João 6:21-45

²¹—Otyriko, tykase toto eya. Mame tõtyrise ropa Jezu kanawaka, toto kãnary aka. Mame axĩ toeporehkase ropa toto pata pona, Kapanaũ pona.

²²Yrokokoro imoihmãkõ moroto ro toh kynexine, Jezu a tonahsẽ emãkapotopõpyry po ro. Tõtuhtopõpyrykõ po roropa toh kynexine. Toemynyhmase toto Jezu poko, aytory onenepyra tokurehse toexirykõke. Ipoetory tõ ytory rokẽ tonese eya xine.

²³Moroto nakuatao imehnõ kãnary rokẽ tonese eya xine, Tiperiati poe aehtyã kãnary.

²⁴Mame Jezu onenepyra toexirykõke moro kanawae toytose toto Kapanaũ pona Jezu enese ropa.

²⁵Mame tonese ropa Jezu ahtao, tõturupose toto, —Otara ahtao hkoh moepyase ropa? tykase toto eya.

²⁶Ynara tykase Jezu eya xine, —Zae rokẽ ourutorỹko ase. Tõtuhse oexirykõke sã rokẽ jupĩko mexiatose, tuesapare toehse oexirykõke sã rokene. Yrome Ritonõpo poe jexiry onenetupuhpyra matose.

²⁷Torẽtyke pyra ehtoko tonahsẽ poko. Erohtoko Kapu ae Ayhtohpyry omipona oehtohkõme, orihpyra oehtohkõme jũme. Yjamitunuru enepõko mã Papa oya xine inymenekahpyryme jenetupuhtohme oya xine, tykase Jezu eya xine.

²⁸Ynara tykase toto, eya tõturupose, —Oty poko erohnõko ynanahe Ritonõpo omipona yna ehtohme? tykase toto eya.

²⁹Mame Jezu a tozuhse toto, —Ynara rokẽ Ritonõpo nyrohmanohpotoh mana oya xine, tynenehpohpyry rokẽ enetuputyry se mã oya xine, tykase eya xine Jezu.

³⁰Ynara tykase toto, —Oty rĩko hmah yna neneryme Ritonõpo jamitunuru enetohme yna a, oenetupuhtohme yna a. Yna zuru ekaroko kokoro rokene, tykase toto eya.

³¹—Kytamurukomo a wyi panõ tonahse kapu ae enehpohpyry, ahno esao pyra toytoytorykohtao. Ritonõpo omiry ynara ãko moro poko, “Toto napyry tonehpose Moeze a kapu ae,” ãko, tykase toto Jezu a. Ynara tykase Jezu eya xine,

³²—Ajohpe pyra ase ynara karyhtao, Moeze nekarohpyry kara kynexine. Papa kapuaõ nekarohpyry kynexine. Seromaroro ourukõ nymyry ekarory se Ritonõpo mana oya xine.

³³Ourukõme nymyry mã mokyro Ritonõpo nenehpohpyry kapu ae. Orihpỹme mã oritorỹko jũme, tykase Jezu eya xine.

³⁴—Moro ekaroko yna a kokoro rokene, tykase toto Jezu a.

³⁵—Ourukõme nymyry ase, tykase Jezu eya xine. —Ya ooepyrykohtao omise pyra exikety sã exĩko matose. Tãkye rokẽ exĩko matose jenetuputyryhtao oya xine. Tuna se pyra exikety sã exĩko matose roropa tãkye rokene, tykase ynororo eya xine.

³⁶—Ynara ase oya xine, jenẽko matose repe. Yrome jenetupuhpyra matose ekurehnõko, ase oya xine.

³⁷Ritonõpo nekaroryme awahtao xine ya jenetupuhnõko matose. Ya oehnõko roropa matose emero porehme. Mame ooepyrykohtao ya aaropopyra xine ropa ase jũme.

³⁸Kapu ae jyhtoase jenehpohpõ omipona jehtohme. Jamoreme pyra oepyase.

³⁹Mame ynara se mã jenehpohpõ ya, jenetuputyhpõkõ ahpahpory se pyra mã ya. Imeĩpo toto ẽsemãkapory se ropa mã ya emero porehme, aorihtyã tõ ẽsemãkapotoh ropa po.

⁴⁰Ynara se mã Ritonõpo. Tumũkuru enery se mã roropa imehnomo a enetupuhpotohme eya xine, orihpyra toto ehtohme jũme. Mame toto ẽsemãkãko ropa ase aorihtyã tõ ẽsemãkapotoh ropa po, tykase Jezu juteu tomo a.

⁴¹Morarame moro etaryke tyya xine Jezu tykerekeremase eya xine, “Ywy ase ourukõme kapu ae aepyhpyry,” kary etaryke tyya xine.

⁴²Morara exiryke ynara tykase toto, —Jezu mosero, Joze mũkuru. Jũ waro sytatose. Jẽ waro roropa sytatose. Otara ãkohxo ke hnae? “Kapu ae aepyhpyry ase,” ãko. Epyrypãko rokẽ hnae, tykase toto.

⁴³Ynara tykase Jezu eya xine, —Ykerekeremara ehtoko.

⁴⁴Ritonõpo jenetupuhpopyra oya xine ahtao, ya oehpyra matose. Yrome ya ooepyrykohtao oẽsemãkapotorỹko ropa ase aorihtyã tõ ẽsemãkapotoh ropa po.

⁴⁵“Emero ahno amorepãko Ritonõpo mana,” tykase urutõkõ pake. —Papa omiry etaryhtao tuaro exĩko toto. Mame ya oehnõko toto.