João 6:36-56

³⁶—Ynara ase oya xine, jenẽko matose repe. Yrome jenetupuhpyra matose ekurehnõko, ase oya xine.

³⁷Ritonõpo nekaroryme awahtao xine ya jenetupuhnõko matose. Ya oehnõko roropa matose emero porehme. Mame ooepyrykohtao ya aaropopyra xine ropa ase jũme.

³⁸Kapu ae jyhtoase jenehpohpõ omipona jehtohme. Jamoreme pyra oepyase.

³⁹Mame ynara se mã jenehpohpõ ya, jenetuputyhpõkõ ahpahpory se pyra mã ya. Imeĩpo toto ẽsemãkapory se ropa mã ya emero porehme, aorihtyã tõ ẽsemãkapotoh ropa po.

⁴⁰Ynara se mã Ritonõpo. Tumũkuru enery se mã roropa imehnomo a enetupuhpotohme eya xine, orihpyra toto ehtohme jũme. Mame toto ẽsemãkãko ropa ase aorihtyã tõ ẽsemãkapotoh ropa po, tykase Jezu juteu tomo a.

⁴¹Morarame moro etaryke tyya xine Jezu tykerekeremase eya xine, “Ywy ase ourukõme kapu ae aepyhpyry,” kary etaryke tyya xine.

⁴²Morara exiryke ynara tykase toto, —Jezu mosero, Joze mũkuru. Jũ waro sytatose. Jẽ waro roropa sytatose. Otara ãkohxo ke hnae? “Kapu ae aepyhpyry ase,” ãko. Epyrypãko rokẽ hnae, tykase toto.

⁴³Ynara tykase Jezu eya xine, —Ykerekeremara ehtoko.

⁴⁴Ritonõpo jenetupuhpopyra oya xine ahtao, ya oehpyra matose. Yrome ya ooepyrykohtao oẽsemãkapotorỹko ropa ase aorihtyã tõ ẽsemãkapotoh ropa po.

⁴⁵“Emero ahno amorepãko Ritonõpo mana,” tykase urutõkõ pake. —Papa omiry etaryhtao tuaro exĩko toto. Mame ya oehnõko toto.

⁴⁶Yrome Ritonõpo nymyry onenepyra matose, ya rokẽ tonese.

⁴⁷—Zae rokẽ ynara ãko ase, jenetupuhnanõ mã orihpỹme exĩko.

⁴⁸Ourukõme nymyry ase orihpyra oehtohkõme.

⁴⁹Kapu ae enehpohpyry tonahse atamurukomo a ona po. Toorihse toto.

⁵⁰Yrome kapu ae aepyhpyry nymyry tonahse oya xine ahtao orihpyra exĩko matose.

⁵¹Ourukõme nymyry ase, kapu ae aepyhpyryme jexiryke. Upũ enapyryhtao oya xine orihpyra exĩko matose jũme. Upũ nase wyi samo, ynekaroryme oya xine, emero porehme, orihpyra oehtohkõme jũme, tykase Jezu eya xine.

⁵²Morara kary etaryke tyya xine tõsezusezuhse toto juteu tõ tuisary tomo, —Otãtohxo ke tupũ ke kuopatorỹko hnae? tykase toto, oxime rokẽ tõturuse toto. (“Upũ tonahse oya xine ahtao,” kary, “Tonetupuhse oya xine jahtao,” katopo.) Yrome moro onenetupuhpyra tokurehse toto.

⁵³Morara tykase ropa Jezu eya xine, —Ajohpe pyra kapu ae aytohpyry ase. Upũ onenahpyra awahtao xine orihketõme rokẽ matose. Umunuru roropa onẽpyra awahtao xine orihketõme matose.

⁵⁴Upũ enapyryhtao oya xine orihpỹme exĩko matose. Umunuru tõse roropa oya xine ahtao oẽsemãkapotorỹko ropa ase aorihtyã tõ ẽsemãkapotoh ropa po.

⁵⁵Upũ mã tonahsẽme nymyry. Umunuru eukurume nymyry, tõsẽme.

⁵⁶Upũ tonahse oya xine ahtao umunuru maro ymaro exĩko matose. Ywy roropa amaro xine exĩko ase okurohtao xine.