João 5:6-38

⁶Mokyro tonese ahtao Jezu a okynã kure pyra aexiry tonetupuhse eya. Ynara tykase ynororo eya, —Aimo oekurãkary se ropa hmah? tykase.

⁷—Ỹ, tykase kurãkara, Jezu tozuhse. —Yrome topeke pyra myhẽ ase, jarone pyra nakuaka kurokuro karyhtao. Jytory se jahtao imepỹ juapõkãko mana, tykase.

⁸Ynara tykase Jezu eya, —Owõko ropa hkoty. Awãty anỹko. Ytoytoko ropa, tykase.

⁹Axĩ toekurãkase ropa mororomero. Tãty tanỹse eya toytotohme ropa. Oserematohae kynowõne ropa.

¹⁰Morara exiryke juteu tõ tõturupose eya, —Oty katoh erohnõko mano? Awãty aroarõko mano? Erohtoh kara sero seroae. Ritonõpo nymeropohpyry Moeze a omipona pyra mase, tykase juteu tõ esã kuranõpokara a.

¹¹—Yrome jukurãkahpõ omi poe jowõno ropa. “Awãty anỹko. Ytoytoko ropa,” tykase exiryke ya, tykase ynororo eya xine, ikurãkahpyry ropa.

¹²—Onokyh mokyro awãty anỹpohpõ rohpa? tykase toto eya tõturupose.

¹³Yrome ynororo tukurãkahpõ waro pyra kynexine, toesyryhmase Jezu exiryke, ahno imoihme moro tao exiryke.

¹⁴Imeĩpo tunukurãkahpyry ropa tonese ropa Jezu a Ritonõpo maro oturutoh tao. Ynara tykase ynororo eya, —Enẽko mase. Kure mexi ropa. Morara exiryke oorypyry irumekako, popyra ipunaka oehtoh anapoizomopyra oehtohme, tykase Jezu eya.

¹⁵Morarame mokyro toytose, Jezu ekarose juteu tomo a. —Jezu mokyro, ukurãkahpõ ropa, tykase ynororo eya xine.

¹⁶Morara exiryke mokaro a Jezu tykerekeremapitose, kurãkara tukurãkase ropa oserematohae eya exiryke.

¹⁷Ynara tykase Jezu eya xine, —Papa kapuaono erohkehpyra mana. Papa saaro ase erohkehpyra, tykase Jezu eya xine.

¹⁸Morara kary etaryke tyya xine juteu tõ esã Jezu etapary se toehse yronymyryme oseremara Jezu exiryke oserematohae, tumyme Ritonõpo tokarose eya exiryke roropa. Morara exiryke Ritonõpo mũkurume aosekaroryke eya Jezu etapapory se toehse juteu tõ tuisary tomo.

¹⁹Ynara tykase Jezu eya xine, —Ajohpe pyra ase. Toipe Kapu ae Ayhtohpyry Tumy omipona rokẽ senohne rĩko. Tamoreme senohne onykyrypyra mana. Morararo Papa kapuaono erokuru eneryhtao ya isaaro erohnõko ase. Ipoenohnõko ase imũkurume jexiryke.

²⁰Papa kapuaono Tumũkuru se ipunaka. Morara exiryke tynyriry tõ enepõko mã Tumũkuru a, ise toexiryke. Imeĩpo Papa mã tyorõ enepõko mã ya senohne motye kuhse õsenurukatohkõme.

²¹Aorihtyã ẽsemãkaponeme ropa mã Papa kapuaono. Isaaro ase aorihtyã ẽsemãkaponeme ropa ase.

²²Ritonõpo nymyry seropõkõ anapiakara mana. Tumũkuru a rokẽ toto apiakapõko mana,

²³emero porehme Imũkuru ime exiry enetupuhtohme, Jũ ime exiry roropa enetupuhtohme eya xine. Imũkuru ime exiry onenetupuhpynõ Jũ ime exiry onenetupuhpyra roropa toh mana.

²⁴—Zae rokẽ ase ynara karyhtao, jomiry etananõ mã jenehpohpõ enetupuhnõko mã toto. Orihpyra exĩko roropa mã toto jũme. Toto onemapopyra Ritonõpo mana apoto htaka. Pakero mã Ritonõpo a typoenõme tyrise toto. Orihpỹme tyrise toto eya, tykase Jezu eya xine.

²⁵—Mame zae rokẽ ynara ãko ase oya xine, okynã pyra Ritonõpo mũkuru omiry etãko aorihtyã mana. Seromaroro aomiry etapitõko mã toto. Morarame aomiry etaryhtao tyya xine ẽsemãnõko ropa mã toto. Isene exĩko ropa mã toto.

²⁶Ritonõpo mã isene exiketõ rihpõme. Isaaro ase Papa poe aorihtyã anỹpõko ropa ase isene aehtohkõme ropa.

²⁷Papa poe ahno apiakaneme ase, pohnõ apiakaneme roropa ase, kapu ae aepyhpyryme jexiryke.

²⁸—Osenuruhkara ehtoko jomiry poko. Imeĩpo mã aorihtyã tõ ẽsemãnõko ropa mana emero porehme, jomiry totase exiryke eya xine.

²⁹Tũtãko ropa mã toto okepỹpo tõ esae. Mokaro mã kurãkõ ekepyã isene exĩko ropa mana jũmãme. Orihpynõme exĩko ropa mã toto. Morarame pohnõ ẽsemãkapõko roropa mana. Yrome apoto konõto htaka toto emapõko mana, jũmãme roropa, tykase Jezu eya xine.

³⁰—Jamoreme ase toto onypokõnohpyra. Ritonõpo omi poe rokẽ toto apiakãko ase. Morara exiryke zae rokẽ ase, jamoreme pyra jexiryke. Jenehpohpõ omi poe rokẽ morohne poko ase erohnõko.

³¹—Jamoreme rokẽ ypoko otuarõtanohpyra xine ase. Jomi poe rokẽ otuarõtanopyrykohtao zae pyra jekarõko matose.

³²Yrome imepỹ nae mana ypoko otuarõtanohnekõme Ritonõpo. Inekarohpyry ypoko zae. Moro waro ase.

³³Imehnõ maropoatose João a oturupose. Kure toto zuruase João zae jexiry poko.

³⁴Ynara kara ase imehnomo a, “Wekãtotatoko,” kara ase. Ynara kary se rokẽ ase, “João omihpyry zae ypoko,” kary se rokẽ ase oya xine, okurãkarykõ se jexiryke.

³⁵—Ozeiponekõme sã kynexine João, tororo ãko samo saereh kaneme, otuarõtanohnekõme. Axĩtao rokẽ João se mexiatose ozeiponekõme.

³⁶Yrome otuarõtanohnekõ nae, João omiry motye. Ritonõpo poe yjamitunuru tonepose ya. Morohne eneryke oya xine Papa nenyokyhpyryme jenetupuhnõko matose.

³⁷Ritonõpo roropa mã ypoko otuarõtanohtorỹko mana, jenehpohpono. Yrome aomiry onetapitopyra matose. Ẽmyty onenepitopyra roropa matose.

³⁸Morara exiryke aomiry pyra matose okurohtao xine, inenehpohpyry onenetupuhpyra oexirykõke.