto oxime rokene.

³⁶—Ynara nase ynororo, “Jupĩko matose. Yrome jenezomopyra matose. Jesaka ytosaromepyra matose,” nykã kyya xine. Otara ãko hko hnae? tykase toto oseya rokene.

³⁷Toipe juteu tõ otuhtoh konõto etyhpyry yronymyryme. Moroto towõse Jezu xikihme toto zurutohme opore. —Tuna se awahtao xine osehtoko. Tuna ẽtokose ya.

³⁸Ynara tymerose pake sero poko Ritonõpo omiryme, “Jenetuputyryhtao oya xine iporiry sararakane sã exĩko mã okurohtao xine,” tykase Jezu eya xine. (“Tuna ẽtokose,” kary, “Wenetupuhtokose,” katopo. “Iporiry sararakane sã mã,” kary, “Ritonõpo zuzenu kure,” katopo.)

³⁹Morara tykase Jezu Tuzenu ekarosasaka Ritonõpo exiryke tonetupuhnanomo a. Tuzenu onekaropitopyra ro Ritonõpo kynexine, Jezu ẽsemãpyra ro exiryke.

⁴⁰Morara kary etaryke imoihmãkomo a ynara tykase toto, —Urutõ nymyry mosero Ritonõpo poe, tykase toto.

⁴¹Imehnõ roropa ynara tykase, —Ritonõpo nymenekahpyry mosero, kukurãkanekõme, tykase. Yrome imehnõ roropa ynara tykase, —Ritonõpo nymenekahpyry kara mosero. Ritonõpo nymenekahpyryme ahtao Karirea po pyra enururu. Berẽ po enururu.

⁴²Ynara karyke Ritonõpo a, “Tawi paryme enurũko Ritonõpo nymenekahpyry. Berẽ po enurũko mana Jutea rãnao, Tawi esaryme Berẽ exiryke,” ãko Ritonõpo omiry, tykase toto.

⁴³Atae pyra toh toehse Jezu poko.

⁴⁴Imehnõ Jezu apoiry se toehse repe. Yrome anapoipyra tokurehse toto.

⁴⁵Morarame toytose ropa toto Ritonõpo maro oturuketõ tuisary tomo a ropa. —Otoko na? Menehtou? tykase toto tõturupose eya xine.

⁴⁶—Arypyra. Kure rokẽ aomiry ynanetano. Morara kane onetapitopyra ynanase, tykase erase tomo tonyokyhpõkomo a.

⁴⁷—To! Oenekunohtou ropa nytãmya? tykase parixeu tomo, morara kary etaryke tyya xine.

⁴⁸—Oesẽkõme ynanase. Tuarohxo exiketõme ynanase. Mokyro Ritonõpo mũkurume onenetupuhpyra ynanase. Parixeu tõ roropa mã mokyro onenetupuhpyra toto Ritonõpo mũkurume.

⁴⁹Yrome mokaro rokẽ mã Moeze nymerohpyry omipona pyra toto. Iirypyryme toto Ritonõpo a. Morara exiryke mã toto wãnohnõko Ritonõpo, tykase toto imoihmãkõ poko.

⁵⁰Nikotemu mokaro maro kynexine, Jezu a aytohpyry koko. Ynara tykase ynororo eya xine,

⁵¹—Moeze omi poe, “Imehnõ popyra mana,” kara sehtone aomiry onetapitopyra kuahtao xine, iirypyrykõ waro pyra roropa kuahtao xine, tykase eya xine.